LECTURAS DOMINGO QUINTO DE PASCUA

LECTURAS DOMINGO QUINTO DE PASCUA

LECTURA PETEÎHA:
Ko’ágã ñahendúta Tupã Ñandejára ñe’ẽ Apóstolkuéra arandukápe oĩ háicha 14, 21b-27

Pablo ha Bernabe ojevy Listra, Iconio ha Antioquíape. Ko’ã henda rupi omokyre’ỹ Jesús reroviahápe, oñemo ñe’ẽvo ichupekuéra oñemo hatã haguã ijeroviápe, he’ívo, jaike haguã Ñandejára remisãmbyhýpe jahasa asy heta va’erãha. Omoingo avei hikuái myakãhárakuéra peteĩ teĩ iglésiape, ha ojapo rire ñembo’e ha ajúno, oheja ichupe kuéra Ñandejára pópe, ha’e kuéra ojerovia háicha.

Ohasávo Pisidia rupi oguahẽ hikuái Panfíliape. Omyerakuã upe ñe’ẽ Pérgepe ha upéi oho Atalíape. Upépe ojupi várkope Antioquía gotyo, upégui oñemondo va’ekue tembiapo aporã ha oñemoĩ va’ekue ichupekuéra Ñandejára po guýpe. Oguahẽvo Antioquíape ombyaty upe iglésia ha omombe’u ichupekuéra opa mba’e Ñandejára ojapo va’ekue hendivekuéra, ha mba’éichapa Tupã oipe’a ra’e hokẽ Israelgua’ỹvape, ikatu haguã ha’ekuéra avei oguerovia.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 144, 8-13a

Opavave: Amomba’e guasúta Ñandejárape opa araite.
O bien: Aleluia

Ñandejára imba’e porã ha oporo poriahuvereko. Ha’e oporohayhu ha hasýpe ipochy,
opavavépe ha’e ohechakuaa, ha ohecha ramo opa hembiapokue. O.

Opa ne rembiapokue ta ne momba’e guasu Tupã, opa nde rehe ojeroviáva tanemomba’e guasu.
Ha’ekuéra tomyerakuã tuichaha upe ne retã, ha’ekuéra toikuaauka nde nembareteha. O.

Upéicha ramo maymáva oikuaáne ne mbareteha, ha upe ne retã tuichaha.
Ne retã niko mba’e opa’ỹva, ha nde reporosãmbyhýta opa araite. O.

LECTURA MOKÕIHA:
Ñahendúta Tupã Ñandejára Ñe’ẽ Apocalípsis arandukápe oĩ háicha 21, 1-5a

Che, Juan, ahecha peteï ára ipyahúva ha peteï yvy ipyahúva; pe ára tenonde guare ha pe yvy tenonde guare niko ndaipóri véima, ha upéicha avei pe yguasu. Ahecha pe táva marangatu, Jerusalén pyahu, oguejy pe yvágagui, Tupã renondégui.

Oñemonde tembirekorãicha oñemondéva imenarãme. Ha ahendu peteĩ ñe’ẽ hatã osẽva pe guapyhágui, ha he’íva: ko’ápe hína pe Tupã oikoha yvypórakuéra ndive. Oikovéta hendive kuéra ha ha’ekuéra itavagua marangatúta, ha Ñandejára voi oĩta hendivekuéra Itupã ramo.
Omokãta hesaykuéra, ndaipóri mo’ã véima ñemano, tasẽ, jahe’o ha mba’e mbyasy; opa oĩ va’ekue yma niko ndaipóri véima. Pe guapyhápe oĩva he’i: “Che ajapo pyahu jevy opa mba’e”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 13, 34
Aleluia.
Ko tembiapoukapy ipyahúva aheja peẽme: Pejoayhu kena. Ha che pohayhu haguéicha
pejoayhu avei peẽ. He’i Ñandejára.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha 13, 31-33a. 34-35
Opavave: Romomba’e guasu ndéve, Ñandejára.

Upe jave, Judas oho rire, Jesús he’i idisípulokuérape:— Péina oñemomba’e guasúma ko kuimba’e. Ha che rupi pehecháta Tupã oñemomba’e guasuha. Ha ikatúrõ ahechauka peẽme Tupã imba’e guasuha, ha’e avei ohechaukáta peẽme che mba’e guasuha. Ha voiete ojapóta.

Che ra’ykuéra, nda che are mo’ã véima pene ndive. Ko mandamiénto pyahu ahejáta peẽme. Pejoayhu kena. Che pohayhu haguéicha pejoayhu avei peẽ. Peẽ pejoayhu ramo, opavave ohecha kuaáta peẽ ha’eha che disípulo.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.