Ñahendu Jesús Ñe’ẽ. Domingo 30º Durante el Año

Escucha el evangelio y la reflexión en: https://youtu.be/e6Q-Og7YI5k

Domingo 30º Durante el Año Marcos 10, 46 – 52

Jesús ha idisípulo kuéra oguãhẽ Jericópe. Ha osẽvo hikuái upégui, heta umi ohóva hapykuérikuéra. Pe tape yképe katu oguapy hína peteĩ tupãmba’e ojeruréva, ha ohecha’ỹva. Héra Bartiméo, Timéo ra’y. Ha ohendúvo Jesús ku Nazaretgua, ohasaha ohóvo hína upe rupi, oñepyrũ osapukái: — Nde Jesús Mesías, che poriahuverekomína.

Heta katu oĩ ojeréva ha he’íva chupe okirirĩ haguã. Ha’e katu hatãve osapukái:— David ra’y, ore poriahuverekomína.

Upépe Jesús opyta ha he’i: — Peje chupe tou.

Ha he’i hikuái Bartiméope: — Pya’éke epu’ã eju. Nerenói niko hína.

Pe ohecha’ỹva oity ijahoja, opo opu’ã ha oñemboja Jesús rendápe.

Jesús oporandu chupe: — Mba’éiko reipota ajapo nde rehe.

Pe ohecha’ỹva he’i chupe: — Mbo’ehára, ahechasemínteko.

Jesús he’i chupe: — Terehóntema. Che rehe rejerovia haguére rekuera.

Upepete pe ohecha’ỹva ohecha sapy’a, ha oho Jesús rapykuéri.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Mboriahu remikotevẽ ningo noñehenduséiva, oñemokirirĩse uvei. Mboriahu haguére ndaikatúiramo guáicha orreklama, opyta va’erã voínte ochiã ha’eño.

Jahechavéma jepe jahávo indígena ha kampesíno kuéra oikotevẽva yvy osapukái, omba’apóva ojapóramo huelga, ipyahúva ojapo manifestación, jahechápa noñepenái hese kuéra. Nokirirĩvéima lo mitã. Hatãve rei osapukái oiméramo omokirirĩséva.

Pe siégo ohendúvo Jesús ohasaha osapukái avei ipy’aite guive ohenói ichupe, ha omokirirĩséramo jepe ichupe hikuái hatãvéntema rei osapukái. Ñanembo’e, che irũ ha che reindy, jajerure vaerãha ñaikotevẽva jaguevi’ỹre, ñanerovaatã’imi va’erãha jajeruréramo iporãva, taha’e ñande jupe guarã, ñane familia, ñane organización, térã katu ñane komunida peguarã.

Ha Jesús noñembotavýi chugui. Bartimeo opo voi opu’ã ha oñemboja. Hesu oporandu ichupe mba’épa oipota. Ñandejára ohendu ha ohechakuaa mboriahu osapukáiva ha osẽséva pe ojejopy ha oiko asy hágui.

Jesús omomba’e pe oikotevẽva ha ndoheja reíri oime asývape. Ohesape’a ha upévo omopu’ã ichupe pe tape yke oñemombo hágui, pe tembyrénte ohupyty hágui. Ojapo ichugui máva oñakarapu’ã haguã.

ÑAÑEMBO’E OÑONDIVE

Ñandejára Hesukrísto eju va’ekue ore apytépe emopu’ãvo mboriahu ha ndereheja reíriva oiko asývape. Ore resape’a míkena avei oréve roñandu ha rohechakuaa haguã ore rapicha remikotevẽ, roñemoĩvo ijykére oñakarapu’ã ha oiko haguã nde reipota háicha. Amén.

Pa’i Jasy.