Ñahendu Jesús Ñe’ẽ. Jueves 4º Pascua

Escucha el evangelio y la reflexión en: https://youtu.be/tfizWT9h-wU

JUEVES 4º PASCUA San Juan 13, 16 – 20

Arete Pascua mboyvemi Ñandejára ojohéi ipy idisípulokuérape, ha he’i chupe kuéra: Añetéko ha’e peẽme, pe tembiguái niko ndaikatúi tuichave ijáragui, ha ojejokuáiva niko michĩve ijokuaiharégui. Ko’ã mba’e pehecha kuaa ha pejapo ramo, Ñandejára pende rovasáta.

Che nañe’ẽi opa pende rehe. Aikuaa mávapa aiporavo va’ekue. Ojehu mante va’erã jepe niko Ñandejára Ñe’ẽme he’iháicha: “Pe che ndive okarúva, ojere che rehe”. Amombe’u hína peẽme ko’ã mba’e ojehu mboyve voi, péicha ágã ojehu vove perovia haguã cheha Tupã.
Añete ha’e peẽme. Upe omoguãhẽva umi che amondóvape, chéve che moguãhẽ hína. Ha chéve che moguãhẽva, omoguãhẽ avei che mbouharépe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Oime ramo ijarhélva ñande apytépe niko lo mitã he’i: “Kóva piko oñembou ñandéve térã oúnte ijehegui”. Péva he’ise hína oime ramo oñembou ha’e ndaikáusaiha.

“Mandado no es culpado”, he’i voi ningo ñe’ẽ. Pe omboúva chupe hína upe ojekausa va’erãva. Upéva hina la akã guasu ha la mba’e apoha. Ñahendu Jesús he’i umi apóstolkuérape ha’e oiporavo hague oikuaa porã hágui ojokuái haguã ichupekuéra. Ha opaichaguápe oiporavo ha ojokuái, ndaha’éi iporãva meme.

Ñandéve avei Jesús ñanerenói ha ñande jokuaise. Ha ñande avei opaichaguáva ñaime, ipy’a porãva ha ñaime avei umi nañanemansopáiva gueteri. Umi Jesús ohenóiva oamansa haguã ohóvo tapére.

Ha’e hína pe omanda guasúva ñande rehe, ha’e la ñande jokuáiva. Ha péva tekotevẽ jaikuaa porã hína ha jareko ñane akã ha ñande py’ápe. Ndaha’eiha ñande jehegui jaháva ja’e haguã ja’eséva térã jajapo haguã jajaposéva. Ahániri. Oime ramo upe ñande jokuáiva
jajapo vaerã oje’éva ñandéve jajapo haguã ha oje’éva ñandéve ñamombe’u haguã. Pe ojejokuáiva niko upéicha, iñe’ẽ rendu vaerã upe ichupe omboúvape.

Ha upéva ári ave Jesús he’i, umi hembijokuáipe nohendúiva, chupete voi nohendúiha. Ha umi nomoguahẽiva umi Jesús omondóvape, ichupe voi nomoguahẽi hína.

Tuichaite mba’e pe Ñandejára ñande poravo ha ojapo ñande hegui iñirũ ñamoherakuã haguã iñe’ẽ. Ñandejára ite voi ojevale ñande rehe, oñe’ẽ ñande juru rupi. Ha’ete voi oguahẽ ñande rehe ae mamo ñande jaha hápe hérape ha jajapo hápe tembiapo hérape.

Mba’etekópa che irũ ha nde che reindy. Mba’eichaitépa reñeñandu hína Jesús ndejokuái ha ojevale haguã nde rehe. Nde pyta ryrýi imípa térãpa nembyetia’e upe ñehenói. Pévako ndaha’éi hína peteĩ tembiapo nde jehegui reínte rejapótava. Ñandejára ko hína upe ojevalétava nde rehe ha ha’e, ipo rupi, ojapóta heta mba’e porã nde rekovemi rupive.

Pa’i Alberto Luna.