Ñahendu Hesu Ñe’ê. Domingo IV de Pascua

Escucha el evangelio y la reflexión en: https://youtu.be/Sabn2_yOzWI

DOMINGO IV de PASCUA Ciclo A

San Juan 10, 1-10

Upérõ Jesús he’i fariséokuérape: Añete ha’e peẽme, pe ojapyharáva kora ári oike haguã
ovecha kuéra oĩháme, upéva mondaha ha tekove aña hína.

Upe okẽ rupi oikéva katu, upéva hína pe ovecha rerekua oñangarekóva ijovecháre. Oime niko pe oipe’áva pe ovecha keha rokẽ pe ovecha rerekuápe. Oike ha’e, ha peteĩ-teĩme ohenói héra rupi, ha ha’e kuéra oikuaa iñe’ẽ. Oguenohẽ umi ovecha okápe, ha osẽmbávo katu, oho henonderã.

Umi ovecha oho hapykuéri oikuaágui iñe’ẽ. Oikuaa’ỹva rapykuéri katu ndohói. Okañymbáne uvei chugui, ndoikuaáigui iñe’ẽ.

Jesús omombe’u umi héntekuérape ko cáso, ha’ekuéra katu ndoikuaái mba’épa upe
he’iséva chupekuéra.

Jesús oñe’ẽve chupekuéra upe cásore: Añetehápe ha’e peẽme. Chéko hína pe okẽ umi
ovecha ohasaha rupi. Opa umi ou vaekue che mboyve niko mondaha ha tekove aña vaekue,
ha umi ovecha nohendúi vaekue chupe kuéra. Che hína upe okẽ. Che rupi oikéva ojesalváta. Ojoguáta umi ovechápe oike ha osẽva ikorágui ha ohóva ojuhu hembi’urã.

Mondaha niko ou omonda ha oporojuka, ha upéi ave ohundi haguã opa mba’e. Che katu aju peikove haguã, ha peikove haguã peikotevẽ’ỹre mba’eve.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Heta iterei ha opaichagua ñe’ẽ niko ñahendu opa rupi ha heta mba’e oikóvape ñañekonvida, heta mba’e repy upérupi oñekuave’ẽva oñemoĩ ñande resa renondépe. Umíva apytépe oime iporãva ha naiporãmbáiva, oime katu ivaíva ha ñanembyaíva. Sapy’ánte ko’ã mba’e ita ñahendúva apytépe ñakañy ha ñaneakãnga’u japyta, nahesakãmbái ñandéve mba’etépa umi ñande rerahátava tape porãre ha umi ñanembyaítava.

Ñahendu kuri Hesu oñembojoja peteĩ ovecha ñangarekoháre, ha umi ohendúva ichupe ha oikóva hapykuéri katu ombojoja ijovecháre. Umíva ñande hína, ñahendúva Hesu ñe’ẽ ha jaikóva jaguata hendive. Ñande nañakañýi ichugui, ha’e ñandekuaa peteĩ teĩme ha ñanerenói ñande réra rupi, ñanemboguata kapi’ipe porãre, ñande rapicha kuéra apytépe, jajeko haguãicha ojuehe ha ani haguã ñakañy ñane ño rei upérupi.

Oime avei ambue mondaha ñande pe’aséva ñande jára tee poguýgui, oúva ñanemongele’e, oñe’ẽva ñande apysápe ha ñande py’a rahaséva, pévako ñanemoha’eñose ijavorái kuápe upépe ipu’aka haguã ñande rehe. Sapy’ánte katu ñanemonguchu paite ha ñanembopyta ryrýi aña rymba kuéra. Tekotevẽko jajerure Hesúpe japyta haguã ijykére, tañanesãmbyhy ha’e ha ani haguã jaheja aña ojaitypo ñane korasõme.

Repillápa hína che irũ ha nde che reindy, mávapa hína umi mondaha nde py’a raháva ha ojetira mbaretevéva nde rehe nde pe’a haguãicha Ñandejára korágui.

Pa’i Alberto Luna.