Ñahendu Jesús Ñe’ẽ. Domingo 4º Pascua

Escucha el evangelio y la reflexión en: https://youtu.be/nNBJ80qAEzk?feature=shared

DOMINGO 4º PASCUA Ciclo C. Juan 10, 27 – 30

Upérõ Jesús he’i: Che ovechakuéra niko oikuaa che ñe’ẽ ha ou che rapykuéri, ha che aikuaa chupe kuéra. Che ame’ẽ chupekuéra tekove opa ára guarãva, ha ha’ekuéra noñehundi mo’ãi ha avave ndoipe’a mo’ãi chupekuéra chehegui. Upe che Ru ome’ẽva chéve niko tuichave opaite mba’égui, ha avave ndaikatu mo’ãi oipe’a che pógui. Che ru ha che peteĩnte hína.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Pe vaka ra’y hasẽ ramo ohenói haguã isy, ha’e mombyry guive oikuaa iñe’ẽ, oime ramo jepe heta vaka ra’y hasẽva apytépe nokañýi ichugui imemby. Ñande sy oikuaa ñane ne’ẽre mba’éichapa ñaime, ndaha’éi voi ñane rendúvante, ñane ñe’ẽ rupi ñane andu ha
ñande pillapa, ñande rováre oma’ẽvo ha’e oñandúma ñande py’a. Ha pe mitã ningo oñeme’ẽ isýpe, ojepoipaite ijyva ári, ipyti’ári, ha oke hese.

Oñandu isy ohayhúgui ichupe omongaru, omopotĩ, oipohano, omokunu’ũ ha omoñe’ẽmba. Pe mitã itavy ramo jepe noñeme’ẽi umi ndoikuaáivape, irari ichuguikuéra ha oheka isy.

Jesús he’i ñande ha’eha ijovecha. Ha’e katu upe oñangareko ha oma’ẽva ñande rehe. Oikuaa ñane ñe’ẽ ha nañakañýi ichugui. Ñama’ẽ vaerã niko che irũ ha nde che reindy, oimépa ñande ñahendu ha jaikuaa iñe’ẽ. Sapy’ánteko ñahendu etereígui ambue ñe’ẽ ha ayvu opaichaguáva okañy ñande hegui. Ndajaikuaavéi Jesús ñe’ẽ ha ñanetyre’ỹ ichugui.

Oiméko he’íva: che ajerovia Jesús re, ajerovia Ñandejára, Tupãsy ha santokuéra rehe, añembo’e ichupekuéra che añomi. Ha irari hapicha kuéra ijatývagui komunida, capilla ha parroquia pegui. Ha ñandépa oime ñañandu añete Jesús ñanembyatyha ikorápe, ha’éva ñande Iglesia, ñande komunida, ha upépe ñanembojereha ijehe ñane irũnguéra ndive, ñanesãmbyhy ha ñanerekombo’e ome’ẽvo ñandéve tekove añete.

Pe ryguasu kuru jepe ningo hakate’ỹ imembýre, ha ombohovái pochy oúvape opokose hesekuéra. Jesús he’i ha’e hakate’ỹha ijovechakuéra rehe, ha noñehundi mo’ãi ichugui he’i. Ndaipóri Satana oipe’a vaerãva ijovecha kuéra ipoguýgui, he’i, iTúva Tupã ome’ẽva ichupe oimégui opa mba’e ári. Ha pe Jesús hakate’ỹ ha oñangareko háicha iñirũnguéra rehe ha ñande rehe, upéicha avei ha’e ñanekonvida jaiko haguã ñande rapichakuéra reheve.

Ohenói voi katu hetápe oñangareko haguã ijovechakuéra rehe. Oimépa nde avei ereko nde ovechakuéra eñangareko ha ema’ẽva, emongaru ha eipohanóva. Emboguatápa ichupe kuéra mborayhu pópe Jesús ñanembo’e haguéicha. Ehechaukápa ichupe kuéra Ñandejára rape.

ÑAÑEMBO’E OÑONDIVE

Ñandejára Jesucristo, nde ore renóiva roñangareko ha rohekombo’e haguã nendive nde ovecha kuérape nde Iglésiape. Aníkena eheja rokañy nde hegui ha rojavy tape. Amén.

Pa’i Alberto Luna.