Ñahendu Jesús Ñe’ẽ. Jueves 11º Durante el Año

Escucha el evangelio y la reflexión en: https://youtu.be/SmM_UIS4gNc

Jueves 11º Durante el Año Mateo 6, 7 – 15

Upérõ Jesús he’i idisípulokuérape: Peñembo’e jave ani peñe’ẽ heta rei, ojapoháicha umi Ñandejárare ojerovia’ỹva. Ha’e kuéra niko oimo’ã oñe’ẽ heta haguére Ñandejára ohendutaha chupe kuéra. Ani péicha pejapo. Pende Ru niko oikuaapáma voi pene remikotevẽ, peẽ pejerure mboyve chupe. Peñembo’e jave, kóicha peñembo’e: Ore Ru yvágape reiméva, toñemomba’e nde réra.

Ne mborayhu ta ore añuãmba. Ne rembipota tojejapo yvy ári yvágape guáicha. Eme’ẽ oréve ore rembi’urã ko árape guarã. Eheja rei oréve ore pekádo, ore roheja reiháicha umi ore ndive iñañávape.

Aníkena rehejátei rojepy’a ra’ã. Ore pe’a uvei ivaívagui.

Peẽ peheja rei ramo umi pende rehe ojapo vaívape, pende Ru yvágape oĩva oheja reíta avei peẽme ivaíva pejapóva. Ndapehejaireíri ramo katu umi pende rehe ojapo vaívape, pende Ru oĩva yvágape ndoheja rei mo’ãi avei peẽme pende pekádo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Kóa ipukuve guaiguĩ ñembo’égui.” He’i lo mitã oime ramo ñande rapicha oñe’ẽ puku etereíva, ndopakuaavéi ha nomohu’ã kuaáiva iñe’ẽ. Jesús he’i natekotevẽi Ñandejárape ñañe’ẽ puku eterei ha ñambojo’a ñembo’e.

Ñandejára niko ha’e ñande ru ñande rayhúva. Ha upévare ikatu ñañemoĩ henondépe jerovia ha mborayhu reheve, jahejávo ipópe ñande rekove, ñane remikotevẽ, jaikuaa pype ha’e ome’ẽtaha ñandéve upe iporãvéva ñandéve guarã.

Upévare ñande ñahenói kóva ko ñembo’e Jesús oheja vaekue ñandéve, Padrenuestro, ha’eva Ore Ru. San Ignacio he’i ñañembo’e vove ñañe’ẽ va’erãha Ñandejára ndive.

Ñañemongeta hendive ñañe’ẽ háicha ñane irũ ndive, ñande jepokuaaha ndive. Natekotevẽi niko jaiporavo ñe’ẽ, ñambojegua térã ñañe’ẽ puku eterei ñane irũ ha ñande ru ndive ñañemongeta vove. Ha’ekuéra niko ñandekuaa porã ha oma’ẽvo ñande rehe opillapáma mba’épa ojehu ñandéve, mba’épa ñaikotevẽ, mba’épa jaipota. Maerã piko jajere tereíta ja’e haguã jaipotáva.

Mbohapy mba’e jajerure ko ñembo’épe Ñandejárape guarãva: Tenonderã ñamomba’e guasu haguã Ñandejárape, upéi katu tou ñandéve imborayhu, irréino, ha mbohapyha tojejapo ha’e oipotáva ñande rekovépe. Ha ñandéve guarã katu jajerure tenonderã ñane rembi’urã, upéi katu ñaneperdona haguã ñande pekádokuéra, ani haguã ja’a Aña ñuhãme, tentación pe. Ha ipahápe tañande pe’a opa mba’e vaígui, Aña poguýgui.

Ha ndépa mba’éicha reñembo’e che reindy ha nde che irũ. Reñe’ẽpa Ñandejára ndive. Emombe’úpa ichupe reñandúva. Térãpa Tupãsy ha santo kuérare ejevale. Ndete ihuísiova niko ikatu eñe’ẽ ha emombe’u ichupe nde py’ápe reñongatúva.

Pa’i Alberto Luna.