LUNES TRIGÉSIMO DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Roma guápe     4, 20-25

Che pehẽngue kuéra:

Abraham nosẽi ogueroviávagui ha ijerovia naikangýi, oguerovia mbareteve katu. Oguerohory Tupã Ñandejárape, oguerovia etereígui Tupã Ñandejára ipu’akaha ojapo haguã pe iñe’ë  me’ẽ haguéicha ichupe. Upévare, Tupã Ñandejára ohecha kuaa ha oguereko ichupe hekojojáva ramo.

Ha upe Tupã Ñandejára ohecha kuaa hague ichupe, ndaha’éi oje’éva Abraham rehe añónte. Oje’e avei ñande rehe. Tupã  Ñandejára ohecha kuaa ñandéve ñande jerovia, jarovia ramo ichupe. Ha’e omoingove jevy Jesús Ñandejárape, oñeme’ẽ va’ekue  omano haguã ñane angaipáre, ha oñemoingove jevy ñane mboheko joja haguã.

Tupã Ñandejára Ñe’ẽ.

SALMO ÑEMBOHOVÁI     Lc 1, 69-75

Opavave: To ñemomba’e guasu Tupä Ñandejárape.

Péina ombou ñandéve peteĩ Ipu’akapáva

ñande pysyrõtáva ñane angaipágui,

hembiguái David ñemoñare.

Ha’e oñe’ẽ me’ẽ va’ekue  imaranduhára rupi. O.

Ñande pe’a haguã umi ñande rehe ija’e’ỹva

ha ñande rayhu’ỹva pógui,

oiporiahuverekotaha umi ñande ru ypykuépe

ha ndahesarái mo’ãiha iñe’ẽ me’ẽ marangatúgui. O.

Kóva ha’e iñe’ẽ me’ẽ ñande ru Abrahámpe

ohejataha ñandéve marangatu ha teko jojápe,

ñande pe’a umi ñande rayhu’ÿva poguýgui

ñaime haguã henondépe opa árapeve guarã. O.

ALELUIA Mt 5, 3

Aleluia.

Ovy’a va’erã umi ndojejapóiva ha hi’ánga mboriahúva,

ichupe kuéra guarä niko Sambyhy Yvágapegua.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha    12, 13-21

Upe ramo peteĩ umi oĩva apytégui he’i Jesúspe: Mbo’ehára, ere che ryke’ýpe to me’ẽ chéve che mba’erãva, ore ru oheja va’ekuégui.

Ha Jesús he’i ichupe: Che irũ, máva piko che moĩ ra’e pende apytépe mbojovakehárõ térã mboja’ohárõ?

Ha he’i avei: Pejerereko opaichagua mba’epotágui. Jeikovéko noĩri heta mba’e ojererekóre.

Ha upérõ omombe’u ichupekuéra ko ñe’ẽ mbojoja: “Oiko va’ekue  peteĩ imba’e retáva, hemitÿngue osẽ porã iteva’ekue  ha heta omono’õ. Upe imba’e retáva oñemoĩ ojepy’a mongeta: ‘Mba’e piko ajapóta? Ndarekói niko moõpa añongatúta che remitÿngue amono’õva.’ Ha he’i ijupe: ‘Aikuaáma mba’épa ajapóta. Aitýta pe che remitÿngue ñongatuha ha amopu’ãta tuichavéva añongatu haguã opa osẽ va’ekue  Ko’ágã  ha opa arekóva.

Upéi ha’éta che jupe: ‘Che irũ, heta mba’e rereko iñongatupy heta ára jerépe guarã. Epytu’u, ekaru, emboy’u ha evy’a nde rekovépe.’ Tupã Ñandejára katu he’i ichupe: ‘Nde, výro, ko pyharépe voi remanóta. Ha pe rerekóva iñongatupy piko mávape guarãta? Péicha ojehu pe yvypóra omono’õvape mba’e reta ijupe guarã año, ha imboriahu Tupã Ñandejára renondépe.”

Ñandejára Jesucristo Ñe’ẽ.