Ñahendu Jesús Ñe’ẽ. Domingo 5º Pascua

Escucha el evangelio y la reflexión en: https://youtu.be/HkWWXy4HnxE

Domingo 5º Pascua Ciclo C Juan 13, 31-33a. 34-35

Upe jave, Judas oho rire, Jesús he’i idisípulokuérape: — Péina oñemomba’e guasúma ko kuimba’e. Ha che rupi pehecháta Tupã oñemomba’e guasuha. Ha ikatúrõ ahechauka peẽme Tupã imba’e guasuha, ha’e avei ohechaukáta peẽme che mba’e guasuha. Ha voiete ojapóta. Che ra’ykuéra, nda che are mo’ã véima pene ndive.

Ko mandamiénto pyahu ahejáta peẽme. Pejoayhu kena. Che pohayhu haguéicha pejoayhu avei peẽ. Peẽ pejoayhu ramo, opavave ohecha kuaáta peẽ ha’eha che disípulo.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Jesús oiko jave niko tetã Israel ndorekói vaekue huvicha tee. Oĩ vaekue tetã Roma poguýpe, mbaretépe ou va’ekue omanda israelíta kuéra rehe ha opagauka impuesto pohýi onohẽva oraha mburuvicha Roma peguarã. Heta voi hetã rayhúva, “Selóte” oñembohérava, opu’ã jepe va’ekue ha oñorairõ omosẽ haguã Roma-yguápe.

Ndaipu’akáinte hese kuéra upe ára peve. Ha oime upe jave heta Jesús retãygua oha’arõva ou pe Mesias, Tupã remimbou omosẽtava Roma-yguápe ha omopu’ã jevýtava tetã Israel.

Umi Jesús apóstol apytépe jepe oime va’ekue avei umi selóte guáva, ha apóstolkuéra orovia voi Jesús ha’eha pe Mesías, omondohótava tetã Israel sã. Ha oha’arõ joa hikuái oguahẽ upéva upe ára Jesús oñembotuichataha. Oime voi ijapytépe oñemoĩséva mburuvicha ramo Jesús ykére ha’e ojupi vove omanda guasu.

Jesús katu ndoikéi upe tapépe. Noñemoĩri oñorairõ omosẽ haguãicha umi rrománo pe ha ojehekýi umi omoĩsévagui ichupe mburuvicha guasu ramo. Pe Jesús ñembotuicha ndaha’éi mburuvicha oñemoĩvaicha opavave akã ári mbaretépe. Jesús oñembotuicha iñe’ẽ rendúvo Tupãme, oñembotuicha oguejývo mborayhu pópe umi mboriahu ikangy ha oikotevẽva ykére, oservívo ichupe kuéra, ome’ẽ meve hekove. Upéicha ha’e oñembotuicha.

Péa ndogustapái mitã Judas pe. Ha’e oipota oiko Jesús gui mburuvicha guasu. Ha ohecháma ramo Jesús noñembotuicha mo’ãiha péicha, okái ha okañy ichugui. Ñama’ẽmína ñandéve guarãpa mba’e he’ise hína pe ñembotuicha. Ñama’ẽ avei oimépa ñande ñaha’arõ mburuvicha guasu mbaretépe oityvyróva ñane retã.

Oimépa ñaimo’ã tekotevẽha garróte púpe oñemosẽ mondaha kuéra ha oñemopotĩ ñane retã aña ky’águi. Moõpa opyta aipóramo pe mborayhu Jesús he’íva jahechauka va’erãha ojupe.

Ha mba’épa nde reñandu jajapo va’erãha ko ñane tiémpope ojekuaa haguã ñande ha’eha Jesús irũ. Mba’éicha ñamoañetéta upe mborayhu Jesús ñanembo’e va’ekue.

ÑAÑEMBO’E OÑONDIVE

Ñandejára Jesucristo, eñembotuicha va’ekue eme’ẽvo nde rekove. Ore mbo’emína roikuaa haguã ore avei mborayhu añete rape, roservívo ore rapichápe nde rejapo haguéicha. Amén.

Pa’i Alberto Luna.