Ñahendu Hesu Ñe’ẽ. Martes IV de Pascua

Escucha el evangelio y la reflexión en: https://youtu.be/dO-spjGimX0

Martes IV de Pascua San Juan 10, 22 – 30

Upérõ oguãhẽ ára ro’y, ha Jesús oho Jerusalénpe tupao rehegua areterã. Ha oguata jave hína pe tupao jerére, okẽ hérava Salomón rupi, umi hudíokuéra oñembyaty ijerére ha oporandu chupe: — Araka’e pevéiko ore rerekóta pytũmbýpe. Emombe’u porãntemana oréve ndépa hína pe Mesías térãpa nahániri.

Jesús he’i chupekuéra: — Ha’éma vaekue niko peẽme, ha nda che reroviaséi. Umi mba’e che ajapóva, ajapo che ru ohejágui chéve, ha umíva ohechauka porã mávapa che. Peẽ katu ndaperoviái, peẽ ndaha’éigui che ovecha. Che ovechakuéra niko oikuaa che ñe’ẽ ha ou che
rapykuéri, ha che aikuaa chupekuéra.

Che ame’ẽ chupe kuéra tekove opa ára guarãva, ha ha’e kuéra noñehundi mo’ãi ha avave ndoipe’a mo’ãi chupekuéra chehegui. Upe che ru ome’ẽva chéve niko tuichave opaite mba’égui, ha avave ndaikatu mo’ãi oipe’a che pógui. Che ru ha che peteĩnte hína.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Hetaite ñe’ẽ ñahendu jaiko hárupi, ñande rógape, ñane irũ nguéra apytépe, kállepe, kánchape, rádio, téle, terere jerépe, ñamba’apo hápe. Ha upéi oĩve wasáp, féivu, celular ha mba’e, opaichagua mba’e jahecha ha ñahendu hápe. Ñande voi ningo ñane ño jave ñañe’ẽ
avei ñande py’ápe ñande jupe, ñapensa ha jakarkula ñande rekovére.

Hesu he’i ha’e oñe’ẽha avei ñandéve, ha ikatuha ñahendu iñe’ẽ jaiko hárupi. Ha’e oñe’ẽ ñandéve oipotágui iporã ñande rekove, ha umi ñe’ẽ ha’e he’íva ome’ẽtaha ñandéve vy’a ogue’ỹva. Ha mba’éichapa jaikuaáta Hesu ñe’ẽ? Mba’éicha jaikuaáta ndaha’eiha ambue ñe’ẽ? Mba’éicha jaikuaáta ndaha’eiha ñe’ẽ japu Hesu rérape oje’éva ñandéve?

Tenonderã jaikuaa Hesu noñe’ẽ mo’ãiha ñandéve ko’ágã oñe’ẽ haguéicha itiémpope, ha’e ningo noimevéima hetépe ymave guaréicha. Ko’ágã oñe’ẽ ñandéve Espíritu Santo rupive, oñeñanduka ñande rekovépe heta hendáicha.

Oime iñe’ẽ opytáva Biblia pe, oime ñande rapicha ojeroviáva hese omombe’úva ñandéve Hesu ñe’ẽ, ha oime upe ñande ñañandúva ñande py’ápe, ha’e oñandukáva ñandéve.

Ñande niko jaikuaa ñane irũ nguéra ñe’ẽ, jaikuaa ñande sósio ha ñande rógaguakuéra ñe’ẽ, jaikuaa jahayhúva ñe’ẽ, péva ndokañýi ñande hegui ayvu apytépe jepe, jaikuaa ha jajerovia umíva ñe’ẽ nañanembotavy mo’ãiha. Ha péicha avei ñañemoirũ ramo Hesúre, jahayhu ramo chupe, mbeguekatúpe ñahendu ha jaikuaa iñe’ẽ, japilla jahávo mávapa umi ñe’ẽ oúva ichugui, ha ñande reraháva tape porã rupi.

Rehechakuaápa hína che irũ ha nde che reindy, tekotevẽha eñembovakeáno ehovo eikuaa haguã upe Hesu he’íva ndéve oikóvo, ha’éko nerenói hína oikóvo, ha omombe’use ndeve umi mba’e ome’ẽtava ndéve vy’a ha py’aguapy añete.

Pa’i Alberto Luna.