LECTURAS SAN ESTEBAN, PRIMER MÁRTIR

LECTURAS SAN ESTEBAN, PRIMER MÁRTIR

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha  6, 8-10; 7, 54-60

Upe ramo: Esteban, henyhẽva pokatu ha Tupä Ñandejára rovaságui, ojapo hechapyrãva ha techaukarã maymáva apytépe. Oĩ mbovymi umi judío tupao “Tembiguaikue” ojeheróva, oñomoirũva Cirene, Alejandría, Cilicia ha Asiagua ndive, oñepyrũva oñe’ẽ apise Estébanpe, ha ndaikatúi ombohovái ichupe, iñe’ẽ henyhẽgui arandu ha Espíritu Sántogui.

Ha’e katu, henyhẽva Espíritu Sántogui, oma’ẽ yvága rehe ha ohecha Tupã Ñandejára reko mimbipa, ha Jesúspe oñembo’ýva hína Tupä akatúape. Upéma ramo  he’i: Pema’ẽmi! Ahecha ojepe’a ramo yvága, ha pe yvypóraicha ou va’ekuépe, oĩva Tupã Ñandejára akatúape.

Ha’e kuéra katu omboty ijapysa, ha sapukái pópe ojeity hikuái Esteban ári. Oguenohẽ upe távagui ha ombo ita ichupe ojuka peve. Ha umi oikóva mba’e rechaha ramo oheja ijaokuéra peteĩ mitã rusu Saulo héravape, oñangareko haguã umíva rehe.

Itápe ojejapi aja, Esteban oñembo’e he’ívo: “Jesús, che Jára, che anga amoi nde pópe”. Upéi oñesũ ha osapukái hatã: “Che Jára, eheja rei ichupekuéra iñangaipa!” Upéva he’ívo, omano.

Tupã Ñandejára Ñe’ẽ.

SALMO ÑEMBOHOVAI   31, 3c – 4. 7b- 8a. 16b-17

Opavave: Tupã Ñandejára nde pópe amoĩ che rekove.

Nde upe che rehe reñangarekóva, Nde äme añeñongatu

ha che renohẽ jejopy vaígui.

Nde réra rehehápe eñangareko che rehe ha che sãmbyhy. O.

Nde pópe amoĩ che rekove, che Jára Tupã añetete, nde hína pe che pytyvõtava.

che katu nde rehe ajerovia.

Nde réra, to mbohápe che raperã ha ta chegueraha. O.

Ani che rejátei ha’a umi che rayhu’ỹva ha che rereko asýva pópe.

Tupã Ñandejára, ehecha kuaa kena chéve,

Nde, che rayhúgui che pe’a jejopy vaígui. O.

ALELUIA Sal 117, 26a. 27a

Aleluia.

Tojehovasa pe Tupã Ñandejára rérape oúva

Tupã hína Ñandejára, ha’e ñande resape.

Aleluia.

EVANGELIO

Marandu porã Ñandejára Jesucrísto rekove ha hemimbo’e San Mateo omombe’u háicha 10, 17-22

Upe ramo Jesús he’i ijapostolkuérape: Peñangarekóke pende jehe, cháke oĩta pene moakãsãva ha pene moĩva mburuvichakuéra pópe, ha pene mbyepotíva itupaokuéra rupi.

Che remimbo’e hague rehe peẽ, pejereraháta sãmbyhyhára ha mburuvicha guasukuéra renondépe. Péicha, peẽ peñe’ẽta che rehe ichupekuéra, ha umi judio’ỹvape avei. Ha pene moĩvo hikuái mburuvichakuéra pópe, ani pejepy’apy mba’épa térã mba’éichapa peñe’ẽta. Ijávo peẽme peñe’ẽ haguã, Tupã Ñandejára ome’ẽta peëme mba’épa pejéta. Ha ndaha’e mo’ãi peẽ, peñe’ẽtava. Pende Túva Espíritu oñe’ẽta pende juru rupi.

Oĩta ome’ẽva tyvýra teépe jepe ojejuka haguã, ha oĩta túva ome’ẽva ta’ýrape. Mitã nguéra opu’ãta túva kuéra rehe, ha ojukaukáne. Che remimbo’e hague rehe peë, avave ndaija’e mo’ãi pende rehe. Pe che rehe ojeroviáva ipaha peve katu, oikovéta.

Ñandejára Jesucrísto  Ñe’ẽ.