LECTURAS: MIÉRCOLES 5º DURANTE EL AÑO

LECTURAS: MIÉRCOLES 5º DURANTE EL AÑO

Ko’ágã  ñahendúta Tupã Ñandejára ñe’ẽ Génesis arandukápe oĩ háicha  2, 4b-9. 15-17

Tupã Ñandejára ojapo ramo guare opa mba’e ndaipóri va’ekue gueteri mba’eveichagua yvyra ra’y ha naheñóiri mba’eve yvy ári, nomongýigui ha ndaipórigui avei avave omba’apóva yvýre. Yvy guýgui katu osẽ yvu omohe’õva yvy ape. Upérõ Tupã Ñandejára ojapo ñai’ũgui kuimba’e ha oipeju itĩnguápe ipytu oporomoingovéva. Ha upe kuimba’e oñepyrũ oikove.

Upéi Tupã Ñandejára oñotỹ peteĩ yvaty Edénpe, opytáva Israélgui kuarahy resẽ gotyo. Ha upépe omoĩ upe kuimba’e ha’e ojapo va’ekuépe. Omoheñói upépe opaichagua yva neporãva ha hi’a héva, ha omoĩ upe yvyraty mbytépe yva oporomoingovéva ha ambue oporohesape’áva iporã ha ivaívare.

Tupã Ñandejára omoĩ kuimba’épe Edénpe omba’apo ha oñangareko haguã hese, ha he’i ichupe: “Ikatu re’u opaichagua yva ko’apegua. Upe yva oikuaaukáva iporã ha ivaíva katu, nahániri. Cháke upéva re’uha ára, remanóta”.

Tupã Ñandejára Ñe’ẽ

SALMO ÑEMBOHOVÁI         103, 1-2a. 27-30

Opavave: Amomba’e guasu Tupä Ñandejárape che py’aite guive

Amomba’e guasu Tupä Ñandejárape che py’a ite guive.

Nde tuicha ite niko Tupã che Jára, reñemonde remimbi ha rejajaipa,

ha mba’e rendýpe reñeñuã. O.

Óga pepóicha reipyso yvága opa ko’ãva nde rehe ojepoka hembi’urã hi’árape

ichupe kuéra reme’ẽ haguã.

Reme’ẽ ha ogueraha, nde po jerágui ha’e kuéra hyvatã. O.

Nde rova reñomi ramo ha’ekuéra oñemondýi, ipytu rejoko ramo omanomba, ha yvýpe jevýnte oho opa.

Nde pytúpe umíva rejapo, ha ko yvy ári opa mba’e rembopyahu. O.

ALELUIA   Cf. Jn 17,. 17ba

Aleluia.

Ne Ñe’ẽ Tupã Ñandejára añetegua ore momarangatu pe añeteguápe.

Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Marcos omombe’u háicha 7, 14-23

Upe ramo guaare Ñandejára ohenói opavavépe ha he’i: Pe che rendúke opavave, peikuaa haguã. Mba’eve okáguio oikéva ndaikatúi ñane mongy’ávo. Pe ñande py’apýgui osẽvante pe ñane mongy’áva. Peẽ pende apysáva, pehendu.

Jesús oheja rire ichupe kuéra ha oike hógape, hemimbo’e kuéra oporandu ichupe ko ombo’e va’ekuére, Ha’e he’i ichupekuéra:

Nda peikuaái nga’u piko mba’eve oikéva ñande juru rupi ndaikatuiha ñane mongy’ávo? Ndoikéi niko ñande py’apýpe, ñande ryépente, upéi osẽ jevy haguã ñande retégui.

Upéicha he’ívo he’ise opaichagua tembi’u ipotĩha. He’i avei: Pe osẽva ñande hegui, upéva hína pe ñane mongy’áva. Ñande py’apýgui niko osẽ mba’e ivaíva, jejuka, ñemoakãratĩ, teko vai, monda, japu, ha ñe’ẽ rei ñande rapicháre. Opa ko’ã mba’e vai osẽ ñande py’apýgui ha ñane mongy’a.

Ñandejára Jesucristo Ñe’ẽ