DOMINGO SEXTO DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 15, 1-2. 22-29

Umi árape, umi oho va’ekue Judéagui Antioquíape, oñepyrũ ombo’e umi Jesús reroviaha judio’ỹvape, ndoñesirkunsidái ramo, Moisés he’i haguéicha ndaikatuiha ojesalva. Pablo ha Bernabé oñoñe’ẽ api mbarete hendivekuéra, ha ipahápe Pablo, Bernabé ha ambuekuérava ojeporavo oho haguã Jerusalénpe oñe’ẽvo ko mba’e rehe apóstolkuéra ha myakãhárakuéra upe Jesucrísto iglésia pegua ndive.

Apóstol ha myakãhárakuéra, ha upepegua umi iglésia, oñembopy’a peteĩ oiporavo haguã ijapytéguikuérava ha omondo ichupekuéra Antioquíape, Pablo ha Bernabé ndive. Oiporavo Judáspe, hérava avei Barsabás ha Sílaspe, kuimba’ekuéra ojeapóva mba’érõ Jesús reroviaha apytépe, ha hendivekuéra omondo ko kuatiañe’ẽ: “Ore apóstol ha myakãhárakuéra pene pehẽnguéva, romomaitei umi ore pehẽngue Jesús reroviaha Israelgua’ỹvape, ha oikóva Antioquía, Siria ha Cilíciape. Roikuaa oĩ hague tapicha ohóva ko’águi ore
ro’e’ỹre ichupe kuéra, pene myangekói va’ekue iñe’ẽme ha pene mokañy.

Upéva rehe roñemoĩ peteï ñe’ẽme roiporavo haguã ore apytégui umi oho va’erãva pene rendápe, ore pehẽnguekuéra rohayhu etéva Bernabé ha Pablo ndive, omoĩ va’ekue hekove kyhyje’ỹ rehe Ñandejára Jesucrísto rehehápe.

Upéicha rupi romondo peẽme Judas ha Sílaspe. Ha’e kuéra oñe’ẽta pene ndive omyesakã haguã peẽme opa mba’e. Espíritu Santo ha ore rojuhu porã, noromoĩri haguã pende ári mba’eveichagua mba’e pohýi, ndaha’éi ramo ko’ã mba’e tekotevẽva: Ani pe’u tymba ro’o oñekuave’ẽ va’ekue Tupã gua’u kuérape, ani pe’u so’o huguy reheve térã tymba ojahoga va’ekue ro’o, ha ani pemenda hekope’ỹ. Pejejokórõ ko’ã mba’égui, pejapo porãta. Pomomaitei”.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 66, 2-3. 5-6. 8

Opavave: ¡Ha Tupã! Maymáva tanemomba’e guasu.
O bien:
Aleluia
Ñandejára ta ñande poriahuvereko ha tañande rovasa,
toma’ẽ ñande rehe.
Tojekuaa opa rupi hembipota,
ha opa tetã rupi ha’e oporope’aha jejopy vaígui. O.

Opavave toaguyjeve me’ẽ ndéve
Topurahéi vy’a pópe tetã nguéra,
resaimbyhýgui opavave tekojojápe,
hekopete remboguata tetã nguéra yvy ári. O.

¡Ha Tupã! Maymáva tanemomba’e guasu,
tanemomba’e guasu maymáva.
Ñandejára ta ñande rovasa,
ha toñemomba’e ichupe ko yvy jerekuévo. O.

LECTURA MOKÕIHA:
Ñahendúta Tupã Ñandejára Ñe’ẽ Apocalípsis arandukápe oĩ háicha 21, 10-14. 22-23

Pe Espíritu che reraha peteĩ sérro tuicha ha ijyvatévape, ha ohechauka chéve pe táva guasu marangatu Jerusalén, oguejýva yvágagui, Tupã renondégui. Pe táva guasu overa Ñandejára mimbikuépe; pe ivera ha’ete ita veráicha, diamánteicha, hesakã cristálcha. Pe táva guasu jere rehe oĩ peteĩ korapy jere tuicha ha ijyvatéva, 12 hokẽva, ha peteĩ teĩ okẽme oĩ peteĩ Tupã remimbou.

Umi okẽ rehe ojehai umi 12 Israel ñemoñare aty réra. Mbohapy okẽ oma’ẽ kuarahy resẽ gotyo, mbohapy yvate gotyo, mbohapy yvy gotyo, ha mbohapy kuarahy reike gotyo. Pe táva guasu korapy yvate oguereko 12 ita ipyenda ramo, ojehai ha umi 12 ovecha ra’y apóstol réra.

Upe távape ndahechái Tupao, Ñandejára voi niko, Tupã ipu’akapáva, ha’e peteĩ Tupao, ha avei pe Ovecha Ra’y. Upe táva guasu noikotevẽi kuarahy ha jasýre ohesape va’erã ichupe, ohesapégui ichupe Ñandejára mimbikue, ha pe imba’e rendy katu pe Ovecha Ra’y.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 14, 23
Aleluia.
Jesús he’i ichupe: Pe che rayhúva ojapo che ha’éva ha che Ru ohayhúta ichupe.
Ha che Ru ndive rojúne roiko hendive.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Juan aranduka peteĩhápe omombe’u háicha 14, 23-29
Opavave: Romomba’e guasu ndéve, Ñandejára.

Upérõ Jesús he’i hemimbo’ekuérape: — Upe che rayhúva ojapo che ha’éva, ha che Ru ohayhúta chupe. Ha rojúne che Ru ndive ha roiko hendive. Pe che rayhu’ỹva katu niko ndojapói che ha’éva. Ko’ã mba’e ha’éva peẽme, ndaha’éi che jehegui reínte ha’éva peẽme. Che ru, che mbou vaekue ñe’ẽ hína ãva.

Ko’ã mba’e ha’e peẽme aime aja gueteri pene ndive. Espíritu Santo katu, pe che ru omboútava che rérape pene pytyvõ haguã, ha’e pene mbo’éta opa mba’e ha pene momandu’áta opa ko’ã mba’e ha’éva peẽme.

Py’a guapy niko aheja peẽme. Py’a guapy che arekóva ame’ẽ peẽme, ha name’ẽi yvypóra kuéra ome’ẽháicha. Ani pekyhyjétei térã pejepy’apy.

Pehendúma niko ha’e hague peẽme ahataha, ha upéi aju jeytaha aime haguã pene ndive. Che rayhu ramo añete, pevy’a vaerã peikuaávo ahataha che ru rendápe. Ha’e niko tuichave chehegui. Amombe’u hína peẽme ko’ã mba’e, ojehu mboyve. Péicharõ, ágã ojehu vove, perovia haguã ko’ã mba’e ha’éva peẽme.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.