LECTURAS SAN JUAN, APÓSTOL Y EVANGELISTA

LECTURAS SAN JUAN, APÓSTOL Y EVANGELISTA

LECTURA PETEÎHA:

Ñahendúta Tupã Ñandejára Ñe’ẽ San Juan aranduka peteïhápe oi háicha 1, 1-4

Che pehenguekuéra pohayhuetéva: Amoĩ peëme kuatia rehe upe iñepyrũha guive oiko va’ekue rehegua, rohendu ha ore resa tee rupi rohecha va’ekue rehegua.

Ahecha va’ekue niko ichupe ha apoko va’ekue hese che pópe. Upéva ningo hína upe ñe’ẽ jeikove rehegua. Ko jeikove ojehechauka va’ekue.

Ore rohecha ha romombe’u peëme ko jeikove opa ára peguáva oĩ va’ekue Túva ndive ha ojechauka va’ekue oréve. Amombe’u peëme aipo ramo pe ahecha ha ahendu va’ekue, peẽ peime haguã che ndive, che aime háicha Tupã pe Túva ha ita’ýra Jesucrísto  ndive. Ahai peëme ko’ã mba’e ñane renyhẽ haguã vy’águi.

Tupã Ñandejára Ñe’ẽ.

SALMO ÑEMBOHOVÁI  97, 1-2. 5-6. 11-12

Opavave: Tupã Ñandejára rérape pevy’a peẽ pende reko jojáva.

Tupã Ñandejára mburuvicha guasu hína ko yvy tuichakue to vy’a,

umi yvy y mbyte rupi oĩva to vy’a.

Arai ypytũ oñuãmba ichupe, teko hekopegua ha teko joja iguapyha ramo oguereko. O.

Umi yvyty araitýicha hykupa Tupã Ñandejára renondépe, ha’e opa ko yvy Jára hína,

yvága heko joja omoherakuã ha maymáva ohecha heko mimbipa. O.

Ko’ẽ pyahu iñapysẽ heko jojávape, vy’a katu heñói imarangatúvape.

Tupã Ñandejára rérape pevy’a peë heko jojáva, ha pemomba’e guasu héra marangatu. O.

ALELUIA

Aleluia.

Ndéve Tupã, romomba’e guasu ha roguero purahéi; ndéve, Ñandejára, nemomba’e guasu purahéipe apóstolkuéra

Aleluia.

EVANGELIO

Marandu porã Ñandejára Jesucrísto  rekove ha hemimbo’e San Juan omombe’u háicha 20, 2-8

Upe árape pe semana iñepyrüha ára pyharevete, ko’ëjúvo, María Magdalena pya’e oho Simón Pedro ha ku Jesús remimbo’e ha’e ohayhuetéva rendápe, ha he’i ichupekuéra: Ojereraha niko Ñandejára retekue pe itakuágui, ha ndoroikuaái mamópa oñemoĩ.

Upépe Pedro ha pe Jesús remimbo’e ambue, osẽ oho pe itakua rendápe. Mokõivéva pya’e oho, pe ambue katu oho hatãve Pédrogui ha ha’e raẽve oguahẽ.

Ojayvy omaña haguã pe itakuápe ha ohecha umi ao ojejokua haguépe Jesús retekue, ha ndoikéi. Hapykuéri oguahẽ Simón Pedro, ha oike voi ha’e pe itakuápe. Ha’e avei ohecha upépe umi ao, ha ohecha avei pe ao Jesús akã ojejokua haguépe oñemboapu’a ha oñemoĩ hague ambue hendápe ha’eño.

Upévo oike avei pe ambue Jesús remimbo’e, pe oguahẽ raẽve va’ekue. Ha ohechávo mba’épa ojehu, oguerovia Jesús oikove jevy hague.

Ñandejára Jesucrísto  Ñe’ẽ.