LECTURAS: LUNES 5º DURANTE EL AÑO

LECTURAS: LUNES 5º DURANTE EL AÑO

Ko’ágä   ñahendúta Tupã Ñandejára ñe’ẽ Génesis arandukápe oĩ háicha                             

     1, 1-19

Iñepyrũmbýpe, Tupã Ñandejára ojapo yvy ha yvága. Upérõ yvy oĩ sarambi kuépe, pytũ ojaho’ipa upe tugua pypuku ha Tupã Ñandejára pu’aka omymýi y ári.

Tupã Ñandejára he’i: “Toiko Tahesakã!” Ha oiko ha’e he’i haguéicha. Tupã Ñandejára oma’ẽvo hembiapo kuére ojuhu iporãha. Ha oipe’a hesakãha pytũhágui. Hesakãva ombohéra “ára” ha pytũha “pyhare”. Ha upéicha ohasa ára peteĩha.

Upéi TupãÑandejára he’i: “Toiko y aty guasu pa’ũme arapy ha to mboja’o mokõi hendápe upe y aty guasu”. Ha oiko ha’e he’i haguéicha. Tupã Ñandejára ojapo peteĩ arapy ha upéva oipe’a ojuehegui y aty guasu oĩva iguýpe pe hi’ári oĩvagui. Ha Tupã Ñandejára ombohéra “yvága” upe arapy. Ha upéicha ohasa ára mokõiha.

Upérõ Tupã Ñandejára he’i: “Ta ijaty peteĩ hendápe y oĩva yvága guýpe ha to jekuaa iñapekãha”. Ha oiko ha’e he’i haguéicha. Tupã Ñandejára ombohéra “yvy” pe iñapekãha, ha “yguasu” pe y aty guasu. Ha oma’ẽvo hembiapo kuére, ohecha iporãha.

He’i Tupã Ñandejára: “Ta heñói yvýgui ka’avo ha’ỹiva ha yvyra hi’áva, hyepýpe ha’ỹiva, heñói ha hi’a haguã yvy tuichakue.” Ha oiko ha’e he’i haguéicha. Ha upéicha, yvýgui heñói opaichagua ka’avo ha yvyra, ha Tupã Ñandejára oma’ẽvo hembiapo kuére ohecha iporãha. Upéicha ohasa ára mbohapyha.

Upérõ Tupã Ñandejára he’i: “Toĩ mba’e rendy yvágape ohesape haguã yvy ha oipe’a haguã ára pyharégui, ha avei ohechauka haguã araka’épa oñepyrũ ára, áño, ñemitỹ ha koga’a oñemono’õha ára.” Ha oiko ha’e he’i haguéicha.

Tupã Ñandejára ojapo mokõi mba’e rendy guasu: upe tuichavéva, kuarahy, ohesape haguã arakue, ha upe michĩvéva, jasy, ohesape haguã pyharekue. Ojapo avei mbyja kuéra. Omoĩ umi mba’e rendy yvágape ohesape haguã yvy arakue ha pyharekue, ha omoambue haguã ojuehegui hesakãva ha iñypytũva. Ha oma’ẽvo hembiapo kuére ohecha iporãha. Upéicha ohasa ára irundyha.

Tupã Ñandejára Ñe’ẽ

SALMO ÑEMBOHOVÁI  103, 1-2a. 5-7. 10. 12. 24. 35c

R. Amomba’e guasu Tupä Ñandejárape che py’a ite guive.

Amomba’e guasu Tupä Ñandejárape che py’a ite guive.

Nde tuicha ite niko Tupã che Jára, remimbi ha rejajaipa ha mba’e rendýpe reñeñuã.

Nde remopyenda va’ekue yvy ani haguã oku’e araka’eve. R.

Y guasúpe ahojáicha reñuãmba ko yvy, yvyty jepe ojaho’ipa va’ekue;

ñúre yvúgui y remotororõha yvyty pa’ũ rupi osyry. R.

Nde reguenohë yvu umi ñuha rupi ha osyry pe y yvyty pa’ü rupi.

Ysyry rembe’ýre guyra kuéra ojaitypo ha yvyra rakãre ohenduka ipurahéi. R.

Ore Jára, heta ite mba’e niko rejapo. Nde katupyrýgui umíva rejapo.

Ko yvy henyhẽ ne rembiapokuégui. Amomba’e guasu Tupä Ñandejárape che py’a ite guive. R.

ALELUIA         Cf. Mt 4, 23

Aleluia.

Ñandejára Jesucristo omombe’u va’ekue Marandu porä Sambyhy rehegua ha omonguera hasývape opaichagua tapichápe.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha.                           6, 53-56

Upe ramo ohasa hikuái pe y mboypýri ha oguahẽ Genesaret yvýpe ha upépe ojokua ikanóa y rembe’ýpe.

Oguejývo hikuái pe kanóagui ha umi upepegua oikuaávo Jesús hague pe oguahẽva, omomaranduka ijerekuévo, ha ogueru hikuái hendápe opa umi hasýva.

Oho hikuái opa rupi ha ojegueru Jesús rendápe umi hasýva hupa reheve. Ha mamo ha’e oikehápe, taha’e táva, taha’e óga térã ñu rupi, omoĩ hikuái umi hasývape tapépe, ha ojerure ichupe hikuái opokomínte haguã ijao rembe’yrénte jepe. Ha opokóva guive hese, okuera.

Ñandejára Jesucristo Ñe’ẽ