Ñahendu Jesús Ñe’ẽ. Miércoles 7º Tiempo Durante el Año

Escucha el evangelio y la reflexión en: https://youtu.be/eYrj8m895VQ?si=w6PNkPT6_hJs4Siu

Miércoles 7º Durante el Año San Marcos 9, 38-40

Upérõ Juan he’i Jesúspe: — Mbo’ehára, rohecha niko kuri peteĩ omosẽva demóño nde rérape. Roho chupe ha rojoko, ndaha’éigui ñande apytepegua.

Jesús he’i: — Ani pejoko. Milágro ojapóva che rérape niko ndikatúi oñe’ẽ vai che rehe.

Umi opu’ã’ỹva ñande rehe niko oĩ ñane ndive. Pe oñemoĩ’ỹva ñande rehe niko oĩ ñane ndive.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñembojaruhápe he’i lo mitã, pa’i oñembo’e jave oiporu etereiha “orémo” ha ndaiporiha “peẽmo”. Ha upévako oiko meme avei ñande apytépe. Pe ore kuéte ojeporu mante oñemboyke haguã hetápe, nda’ijáiva ndaha’éigui ñandéicha guáva.

Juan ndaje ou Jesús rendápe omombe’u ichupe oĩha oñembo’éva ha oporomongueráva hérape, ndaha’éiva ijapytepegua. Oimo’ã ha’e Jesús he’itaha ojejoko haguã, oimo’ã Jesús he’íta péva “orekueténte” rojapo va’erã. Ha Jesús he’i ani haguã ojoko.

Oheja haguã ndaha’éiramo jepe hendive oikóva, ndaha’éiramo jepe hese guáva. Péva ñanembo’e ñandéve upe Ñandejára grásia omba’apo ha oñeme’ẽha opavavépe ndaha’éi ñande iglesia guávape año. Jesús rérape oñembo’éva, omoñe’ẽva Ñandejára ñe’ẽ, ha omopu’ãva hapichápe, upéva oĩ ñanendive, he’i Jesús.

Natekotevẽi ñambyai, jaiko vai térã ñande pochy ñande rapicha ndaha’éiva católico ndive. Jesús ñanembo’e umíva oĩha ñanendive ha ñande iglesia avei ñanembo’e tekotevẽha ñañeha’ã ñañemongeta, ñañembo’e ha ñamba’apo oñondive umi ñande rapicha cristianokuéra iglesia protestante ha iglesia evangélica guáva ndive.

Jesús niko oipota vaekue jaiko peteĩ ñe’ẽme ha py’a peteĩme opavave hese jajeroviáva. Ikatúnepa che reindy ha che irũ ñasẽ peteĩ tapépe ñande rapicha kuéra ndaha’éiva ñande iglesia guáva ndive. Térãpa jepi guáicha mombyrymíguinte ñama’ẽta ojuehe ha jajere ojuehegui. Mba’épa reñandu.

Pa’i Alberto Luna.