VIERNES SEGUNDO DE PASCUA

Ko’ágã ñahendúta Tupã Ñandejára ñe’ẽ Apóstol kuéra rembiapokuépe oĩ háicha  5, 34-42

Umi mburuvicha kuéra apytépe oĩ peteĩ fariséo hérava Gamaliel, Moisés rembiapoukapy mbo’eha ojerereko itereíva mba’érõ tetãgua apytépe. Kóva oñembo’y ha he’i oñerenohẽ haguã upégui sapy’a ite umi apóstol. Upéi he’i ambue mburuvicha kuérape: Israelgua, pema’ẽ porãke upe pejaposévare ko’ã kuimba’ére.

Pene mandu’áke nda aréi opu’ã hague Teudas, oñemomba’e guasu va’ekue ha omoirũ ichupe 400 kuimba’e rupi. Kóvape ojejuka ha iñirũ nguéra isarambipa ha opa rei. Upe rire, pe jepapa oikórõ guare, opu’ã Judas Galileagua, ha oĩ omoirũva ichupe. Ichupe avei ojejuka ha imoirũhare isarambipa. Ko’ágã ojehúvare, che añandu péicha: Pejeheja ko’ã kuimba’égui ha ani pejoko. Ko mba’e oúrõ yvypóraguinte opa reíta. Tupãgui ou ramo katu ndapejokói chéne, ha peñeñangarekóke, ani peñemoĩ hína Tupã Ñandejára rehe.

Ha’e kuéra ojapo upe ha’e he’íva. Ohenói jevy hikuái apóstol kuérape, oinupãuka ha he’i ichupe kuéra anive haguã oñe’ẽ Jesús rérape. Upéi opoi ichuguikuéra. Apóstolkuéra osẽvo mburuvicha kuéra rendágui ovy’a eterei Tupã Ñandejára  ombojerovia haguére ichupe kuéra, ohejávo ohasa asy hikuái Jesús rérare. Opa ára oporombo’e ha omoerakuã Jesús upe Mesías marandu porã, Tupaópe ha oga kuéra rupi avei.

Tupã Ñandejára Ñe’ẽ.

SALMO ÑEMBOHOVÁI 26, 1. 4. 13-14

Opavave: Ñandejára upe che rekove ohesapéva, ha upe che pytyvõva.

O bien:

Aleluia.

Ñandejára upe che rekove ohesapéva, ha upe che pytyvõva.

Mávagui piko akyhyjéta?

Tupã Ñandejára oñangareko che rehe,

Máva piko che mongyhyjéta? O.

Peteĩ mba’énte Ñandejárape ajerure, peteĩ mba’énte aipota.

Tupaópe aikose aikove aja pukukue,

hese ajepy’a mongeta haguã, ha’e che mbopy’a rory haguã,

ichupe amomba’e guasu haguã. O.

Aikuaa Ñandejára imba’e porãtaha che ndive aikove aja.

Pejerovia Tupã Ñandejára rehe.

Pende py’a guasúke ha ani pene ate’ỹ.

Añetehápe ha’e peẽme, pejerovia Tupã Ñandejára rehe. O.

ALELUIA Mt. 4, 4b

Aleluia.

Yvypóra kuéra ndoikovéi pe mbuja añóre

Tupã Ñandejára jurúgui osëva ñe’ẽgui uvei.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Juan omombe’u háicha Jn 6, 1-15

Upe ramo Jesús ohasa yguasu Galilea mboypýri, hérava avei Tiberíades. Heta oĩ ohóva hapykuéri, ohechágui ha’ekuéra umi mba’e hechapyrãva ojapóva Jesús omonguerávo hasývape. Ojupi Jesús ha oguapy peteĩ yvyty ru’ãme, ha hemimbo’ekuéra hendive. Hi’aguĩma upérõ Páskua, arete judíokuérape guarã. Jesús ohechávo hetaha umi hapykuéri ou va’ekue, he’i Felípepe: Moõgui piko jajoguáta tembi’u mayma ko’ãvape ñamongaru haguã?

He’ínte Jesús péicha, ohecha haguã mba’épa he’i Felipe. Jesús niko oikuaáma voi upe ojapótáva. Felipe he’i ichupe: Opavavépe ohupity haguã michímínte jepe niko ñaikotevẽ 200 pláta pehẽngue.

Upépe Andrés, Simón Pedro ryvy ha Jesús remimbo’éva avei, he’i Jesúspe:

Oime ápe peteĩ mitã’i oguerekóva 5 pan cebádagui ojejapóva ha mokõi pira. Umíva jepe niko ndohupity mo’ãi ñamongaru haguã opavavépe.

Jesús katu he’i: Peje opavavépe toguapy yvýpe.

Kapi’ipe porã niko upépe, ha opavave oguapypa. Umíva apytépe oĩ 5.000 kuimba’e rupi. Jesús ojapyhy ipópe umi pan, ha oñembo’e rire Tupãme, oipehe’ã opa umi oguapývape. Péicha avei ojapo pe pira reheve, ha ome’ẽ ichupe kuéra ho’useha peve. Hyguatãmba rire, Jesús he’i hemimbo’e kuérape:

Pemboaty umi hembýva, ani haguã oñehundi rei.

Omboaty hikuái ha omoenyhẽ  12 ajaka renyhẽ umi 5 pan rembyre reheve. Ha opavave ohechávo ko mba’e hechapyrãva Jesús ojapóva he’i: Kova hína pe maranduhára ou va’erãva yvy ári.

Jesús ohecha kuaávo mbaretépe oguerahaseha ichupe hikuái, omoingo haguã ichupe huvicha guasúrõ, osẽ jeýnte oho umi yvyty rupi.

Ñandejára Jesucristo Ñe’ẽ.