Ñahendu Jesús Ñe’ẽ. Lunes 4º Pascua

Escucha el evangelio y la reflexión en: https://youtu.be/-8SaBLxVgHI

LUNES 4º PASCUA Ciclo A  

   San Juan 10, 11 – 18

Upe ramo Jesús he’i: Chéko hína pe ovecha rerekua imba’e porãva. Pe ovecha rerekua imba’e porãva niko oĩ ome’ẽ haguãicha hekove ijovecháre. Umi plátare omba’apóva katu, ohechávo aguara guasu ouha ijovecha kuérape, odipara ha okañy. Péicha ojapo umi ovecha ndaha’éigui imba’e. Pe aguara guasu ojeity umi ovecha apytépe ha omosarambi opa rupi. Umi plátare omba’apóvape niko mba’evete chupe kuéra umi ovecha.

Chéko hína pe ovecha rerekua imba’e porãva. Che ru chéve che kuaaháicha, che aikuaa chupe. Péicha avei, che aikuaaháicha che ovecha, ha’e kuéra che kuaa chéve. Che aime ame’ẽ haguã che rekove hesekuéra. Oime jepéko areko avei ambue ovecha, ndaha’éiva kóva ko korapegua. Umíva avei niko ambyatypa vaerã, ha ha’e kuéra ohendúne che ñe’ẽ. Oupáne hikuái oiko peteĩ atýpente ha peteĩnte herekuáne.

Che ru che rayhu aimégui ame’ẽ haguã che rekove, upéi aikove jey haguã. Avave ndaikatúi oipe’a chehegui che rekove, upéva che ame’ẽva che jehegui. Che ñónte pe ikatúva ame’ẽ, ha chéve jeýnte ija aikove jey haguã. Péicha che ru he’i chéve ajapo haguã.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Pe mborayhu niko tuicha mba’e. Oiméramo jahayhúva añete jaheka ha ñame’ẽse voi chupe umi iporãvéva ikatúva jahupyty. Jahecháramo umi jahayhúva oĩ porã, upévantema ñandéve guarã. Ñande jajejopy imíramo jepe, mãrave ndoikói, jahecha guive ha’ekuéra hesãi, ovy’a ha opukavy.

Upéicha he’i Jesús ha’e ñande rayhuha ñandéve. Ome’ẽse ñandéve pe tekove añete ha opa mba’e porã. Ha oime voi ome’ẽvo hekove ñande rehehápe. Ha upéicha ñande jaikuaa ojapo hague añete, nombyasýi hague hekove omanóvo ñande rayhupápe. 

Ikatu ñande ñama’ẽ ñande jehe ha jahecha, ñaimépa ñande avei ñame’ẽ haguã añete ñande rekove umi jahayhúva rehe. Nañambyasymo’ãipa ñame’ẽva’ekue, ndajajerure mo’ãipa oñeme’ẽ jey ñandéve ñane rembiapo repykue.

Mborayhu añete noñeme’ẽi hepýre, noha’arõi oñemyengovia ichupe, ome’ẽnte ijehegui imba’e porãgui rei, ojerure’ỹre mba’eve ijupe guarã.

Pa’i Alberto Luna.