Ñahendu Jesús. Tupãsy ñemomarandu
25 marzo, 2022Ñahendu Jesús. Martes V de Cuaresma
5 abril, 2022
Escucha el evangelio y la reflexión en: https://youtu.be/gaLt4jlCcjE
Domingo 4º Cuaresma Lucas 15, 11 – 32
Upérõ Jesús omombe’u ko káso umi Moisés léi ombo’éva ha fariséo kuérape: Oiko va’ekue ndaje raka’e peteĩ karai ita’ýra mokõiva. Pe imitãvéva he’i itúvape: ”Eme’ẽmana chéve pe chéve otokáva.” Ha osẽ túva omboja’o ta’ýra kuérape opa oguerekóva. Nda’aréi ete rire, pe
imitãvéva ovendepa pe túva ome’ẽ vaekue chupe. Mombyry voi oho, tetã ambuépe.
Upépe oiko iñakãre, omombopa rei ipláta ojejoko’ỹre. Ohundipa oguerekóva ha oso. Upéi katu ou peteĩ ñembyahýi guasu pe tetãme, ha osẽ oheka hembiaporã, ha peteĩ karai omomba’apo chupe oñangareko haguã hymba kurére. Ha iñembyahýigui, hi’ãnteva chupe ho’u pe kure rembi’u.
Ipahápe ohechakuaa sapy’a ivýro hague. He’i ipy’apýpe: Mboy piko oime ógape omba’apóva ha hembypáva chupekuéra ho’u arã. Che katu ápe amano ñembyahýigui hína. Aha jeýta che ru rógape.” Ha opu’ã ha oho itúva rógape.
Mombyry guive, itúva ohecha sapy’a chupe, ha oñopũ chupe ikorasõ. Odipara osẽ ohuvãitĩvo, oañuã ha ohetũmba chupe. Ta’ýra he’i chupe: “Che ru, che rembiapo vai niko Ñandejára renondépe, ha ne ndive ave. Che niko ndaha’e véima nde ra’y”.
Túva katu he’i hembiguáikuérape: “Pya’e peru ao iporãvéva ha pemonde ko che ra’y. Peme’ẽ chupe kuãirũ ikuã rehe guarã ha sapatu ipy rehe guarã. Upéi katu pejuka kuv akara’y ikyravéva, ha javy’apa oñondive.
Upe aja katu, pe ta’ýra tuichavéva omba’apo hína ra’e ñúme. Ha oguãhẽvo ohenói peteĩ hembiguáipe ha oporandu: “Mba’éiko oiko”. He’i chupe: “Nde ryvy niko péina ou jeýma, ha hesãimba porã. Nde ru oime ojukayka kuri ku vakara’y ikyravéva.”
Upéva ohendúvo, pe tyke’ýra ipochy ha noguãhẽi hógape. Ha osẽ itúva he’i chupe oike haguã. Ha’e katu he’i itúvape: “Nde niko reikuaa porã mboy áñoma amba’apo hague ndéve ápe.
Opa mba’e eréva chéve niko ajapo. Ha araka’eve nereme’ẽiva chéve peteĩ kavara ra’ymínte jepe che irũ nguéra ndive rombichy haguã. Ha péina oguãhẽ sapy’a amo nde ra’y omombopa rei vaekue ipláta kuña rapykuéri, ha rejuka ku vakara’y ikyravéva.
Itúva katu he’i chupe: “Che ra’y, nde niko opa araite reiméva che ndive. Ha opa mba’e arekóva niko ne mba’énte voi. Mba’éicha piko aipo ndajavy’a mo’ãi. Nde ryvy niko omano va’ekue ha ko’ágã oikove jey, okañy va’ekue ha ko’ágã jajuhu jey.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Ipohýi eterei la che pecado. Anichéne Ñandejára che perdona. Ñahendu jepi oje’e. Ko káso Jesús omombe’úva rupi katu jahecha Ñandejára mborayhu tuichaveha ñande pecadogui. Taivai ivaiháicha, jahechakuaa ha ñambyasýramo, Ñandejára ñanembovevúi ha ñaneperdona.
ÑAÑEMBO’E OÑONDIVE
Ñandejára Jesucristo ejúva ehenói tapicha añáme, oreresape’ákena rohechakuaa ha rombyasývo ore rembiapo vaikue, roñandu haguã ne mborayhu tuichaitéva. Amén.
Pa’i Alberto Luna.