LECTURAS SÁBADO UNDÉCIMA SEMANA

LECTURAS SÁBADO UNDÉCIMA SEMANA

Ko’ágã ñahendúta Tupã Ñandejára ñe’ẽ Crónicas arandukápe oĩ háicha 24, 17-25

Omano rire Joiadá, mburuvichakuéra Judágua oho oñesũ mburuvicha guasu renondépe, ha ha’e ohendu ichupe kuéra. Ha’ekuéra ojei Tupã itúvakuéra ypykue tupãógui, ha oho oñesũ Astarté ha ambue tupã gua’u kuéra renondépe.

Upévare Tupã Ñandejára ipochy Judá ha Jerusalengua ndive. Opáichavo Tupä Ñandejára omondo imaranduhárakuéra ombojevy haguã ichupekuéra hape vaígui. Ha’ekuéra katu nohenduséi iñe’ẽ.

Upérõ Tupã Espíritu oñemomba’e Zacarías, pa’i Joiadá ra’yrére; ha’e oñembo’y peteĩ ijyvatehápe ha he’i opavavépe: “Péicha he’iuka Tupã Ñandejára: ‘Mba’érepa nda pejapói mba’evérõ che rembiapoukapy? Mba’érepa peheka pende jupe ivaíva? Peẽ che reja haguére, che avei pohejáta’”.

Ha’ekuéra katu oñemoĩmba hese, ha mburuvicha guasu he’ígui, ojapi hikuái ichupe itápe ojuka peve tupao rogaguýpe. Mburuvicha guasu Joás hesarái pa’i Joiadá, Zacarías ru, ohupi hague ichupe mburuvicha guasúrõ ha ojukauka ita’ýra Zacaríaspe; kóva omanonguévo osapukái: “Tupä Ñandejára to hecha kóva ha tomoengovia peẽme!”

Pe áño ñepyrũme siriagua ñorairõha aty ou oñorairõ haguã Joás ndive. Ondyry hikuái Judá ha Jerusalénre, ojuka opa mburuvichakuérape, omonda opa mba’e oĩva ha omondo Damascogua ruvicha guasúpe. Imbovy ramo jepe umi ñorairõhára Siriagua, Tupã Ñandejára omoĩ ipópe kuéra ñorairõhára Judagua heta itevéva, ha’e kuéra oheja haguére Tupã itúvakuéra ypykue Járape. Péicha hekovia Joáspe hembiapo vaikue.

Siriagua oho rire, Joás opyta hasy ete. Upérõ hembiguái kuéra ñemiháme oñemoĩ peteĩ ñe’ẽme ojuka haguã ichupe, ojuka haguére pa’i Joiadá ra’ýpe. Ha upéicha ojuka ichupe hupa itépe. Upéi oñotỹ hikuái ichupe David távape, oñeñotỹ’ỹre mburuvicha guasu kuéra apytépe.

Tupã Ñandejára Ñe’ẽ.

SALMO ÑEMBOHOVÁI 88, 4-5. 29-35

Opavave: Tupã Ñandejára ome’ẽ ñandéve imborayhu opa ára

“Che ame’ẽ va’ekue che ñe’ẽ che rembiporavópe.
Kóicha ha’e va’ekue che rembiguái Davídpe:
‘Ne ñemoñare ndopa mo’ãi araka’eve,
ha’ekuéra mburuvicha guasúta ojoapykuéri nde rire.’” O.

Ichupe ahayhúne opa ára, che ñe’ẽ ichupe ame’ẽva rehe napyrũi chéne.
Iñemoñare hendaguépe oguapýne opa ára,
peteĩ guapyha hi’aréva yvágaichagua. O.

Ha’e kuéra omboyke ramo che rembiapoukapy,
ha ndojapói ramo che rembipota, ha’e kuéra omboyke ramo che ñe’ẽ, ha ndojapói ramo umi mba’e che aipotáva,
che rehe opu’ã haguére tukumbo ambopúne ijapére. O.

Teju ruguáipe amoengoviáne hembiapo vaikue ichupekuéra.
Che mborayhu David rehe katu ndopái chéne,
che reko jeroviaha ndahekýi chéne. O.

ALELUIA 2Cor 8, 9

Aleluia.
Ñandejára Jesucristo tuicha ha imba’e eta ramo jepe, oñemomichï ha oñemomboriahu ñande rayhupápe,
ikatu haguäicha ñane mboheta imboriahukuépe.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 6, 24-34

Upe ramo guare péicha he’i Ñandejára hemimbo’ekuérape: Avave ndaikatúi ijára mokõivo. Nda ija’éine peteĩre ha ohayhúne pe ambuépe, térã ombojeroviáne peteĩme ha ojahéine pe ambuére. Ndaikatúi ñambojerovia Tupã Ñandejárape ha virúpe oñondive.

Upévare ha’e peẽme: Ani pejepy’apy mba’épa pe’úta térã mba’épa pemondéta peikove haguã. Ñande rekove nga’u piko namba’e guasuvéi tembi’úgui? Ha ñande rete umi aógui? Pema’ẽ umi guyra árare ovevéva. Ha’ekuéra noñemitỹi, nomono’õi ha noñongatúi mamove.

Opáichavo, pende Ru yvágape oĩva omongaru ichupe kuéra. Peẽ niko mba’e guasu eteve ichugui kuéra. Máva piko pende apytégui ojepy’apy haguére ikatúne ombojoapy hekove michĩ ra’ymínte jepe? Ma’erã piko pejepy’apy pemonde va’erãre?

Pema’ẽ umi yvoty ñúme guáre, mba’éichapa okakuaa, omba’apo ha ojapo’ỹre mba’eve. Che ha’e peẽme, mburuvicha guasu Salomón jepe opa ijeguaka reheve naiporãi va’ekue umi yvoty iporã háicha. Ha Tupã Ñandejára péicha omondérõ umi ka’avo ñúme opu’ãva ko’ágã, ha ko’ẽrõ ojehapýtava tatakuápe, ko’yteve pene mondéta peẽme, peẽ tekove jerovia’ỹ. Upévare, ani pejepy’apy ha peje: ‘Mba’éiko ja’úta? Mba’éiko ñamboy’úta? Mba’éiko ñamondéta?’ Opa ko’ã mba’ére niko ojepy’apy umi Tupãre ojerovia’ỹva.

Peẽ katu niko oĩ pende Ru yvágape oikuaáva peikotevẽha ko’ã mba’ére. Upévare, pejepy’apy uvei Tupã Ñandejára sãmbyhýre pejapo haguã hembipota. Upéi oñeme’ẽta peẽme opa ko’ã mba’e avei. Ani pejepy’apy ko’ẽrõguáre, peheja umíva ko’ẽrõrã. Ani pembojo’a jepy’apy peteĩ árape ijehegui voínte oguerúvape.

Ñandejára Jesucristo Ñe’ẽ.