Ñahendu Jesús Ñe’ẽ. Jueves 7º Tiempo Durante el Año

Escucha el evangelio y la reflexión en: https://youtu.be/nV-9aADP0uc

JUEVES 7º Durante el Año San Marcos 9, 41-50

Jesús he’i idisípulokuérape: – Oimeraẽva ome’ẽva peẽme ymínte jepe, chendive peiko haguére, añete ha’e peẽme ndopyta mo’ãiha hekovia’ỹre chupe

Oimeraẽ oitýva pekádope umi michĩvéva jepe che rehe ojeroviávape, iporãve va’erã upévape oñapytĩ ita ijajúrare ha ojeity ýpe. Ha peichahágui nde po nde reitýtarõ pekádope, eikytĩ.

Iporãve niko reikove Ñandejára ndive nde po peteĩ reheve, ha ani nde po mokõive reheve reho Aña retãme, tata ogue’ỹháme. Ha nde py nde reitýtarõ pekádope, eikytĩ.

Iporãve vaerã niko reikovérõ nde py peteĩ reheve, reho rangue Aña retãme nde py mokõive reheve. Ha nde resa nde reitýtarõ pekádope, emombu. Iporãve vaerã niko reike Ñandejára Réinope nde resa peteĩ reheve, reho rangue Aña retãme nde resa mokõi reheve.

Cháke upépe umi yso nomanói ha tata araka’eve ndogue mo’ãi. Maymáva rekove niko tatápe ojovere vaerã ipotĩ haguã, térã oñembojuky vaerã ani haguã oñembyai. Juky niko iporã.

Nahe’ẽvéi vove katu niko ndaikatúi ñamohe’ẽ jey. Na’iporã véima mba’everã. Aipórõ, peikóke ku juky omohe’ẽrõ guáicha pende rekovépe. Péicharõ peikóta py’aguapýpe oñondive.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Heta hendápe oñemomba’apo asy mitãme kakuaáramo guáicha ha ñahendu avei ojereko vaíramo ha oñenupã asýramo mitãme. Oime katu avei ombotavyva mitã ha mitãkuñarusu hendape’ỹva ojapo haguã hese. Prostitución ha pornografía infantil, oje’éva.

Mitã niko ikangy ha ndaipu’akái kakuaáre ojehekýi haguã ichugui. Jesús he’i ivai etereiha umi mba’e hendape’ỹ ojejapóva mitãre ha umi ikangyve ha imboriahúva rehe. Péicha ojapóva tuicha oñenupãta he’i.

Umi oiporu vaíva ikangyvévape, ojapoukáva ichupe kuéra tie’ỹ, ojavykýva hete ha oiporúva mitãme tembiapo ky’a ojapo haguã, umíva ombyaty tata iñakã ári, he’i Ñandejára.

Opavave ñande niko, che irũ ha nde che reindy, jareko avei ñande pype tie’ỹ, pochy ha mba’e vai pota. Umíva ouvove ñane akame ñambo’yke ha ñambohasánte va’erã.

Ñañeha’ã ñahakã trosa ha jahape joko voi katu. Ani ñanembotyryry ha ñanemoinge javorái kuápe. Upépe jaikéramo heta jaiko vaerã jakuera haguã jakái rire hatápe. Ñandejára po mante ikatu ñande pe’a umíchagua Aña kuárape ja’a jepéramo.

Pa’i Alberto Luna.