VIERNES QUINTO DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha    15, 22-31

Umi árape Apóstol ha moakãhárakuéra, ha upepegua umi iglésia, oñembopy’a peteĩ oiporavo haguã ijapyteguikuérava ha omondo ichupe kuéra Antioquíape, Pablo ha Bernabé ndive. Oiporavo Judáspe, hérava avei Barsabás ha Sílaspe, kuimba’ekuéra ojeapóva mba’érõ Jesús reroviaha apytépe, ha hendive kuéra omondo ko kuatiañe’ẽ: “Ore apóstol ha moakãhárakuéra pene pehẽnguéva, romomaitei umi ore pehẽngue Jesús reroviaha Israelgua’ỹvape, ha oikóva Antioquía, Siria ha Cilíciape. Roikuaa oĩ hague tapicha ohóva ko’águi ore ro’e’ỹre ichupekuéra, pene moangekói va’ekue iñe’ẽme ha pene mokañy.

Upévare roñemoĩ peteĩ ñe’ẽme roiporavo haguã ore apytégui umi oho va’erã pene rendápe, ore pehẽnguekuéra rohayhu etéva Bernabé ha Pablo ndive, omoĩ va’ekue hekove kyhyje’ỹre Ñandejára Jesucristo rehehápe.

Upéicha rupi romondo peẽme Judas ha Sílaspe. Ha’e kuéra oñe’ẽta pene ndive omoesakã haguã peẽme opa mba’e. Espíritu Santo ha ore rojuhu porã, noromoĩri haguã pende ári mba’eveichagua mba’e pohýi, ndaha’éirõ ko’ã mba’e tekotevẽva: Ani pe’u tymba ro’o oñekuave’ẽ va’ekue tupã gua’ukuérape, ani pe’u so’o huguy reheve térã tymba ojahoga va’ekue ro’o, ha ani pemenda hekope’ỹ. Pejejokórõ ko’ã mba’égui, pejapo porãta. Pomomaitei.”

Ha’ekuéra oporomomaitei rire, oho hikuái Antioquíape ha omboatývo umi Jesucristo reroviahápe, omoĩ ipópe kuéra pe kuatiañe’ẽ. Oñemoñe’ẽ rire upe kuatia, ovy’a eterei ombopy’a guapýgui ichupekuéra.

Tupã Ñandejára Ñe’ẽ.

SALMO ÑEMBOHOVÁI  56, 8-12

Opavave: Opaite tetã rupi romomba’e guasúta Ñandejárape.

O bien:

Aleluia.

Che py’a hatãma oñemopyenda Tupã Ñandejára.

Che py’a hatãma oñemopyenda. Che rogueropurahéita mba’epukuéra reheve:

¡epáy che ángami!. O.

¡Pepáyke avei árpa ha mbaraka, che ikatu haguã ko’ẽtĩ tamombáy!.

Opa ite tetã rupi romomba’e guasúta Tupã Ñandejára,

ha maymáva tetä mbytépe rogueropurahéita. O.

Ne mborayhu niko tuicha yvága peve oguahẽ,

nde reko jeroviaha katu araíre ojepyso.

¡Tupã Ñandejára, amo yvágare epu’ã,

ha opa yvy to hecha nde tuichakue!. O.

ALELUIA Jn 15, 15b

Aleluia.

Ñandejára Jesucristo he’i: “Che peẽme pohenói che irü,

aikuaauka haguére peëme opa mba’e che Rúgui ahendúva.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Juan omombe’u háicha 15, 12-17

Upe ramo guare ohasa mboyvemi Tupã Ñandejára ykére, Jesús he’i hemimbo’ekuérape: Kóva hína tembiapoukapy amoĩva peẽme: Pejoayhu che pohayhu háicha. Mborayhu tuichave oimeraẽ ikatúva oguereko, niko ome’ẽ ramo hekove iñirũre.

Peẽ niko che irũ hína, pejapo ramo upe ha’éva peẽme. Che nda’e véima pende rehe peẽ tembiguaiha, peteĩ tembiguái niko ndoikuaái mba’épa ijára ojapo.

Che poguereko che irũ ramo, aikuaaukágui peẽme opa mba’e che Ru he’i va’ekue chéve. Chéve, peẽ nda che poravói va’ekue, che uvei poiporavo va’ekue peẽme. Che pomondo pejapo haguã heta mba’e, mba’e opa rei’ỹva. Péicha, che Ru ome’ẽta peẽme opa mba’e ichupe pejeruréva che rérape. Kóicha aipo ramo ha’e peẽme: Pejoayhu kena.

Ñandejára Jesucristo Ñe’ẽ