LUNES UNDÉCIMA SEMANA

LUNES UNDÉCIMA SEMANA

Ko’ágã ñahendúta Tupã Ñandejára ñe’ẽ Reyes aranduka peteĩhápe oĩ háicha 21, 1-19

Umi ára ohasa ha peteĩ kuimba’e Jezreel pegua, hérava Nabot, oguereko iparralty upe távape, Samaría ruvicha guasu Ajab róga ykére. Peteĩ jevy Ajab he’i Nabótpe: Eme’ẽna chéve nde yvy añemitỹ haguã upépe, oĩ niko che róga ykére. Ame’ẽta ndéve hese rejeruréva.
Nabot katu he’i Ajábpe: Ndaikatúi niko ame’ẽ ndéve che ru yvykue.

Ajab oho hógape mba’e mbyasy ha pire vai reheve, upe he’i va’ekuére ichupe Nabot, he’i niko nome’ẽ mo’ãiha ichupe itúva yvykue. Oguahẽvo oñeno hupápe oma’ẽvo tápia rehe ha ndokaruséi. Upérõ hembireko Jezabel he’i ichupe: Mba’ére piko reñembyasy ha nde rekaruséi?

Ajab he’i: Nabot Jezreel guápe ha’e ome’ẽ haguã chéve iparralty, pe ha’e ojerurévare, ha nome’ẽséi chéve.

Upérõ hembireko Jezabel he’i ichupe: Na ndéi piko Israel ruvicha guasu? Epu’ã katu ekaru ha ani rejepy’apy! Che ame’ẽta ndéve Nabot parralty.

Upérõ ha’e ohai kuatiañe’ẽ Ajab rérape ha omoĩ hese mburuvicha guasu ra’anga ha omondo ikuatia moakãhára ha mburuvicha kuéra Nabot táva guápe. Ikuatia ñe’ẽme he’i: “Pemoerakuã jekaru’ỹ ha pemboguapy Nabótpe opavave renondépe.

Upéi pemboguapy henondépe mokõi mba’e renduhare japu, he’ítáva hese oñe’ẽ vai hague Tupã Ñandejára ha mburuvicha guasúre. Upéi penohẽ okápe ha pejuka pejapívo itápe.”

Umi Nabot táva pegua, moakãhára ha mburuvichakuéra, ojapo upe Jezabel he’íva ikuatiápe: Omoerakuã hikuái jekaru’ỹ ha omboguapy Nabótpe opavave renondépe. Upéi oguahẽ mokõi mba’e renduhare japu he’íva opavave rovake Nabot rehe, oñe’ẽ vai hague Tupã Ñandejára ha mburuvicha guasúre. Upérõ oguenohẽ hikuái ichupe táva rokápe ha ojuka ojapívo itápe.

Upéi he’iuka hikuái Jezabélpe Nabot ojejapi hague itápe ha omano hague.

Jezabel oikuaa vove, he’i Ajábpe: Tereho katu ha ereko ne mba’erã pe parralty Nabot nome’ẽséi va’ekue ndéve. Nabot omanóma. Ajab oikuaávo Nabot omano hague, oho ha oñemomba’e iparraltýre.

Tupã Ñandejára Ñe’ẽ.

SALMO ÑEMBOHOVÁI 5, 2-3a. 5-7

Opavave: Tupã Ñandejára, ehendu che pyahẽ ramo.

Tupã Ñandejára, ehendu che ñe’ẽ.
Ehendu che pyahẽ ramo, ha amoguahẽ ramo ndéve che rembijerure.
Tupã Ñandejára, che ruvicha guasu. O.

Tembiapo vai ne mbojeguaru, heko ky’áva ndaha’éi ne mbohupa.
Oñembotuicháva noñembo’ýi chéne ne renondépe. O.

Nde na nde a’éigui hembiapo vaívare, ha rehundi umi ijapúvape.
Oporojuka ha heko vaívape, Tupã Ñandejára ndohecha ramói. O.

ALELUIA Sal 118, 105

Aleluia.
Ne ñe’ẽ hína pe ohesapéva chéve aguata haguã peteĩ tesapeha che rapépe.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 5, 38-42

Upe ramo Jesús he’i hemimbo’ekuérape: Peikuaa oje’e hague: “Oimeraẽ ohesa mombúva ramo hapichápe, ichupe ojehesa mombu va’erã. Ohãi’o ramo hapichápe, ichupe oñehãi’o va’erã.”

Che katu ha’e peẽme: “Ani pemoengovia pe ivaíva ojapóvape pende rehe. Oĩ ramo nde rova petéva, eheja ta nde rova pete jovái. Oĩ ramo nde rerahaséva mbojovakehápe oipe’aségui ndehegui nde ao, eheja to gueraha nde ahoja avei. Oĩ ramo oguerojaukaséva ndéve imba’e pohýi 1 legua, eraha ichupe 2 legua.

Oimérõ omba’e jeruréva ndéve, eme’ẽ ichupe upe ojeruréva. Oĩ ramo omba’e poruséva, eiporuka ichupe.”

Ñandejára Jesucristo Ñe’ẽ