LECTURAS: MARTES 5º DURANTE EL AÑO

LECTURAS: MARTES 5º DURANTE EL AÑO

Ko’ágã   ñahendúta Tupã Ñandejára ñe’ẽ Génesis arandukápe oĩ háicha   1, 20 – 2, 4a

Tupã Ñandejára he’i: “Y ta henyhẽ opaichagua mba’e oikovévagui ha to veve guyra árare.” Ha oiko ha’e he’i haguéicha. Tupã Ñandejára ojapo umi tymba ñarõ ha hetave mba’e ho’ytáva ipype ha opaichagua guyra. Ha oma’ẽvo hembiapo kuére ohecha iporãha. Ohovasa ichupe kuéra he’ívo:

“Peñe moña ha pemoenyhẽ y aty guasu.” He’i avei guyrakuérape oñemboheta haguã. Upéicha ohasa ára 5ha.

Tupã Ñandejára he’i: “To ñemoña yvy apére opaichagua tymba: mymbáva, hyére otyryrýva ha hesaitéva, michĩva ha tuicháva.” Ha oiko ha’e he’i haguéicha. Tupã Ñandejára oma’ẽ hembiapo kuére ha ojuhu iporãha.

Tupã Ñandejára he’i: “Jajapo ko’ágä   yvypóra ñandéicha, ta ñande jogua ha to guereko ipoguýpe pira ypegua, guyra árare ovevéva ha opaichagua tymba: mymbáva, hyére otyryrýva ha hesaitéva, michĩva ha tuicháva opaichagua.” Ha oiko ha’e he’i haguéicha.

Ha Tupã Ñandejára ojapo yvypóra, ha’éicha, ojoguáva ichupe ojapo, kuimba’e ha kuñáva ojapo.

Ha Tupã Ñandejára ohovasa ichupekuéra ha he’i: “Pende ra’y kena ta heta, ta isarambi yvy tuichakue ha to guereko ipoguýpe pira, guyra, tymba kuéra ha opaichagua yvýre otyryrýva.” Upéi he’i ichupe kuéra: “Yvy ári amoĩ opaichagua mba’e ra’ỹi ha yva pe’u haguã. Opa tymba, guyra ha hyére otyryrývape ame’ẽ hembi’urã ka’avo rovyũ”. Ha oiko ha’e he’i haguéicha. Tupã Ñandejára oma’ẽ opa mba’e ojapo va’ekuére ha ojuhu iporã etereiha. Upéicha ohasa ára 6ha.

Ha upéicha ojejapo yvága ha yvy ha Opa itemba’e oĩva ipype. Ára 7hápe Tupã Ñandejára omoguahẽ hu’ãme hembiapo, opytu’u, ohovasa ha omboarete upe ára opytu’u haguére opa hembiapógui. Upéicha va’ekue ojejapo ramo guare yvy ha yvága.

Tupã Ñandejára ojapo ramo guare opa mba’e.

Tupã Ñandejára Ñe’ẽ.

SALMO ÑEMBOHOVÁI      8, 4-9

Opavave: Tupã Ñandejára, porãme nda’ijojahái Nde Réra ha ne rembiapokue

Amaña ramo yvágare upe ne rembiapokuére, jasy ha mbyjakuérare hendápe remoĩ va’ekue,

ha’e che jupe: máva piko yvypóra, ne mandu’a haguã hese? O.

Michĩ remomichĩve tekove yvágape guágui,

ha yvate ichupe rehupi ha rembotuicha, mburuvicha ramo remoĩ ichupe ne rembiapokue ári,

opa mba’e ipo guýpe remoĩ: O.

Ovecha ha guéikuéra, ha opa tymba saite, guyrakuéra yvágare ovevéva,

pira ha opa umi mba’e ýpe oikóva. O.

ALELUIA Sal 118, 36. 29b

Aleluia.

Emboguejy che korasõ nde apoukapýre ha eme’ë chéve temime’ë aikuaa haguä nde rembipota.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha  7, 1-13

Upe ramo oñemboja Jesús rendápe umi fariséo ha Moisés rembiapoukapy mbo’eha ou va’ekue Jerusaléngui. Ko’ãva, ohechávo oĩha Jesús remimbo’ekuérava okarúva po ky’a reheve, he’ise ojepohei’ỹre, oñe’ẽ vai hese kuéra.

 (Fariséokuéra ha judíokuérava niko, ojapóvo ijypy kuéra ñe’ẽ, ndokarúiva ojepohéi porã’ỹre. Ha ojevývo ñemuhágui, ndokarúi ojapo’ýre umi mba’e ñemopotĩ rehegua. Ha oguereko avei heta ijapopyrã: ojejohéi va’erã mbayru ojevy’uha, y ryru, tembiporu mba’e veraguigua, tupa ha mba’e).

Upévare fariséo ha Moisés rembiapoukapy mbo’eha oporandu ichupe: Mba’ére piko umi ne remimbo’e ndojapói hekópe umi mba’e ñande ypykue ñande reko mbo’e va’ekue, ha okaru ipo potĩ’ỹre?

Jesús he’i ichupe kuéra: He’i porã va’ekue maranduhára Isaías umi peẽichagua hova mokõivare, ohai ramo guare: “Ko’ãva ijurúpente che momba’e, ipy’apy katu mombyry oĩ che hegui.

Reíko che momba’e guasu hikuái, ombo’égui che rembiapoukapýrõ mba’e ha’e kuérante omoĩva ojejapo haguã.”

Peẽ niko pemboyke Tupã Ñandejára rembiapoukapy pejapo haguã yvypóra ñe’ẽ.

He’i avei ichupe kuéra: Peẽ pejepokuaa háichante pejapo, ha ndapejapói hekópe Tupã Ñandejára rembiapoukapy. Moisés niko he’i va’ekue: “Emomba’e nde ru ha nde sýpe” ha “Pe ojahéiva itúva térã isýre, tojejuka”.

Peẽ katu peje oimeraẽva ikatuha he’i itúva térã isýpe: ‘Ndaikatúi mo’ãi roipytyvõ, opa mba’e arekóva niko korván’ (he’iséva: “oñemboykéva Tupã Ñandejárape”), ha péicha he’i haguérente, ikatúma noipytyvõvéi isy ha itúva. Ha péicha, peẽ pemboyke Tupã Ñandejára rembiapoukapy pejapo haguã peẽ pejepokuaa háichante. Ha hetave peichaguáva pejapo.

Ñandejára Jesucristo Ñe’ẽ