Ñahendu Jesús Ñe’ẽ. Sábado Epifanía rire

Escucha el evangelio y la reflexión en: https://youtu.be/8LphkoUAk5Y

Sábado Epifanía rire Juan 3, 22 – 30

Jesús ha idisípulokuéra oho Judéape. Upépe opyta aremi hikuái, ha Jesús oporomongarai oikóvo upe rupi. Upe jave ave, Juan oporomongarai oikóvo Enónpe, Salim ypýpe, hetágui y upépe. Heta oĩ ohóva hendápe oñemongarai haguã. Ko’ã mba’e ojehu Juan ho’a mboyve préso.

Upéi katu Juan disípulokuéra oñepyrũ oñoñe’ẽ api hikuái peteĩ judío ndive mba’éichapa géntekuéra oñemopotĩ va’erã Ñandejára rendápe oguãhẽ haguã. Ha osẽ oho Juan rendápe hikuái, ha he’i chupe: — Mbo’ehára, ku akokuehe oĩ va’ekue nendive Jordán mboypýri ha ne mandu’áva jepi reikóvo opavavépe niko oime ko’ágã oporomongarai hína. Ha ojehopa hendápe.

Juan he’i chupekuéra: — Avave niko ndaikatúi mba’eve ojapo Ñandejára ndohejái ramo ichupe. Peẽ niko pehendu porã va’ekue ha’e ramo guare peẽme che ndaha’eiha pe Mesías. Ha’e va’ekue peẽme che añemboúnte hague henonderã.

Mendahápe niko pe kuñataĩ po ojokóva, upéva hína pe menarã. Iñirũ ombosako’i va’ekue imenda katu, ojapysaka pe menarã he’ívare ha ovy’a chupe ohendúvo. Ha péicha ojehu hína chéve ko’ágã. Avy’apáma pe avy’a va’erã pe Mesías oúma haguére. Ha’e niko tuicha-tuichavéta ohóvo hína. Che katu ague mbegue katúta ahávo.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ajépa ningo ñamandase ha nañaimeséi avave poguýpe. Ndajaipotái avave ñanemo’ã ha oñemoĩ ñane akã ári. Oiméramo oĩva hapicha poguýpe he’íne: Ágãnte che amanda va’erã avei, ha upépe pehecháta mávapa che. Hasy niko ñañemoĩ haguã upe ñane rendápe.

Ñañekontenta ha javy’a upe jarekóva ha jahupytývare, ñañombojoja’ỹre ñande rapicha ñande ykéregua ndive.

Juan Bautísta remimbo’ekuéra ohecha Hesu ika’avoveha imaéstrokuéragui, ijatyveha hese umi ikaraiséva ha upéva ojopi chupe kuéra. Ha oúma katu ojagua hese Juánpe. Ha upérõ ko karai marangatu ombo’e chupekuéra, ha ñandéve avei, mba’éichapa ñame’ẽ va’erã ñande jupe ñane renda, japyta haguã upe Ñandejára ome’ẽha peve ñandéve.

Jajapo upe ha’e ñande jokuaiha ñande katumi háicha, ha ani jajoko ñande rapicha Ñandejára ombokatupyryvéva ha omoĩ yvatevéva ñande hegui. Mba’etekópa che irũ ha che reindy. Ñaimépa ñande ave oguahẽvove ára jajapopamaha pe tembiapo oñeme’ẽ va’ekue ñandéve, jajehechakuaa ha ñamopa’ũ ambue ipyahuvévape toike kánchape. Ha ja’e avei ñande Juan Bautísta he’i va’ekue: Tekotevẽ ha’e kuéra okakuaa ha che katu ague mbegue katu ahávo.

Pa’i Jasy.