LECTURAS DOMINGO 6º TIEMPO DURANTE EL AÑO

LECTURAS DOMINGO 6º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha 17,5-8

Tupã he’i: “Tojeharu pe ojeíva che hegui ipy’apýpe, ojeroviáva yvypórakuéra rehe ha hesekuéra ojekóva. Ha’éta javoráicha yvy ojeiko’ỹháme, hese avave oñangareko’ỹva.

Ita pa’ũme okakuaáva, ha jukyty avave oiko’ỹha rupi. Ha ovy’a iténepa upe che rehe ojeroviáva, ojekóva che rehe! Ha’éta yvyráicha ysyry rembe’ýpe oñeñotỹva, hapo ysyry gotyo ojepyso, ha ndo kyhyjéi ára hakúgui, hakã hetaitereígui. Ndokyvéi are ramo ndojepy’apýi, hi’a’ỹre ndoikóiva araka’eve.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 1, 1-4. 6.

Opavave: Ovy’a umi omoĩva Ñandejára pope ijerovia.

Ovy’a umi ojapo’ỹva iñañáva ñe’ẽ, oiko’ỹva iñangaipáva ndive,
ojehe’a’ỹva umi Tupã rehe oñembohorývare.
Tupã rembiapoukapy ipy’a ombohory,
ha hese ojepy’a mongeta ára ha pyhare. O.

Ojogua ku yvyra mátape oñeñotỹva y rembe’ýpe,
hi’áva hi’árape, ha nda hoguekúiva.
Opa mba’e ojapóva osẽ porã ichupe. O.

Ndaupéichai umi hembiapo vaíva,
kapi’i pirukuéicha umívape yvytu omboveve.
Tupã oñangareko imarangatúva rape rehe.
Hembiapo vaíva rape katu opa vai. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Corinto guápe 15, 12. 16-20

Che pehengue kuéra: Ro’e ramo Cristo oikove jevy hague, mba’e rehe oime he’íva omanóva ndoikove jevy veimaha?
Umi omanóva ndoikove jevy véimarõ, he’ise Cristo ndoikove jeýi hague. Ha Cristo ndoikove jeýi rire, pe peroviáva nda ha’éi mba’eve. Ha peiko gueteri angaipápe.

Upéicha ramo, oñehundíma avei umi Cristo reroviaha omano va’ekue. Opa ñaha’arõva Crístogui ko yvy ári guarãnte ramo, ñande, aipo ramo, opa yvypóra apytépe umi ohasa asyvéva.

Añetehápe katu, Cristo oikove jevy. Ha’e niko koga’a oñemono’õ tenondéva. Pe tenonde oikove jevy va’ekue.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Lc 6, 23ab
Aleluia.
Tapevy’a heta, tapenerenyhẽ torýgui ko árape, peẽme niko oñeme’ẽta peteĩ jopói nde tuicháva yvágape.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 6, 12-13. 17. 20-26
Opavave: Romomba’e guasu ndéve, Ñandejára.

Umíva umi árape, Jesús ojupi peteĩ sérro ru’ãme oñembo’e haguã. Ha pyhare pukukue opyta upépe. Ko’ẽ rire ohenói umi idisípulope hendápe, ha oiporavo Umívape ohenói apóstol.

Upéi Jesús oguejy idisípulokuéra ndive pe sérrogui, ha opyta hikuái ñúme. Oñembyatypa ra’e upépe umi hapykuéri oikóva. Heta avei oĩ oúva Judéagui, Jerusalén, Tiro ha Sidóngui.

Jesús oma’ẽ porã idisípulo kuérare ha he’i chupe kuéra: – Pevy’a va’erã peẽ pene mboriahúva, pene mba’erã niko Ñandejára Réino. Pevy’a va’erã peẽ ko’ágã pene ñembyahýiva, peẽme hembypáne pe’u va’erã. Pevy’a vaerã peẽ ko’ágã pene rasẽva, upéi vy’apópe peikóne.

Ñandejára pende rovasa va’erã ágã oimérõ pende rehe nda’ija’éiva, pene mosẽva, pende ja’óva ha ojeguarúva pendehegui pejapógui che ha’éva peẽme.Péicha voi pende rukuéra ypykue ojapo vaekue profétakuérare. Ágã péicha ojehu vove peẽme, tuicha pevy’a aipórõ, ha ta penerenyhẽ torýgui. Peẽme niko oñeme’ẽta hína jopói nde tuicháva yvágape.

Peẽ pene mba’e retáva katu pejererekóke, cháke hetáma peiko porã. Pejererekóke peẽ ko’ágã pene ryvãtãva, cháke tuicha pene ñembyahýi va’erã ágã. Pejererekóke peẽ ko’ágã pepukáva, cháke pene rasẽ ha pejahe’óne ñembyasýgui.

Pejererekóke peẽ maymáva pende rerohory ramo. Pende ru kuéra ypykue niko yma péicha avei ojapo va’ekue proféta japu kuérare.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.