Ñahendu Jesús Ñe’ẽ. Domingo 33º Durante el Año

Escucha el evangelio y la reflexión en: https://youtu.be/6Nz7lZvxkGM

DOMINGO 33º Durante el Año

Marcos 13, 24 – 32

Upérõ Jesús he’i: Umi jehasa asyha ára ohasa rire, kuarahy iñipytũne, jasy ndohesapevéi chéne, mbyjakuéra ho’apáne, ha opa mba’e yvágape oĩva okuchupáne. Ha upévo che recháne ajúvo arai ári, tuicha pu’aka ha mimbipápe. Ha amondóne che ánhelkuéra ombyatypávo umi che aiporavo vaekue opa guio ko yvy apéregui.

Peheja umi ígo máta ta pene mbo’e. Pehecha vove umi hakã kyrỹi hogue roky ñepyrũmaha, peikuaa hína oguãhẽmaha ára haku. Péicha avei, pehecha vove ko’ã mba’e ojehuha, peikuaáta hi’aguĩmaha che aju jeyha ára. Añetéko ha’e peẽme. Ko’ã mba’e ojehúta omanomba mboyve umi ko’ágã oikovéva. Yvága ha yvy ikatu opa, ko’ã mba’e che ha’éva katu nahániri.

Avave ndoikuaái mba’e árapepa térã araka’etépa ajúne ágã. Ñandejára ánhelkuéra ndoikuaái, che jepe ndaikuaái. Che ru añónte pe oikuaáva.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Aipo “fin del mundo” oguahẽtaha niko oime sapy’a py’a osẽva omoherakuã ha omondýipa la héntekuérape. Oime katu he’íva: “oútaramo la fin del mundo jakaru ha ñamokõntema, javy’a saingo oguahẽ mboyve”. Ha mba’épa ja’éta. Ko yvy jaikoha niko, ñandéicha avei, oreko iñepyrũmby ha orekóne avei ipaha. Ñande voi niko ndajaikuaái araka’épa oguahẽta ñande ára paha.

Mamo piko jaháta jaikuaa aipóramo araka’etépa ko yvy tuichakue ojepysóva ha hetakue tapicha iñasãiva hi’ári oúta opa. Ndaijái ñandéve umíva jaikuaa. Ñande rasapa. Hesu jepe niko he’i ha’e ndoikuaáiha.

Ñandejára yvágape mante oikuaa, he’i. Ko’ã mba’e Hesu he’i ñandéve jaikuaa haguã ha’e outaha ñane ruguaitĩ oguahẽvo upe ára paha. Taha’e ñande año ñamanóramo, taha’e oúramo ñande ári degrásia vai ojukáva hetápe, taha’e oúramo añete upe fin del mundo, yvy tuichakue ára paha. Taivai ivai háicha upe oipe’áva ñande rekove, ani jakyhyje, Ñandejára nañande reja rei mo’ãi. Ha’e oiméta upépe ñane ra’arõ, ñane renói ha ñane mbyaty ijehe.

Yma ndaje Pa’i hesuita oho ohecha ñande ypykue guarani omano mbotáva oñembo’évo hese he’i ichupe: “Evy’áke, ma’ẽna oiméma nera’arõ amo yvágape Jesús, ma’ẽ ñande sy Tupãsy nerenóima, oiméma katu ñane sántokuéra, ma’ẽmína umi ángel neruguaitĩtava, aníke nde py’a kangy”… Ha péicha omokyre’ỹ ichupe kyhyje’ỹre oheja haguã hekove ojehekýivo ko yvy ape árigui.

ÑAÑEMBO’E OÑONDIVE

Ñandejára Jesukrísto, yvága ha yvy opáramo jepe ne ñe’ẽ ndohasa rei mo’ãi. Nde pópe romoĩ ore rekove nde oremopu’ã jevy haguã oguahẽvo ore ára paha.

Pa’i Jasy.