LECTURAS DOMINGO 5º TIEMPO DURANTE EL AÑO

LECTURAS DOMINGO 5º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 6, 1-2a. 3-8

Upe áño omano haguépe mburuvicha guasu Ozías, ahecha Tupã guapyha ijyvate etereívape; ijahoja ruguái omyenyhẽ pe tupao. Tekove tata rendýpe ojoguáva oĩ hi’ári ha peteĩ teĩ, 6 ipepo. Ha he’i joa ojupe: “Imarangatu, imarangatu, imarangatu Tupã ipu’akapáva; yvy tuichakue henyhẽ heko mimbipágui”.

Oñehendúvo ko’ã ñe’ẽ, tupao rokẽnguéra oryryipa ha pe tupao henyhẽ tatatĩgui. Ha che ha’e: “Amanóta! Ahecha niko che resa tee rupi mburuvicha guasu Tupã ipu’akapávape ha che juru niko naipotĩri añe’ẽ haguã ha aiko tetãgua ijuru potĩ’ỹva apytépe”.

Upéma ramo Peteĩva umi tekove tata rendýpe ojoguáva oveve che aimeha gotyo. Ipópe tatapỹi ohupi va’ekue altárgui, omboja che juru rehe ha he’i chéve: “Péina kóva ojáma nde juru rehe, ojepe’áma ne angaipa, ha umíva ojeheja reíma ndéve”.

Upéma ramo ahendu Ñandejára he’i ramo: “Mávapepa amondóta? Mávatapa ñane rembijokuái?”

Che ha’e: “Ápe aime. Che jokuái chéve”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 137, 1-5. 7c – 8

Opavave: Roguero purahéita ore Jára, Tupãnguéra renondépe.

Che py’aite guive romomba’e guasúta ore Jára,
Tupãnguéra renondépe roguero purahéita.
Nde tupao renondépe añesũne,
nde réra amomba’e guasúne. O.

Nde niko mborayhu ha añete,
ha nde réra ha ne ñe’ẽ remoĩ opa mba’e ári.
Ndéve añembo’e ha nde che rendu,
che py’a remombarete. O.

Mburuvicha guasu kuéra yvy arigua
tanemomba’e guasu
ohendúvo umi ne ñe’ẽ,
ha ne rembipota togueropurahéi. O.

Ha nde pyapýpe che renohẽ jejopy vaígui.
Tupã ojapóta opa mba’e che rehehápe.
Ore Jára, ne mborayhu niko ndopái araka’eve.

Ani reheja rei upe ne rembiapokue remoñepyrũ va’ekue. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Corinto guápe 15, 1-11

Ko’ágã, che pehẽnguekuéra, aipota pene mandu’a pe marandu aikuaauka va’ekue rehe peëme. Kóva ha’e pe marandu porã peẽ pejapyhy porã va’ekue ha oñemombarete porãhápe pende jerovia. Ko marandu porã rupi avei peñe ysyrõta, penembaretérõ ipype, pe che amombe’u haguéicha peëme. Upeicha’ỹ ramo, perovia gua’u rei ra’e.

Tenondete pombo’e va’ekue pe ikuaapyrã chéve oñemoguahẽ va’ekue ha’e háicha ite: Cristo omano hague ñane angaipa rehe, he’i háicha Tupã Ñe’ẽ, ha’e oñeñotỹ ha oikove jevy mbohapy ára haguépe, omombe’u háicha avei Tupã Ñe’ẽ, ha ojehechauka hague Céfaspe ha upéi umi 12 hemimbo’épe.

Upéi ojechauka hetave 500gui heroviahápe, opavave nunga oikovéva gueteri, oime jepe omanóma va’ekue. Upéi ojechauka Santiágope, ha upéi apóstolkuérape. Ipahávo ojechauka avei chéve, ajoguáva ku mitã hi’ara’ỹme ou va’ekuépe ko yvy ári. Che niko pe apóstol kuéra apytépe mba’evetevéva, ha ndaijái voi katu añembohéra apóstol, amuña vai va’ekue niko Tupã iglésiape.

Opáichavo, che ha’e ko ha’éva, Tupã ipy’a porã rupi che ndive. Ha upe ipy’a porã hague ndopyta reíri. Amba’apo hetave katu ichuguikuéra. Nda chéi jepe, Tupã, ipy’a porãgui, che pytyvõ va’ekue. Amo ipahápe niko, ta che ra’e, térã ta ha’ekuéra, kóva ha’e pe rombo’e va’ekue ha peë perovia va’ekue.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 4, 19
Aleluia.
Jesús he’i ichupekuéra: Peju che moirũ, ha che pombo’éta penohẽ haguã pende rapichápe jejopy vaígui.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 5, 1-11

Opavave: Romomba’e guasu ndéve, Ñandejára.

Upérõ Jesús oñembo’y hína lágo Galiléa rembe’ýpe. Ijatypa joa ijerére géntekuéra ohendu haguã Ñandejára Ñe’ẽ. Pe y rembe’ýpe, Jesús ohecha mokõi kanóa. Ohecha nandiha, ijára kuéra oguejy ra’e omopotĩ haguã irréd.

Jesús ojupi peteĩme, Simón mba’évape, ha ojerure chupe oñemomombyry’imi haguã pe y rembe’ýgui. Ha oguapy pe kanóape, ha upe guive ombo’e opavavépe.

Oñe’ẽmbávo, he’i Simónpe: — Jaha amo hypyvehápe, ha upépe epoi nde rred.

Simón katu osẽ he’i chupe: — Mbo’ehára, pyhare pukukue niko romba’apo kuri ha mba’evete ndoroikutúi. Ko’ágã katu, nde eréguinte, apoíta. Ha péicha ojapo. Hetaiterei pira niko oity hikuái, ha irred katu osoróta katuete.

Upémarõ ohenói hikuái hapichakuérape na mombyrýi oĩva hína, ou haguã oipytyvõ chupekuéra. Ou hikuái. Ha mokõive kanóa omyenyhẽte hikuái, ha ipahápe haimetéma oñapymi. Simón ohechávo upéva, oñesũ Jesús renondépe ha he’i chupe: — Ñandejára, anietéke eja che rehe. Che niko pecador.

Simón ha iñirũ nguéra, ha upéicha avei Santiago ha Juan, Zebedeo ra’y mokõive, tuicha oñemondýi ohechávo mba’eichaitépa heta umi pira oitýva hikuái. Jesús katu he’i Simónpe: — Ani rekyhyje. Ko’águi rire renohẽta génte ndaha’éi pira.

Upéi katu omboja hikuái pe y rembe’ýpe ikanóakuéra. Ohejapa oguerekomíva ha oho Jesús ndive.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesukrísto.