LECTURAS DOMINGO 8º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 27, 4-7

Remboguávo hu’itĩ opyta hevorakue, ha omombe’úva hemiandu, ohechauka ijejavykue. Tatakua ohechauka mba’eichaguápa tembiporu ñai’ũ, ha iñe’ẽ rehe pe máva ojekuaa. Hi’áre ojekuaa pe yvyra, ha iñe’ẽ rehe pe máva remiandu. Avavépe ani rerohory
rehendu mboyve ichupe, upe he’íva rehe niko pe mávape jaikuaa.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 92, 2-3. 13-16
Opavave: Ajépa iporãite reñemomba’eguasu ramo, ore Jára.

Ajépa iporãite reñemomba’eguasu ramo, ore Jára.
Ajépa iporãite nde réra ojereropurahéi ramo Tupã Yvatetegua.
Ne mborayhu aropurahéita pyhareve,
ha nde reko jeroviaha pyharekue. O.

Ku mbokaja ipotývaicha opu’ãta imarangatúva
ha tajýicha oikove pukúta.
Ojoguáta umi yvyra oñeñotỹva Tupä tupaópe
ha umi Ñandejára rogaguy rupi ipotývape. O.

Ituja rire jepe hi’áne ha akóinte imbarete ha hovyũ asýne.
Upéicha ohechaukáne Ñandejára, upe che rehe oñangarekóva,
heko jojaha ha ndaiporiha hese ja’e va’erã. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Corinto guápe 15, 51. 54-58

Che pehenguekuéra: Aipota peikuaa Tupã rembipota ñemi: Nañamanomba mo’ãiko. Opavave katu ñañembopyahúta. Ha ágã pe ñande reko ituju reíva oñembopyahu ramo, itujuve’ỹ haguã, ha pe ñande rete omano reíva oñembo pyahúma ramo omanove’ỹ haguã, oikóta pe Tupã Ñe’ẽ he’íva: “Manóme omokõ ñemanove’ỹ. ¿Ha, mano, mamópa oime nde popía?” Mano popía niko pe angaipa, ha angaipa ipu’aka tembiapoukapy rupi. Ha jarohory va’erã Tupãme, ome’ẽva ñandéve pu’aka Ñandejára Jesucrísto rupive.

Aipo ramo, che pehẽnguekuéra ahayhúva, pene mbaretéke ha ani pepyta tapépe. Ko’ẽ ko’ẽvévoke pemba’apove Tupãme guarã peẽ niko peikuaa, nda reiriha opa mba’e pejapóva joajúpe Ñandejára ndive.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Flp 2, 15d. 16a
Aleluia.
Ijapytépekuéra pemimbi peẽ mbyjaitáicha pyhare.
Peñemohatã kena pe marandu oporomoingovéva rehe.
Aleluia.

EVANGELIO

Marandu porã Ñandejára Jesucrísto rekove ha hemimbo’e San Lucas omombe’u háicha 6, 39-45

Opavave: Romomba’e guasu ndéve, Ñandejára.

Upérõ Jesús omombe’u idisípulo kuérape kóva ko káso: “Hesatũva nga’u piko ikatúne ogueraha ipógui hapicha resatũme. Nahániri aje. Mokõivéva ho’áne yvykuápe oñondive. Ndaipóri avave ikatúva tuichave imaéstrogui.Ojehekombo’e porã rire ae ikatúne ohupyty imbo’eharépe.

Mba’éicha piko aipo rehecha pe yvyra ku’i nde ryvy resápe oĩva, ha nderehechái pe yvyra poguasu kue tuja nde resápe oĩva. Ha nderehecháirõ pe nde resápe oĩva piko, mba’éicha nde py’a ere haguã nde ryvýpe: ‘Tanohẽna ndéve pe yvyra ku’i nde resápe oĩva’. Nde, tekove rova mokõi. Enohẽ raẽna pe yvyra poguasu kue tuja nde resápe oĩva rehecha porã haguã. Ágã upéi ikatúne renohẽ pe yvyra ku’i nde ryvy reságui.”

Yvyramáta porã niko ndaikatúi hi’a vaívo. Upéicha ave, ndaipóri yvyramáta vai hi’a porãva. Yvyra máta niko jaikuaa hi’áre. Ndajaipo’ói niko ígo jukérigui, térã úva ñana reígui.

Umi ipy’a porãva niko, mba’e iporãvante he’i. Ipy’apýpe voi imba’e porãgui. Umi heko añáva katu, ivaívante voi he’i. Ipy’apýpe voi oĩ
ivaíva. Ha upe ipy’apýpe oguerekóvagui, upévaguinte oñe’ẽ.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.