Ñahendu Jesús Ñe’ẽ. Viernes 13º Durante el Año

Escucha el evangelio y la reflexión en: https://youtu.be/M0mn7QwObDA?feature=shared

Viernes 13º Durante el Año Mateo 9, 9 – 13.

Jesús oguata jave ohóvo, ohecha Mateópe oguapýva hína impuésto ojekovrahápe.

Ha’e niko okovra impuésto Róma peguarã. Jesús he’i chupe : — Eju che moirũ. Mateo opu’ã ha oho hendive.

Upéi, Jesús oguapy jave mesápe, Mateo rógape, ou avei oguapy hendive kuéra umi impuésto okovráva Róma peguarã. Ijaty avei hendivekuéra heta herakuã vaíva.

Umi Fariséo ohechávo upéva he’i Jesús disípulokuérape:— Mba’éicha piko pene mbo’ehára oguapýta okaru impuésto kovraha ha herakuã vaíva ndive.

Jesús ohendúvo upéva, he’i chupekuéra:— Hesãiva niko noikotevẽi médico, hasývante. Tapeho peikuaa mba’épa Ñandejára he’ise raka’e iñe’ẽme ku he’írõ guáre: “Che aipota peiporiahuvereko pende rapichápe, pene ofrénda pegueru rangue chéve.” Che niko ndajúi ahenóivo imarangatúvape, pecadórpente.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jajeheka vaerã niko ñaneremikotevẽre. Pe ólla niko nañanera’arõi. Ojerure ipypegua ha la ñande py’a katu oñe’ẽ voi nañambo pypeguái ramo. Oiméramo ñamongaru va’erã ñande familia ndajarekói ñaína jaiporavo iterei haguã. Heta ñande rapicha omba’apóva hína niko noiméi katuete upe ha’e omba’apose hápe.

Ndojuhúinte ko hína iporãveva ha ikuéntava ichupe, ha upévare oike upépe oñekonchava. Ágã osẽ ramo ichupe peteĩ tembiapo porãve katu upépe ojepoíta hína.

Jesús niko oikuaa upéva. Ha’e avei ngo omba’apo vaekue ha oikuaa ndaikatuiha jaiporavo iterei ñaikotevẽ vove. Oikuaa oihã ojapóva tembiapo ndojehecha porãiva: impuesto mbyatyha, prostituta ha mba’e. Jesús katu okondena rangue, oñemboja hesekuéra ha ohenói iñirũrã. Oikuave’ẽ ichupe kuéra peteĩ tembiapo pyahu iporãvéva, Ñandejára kokuépe omba’aposéramo guarã. Peichagua vaekue niko hína Mateo, impuesto ombyatýva Roma peguarã.

Ha upéva ombopochy umi Ñandejára léi ombo’éva, ndoiporiahuverekóiva hapicha ojavývape. Jesús he’i chupekuéra pe ñande rapicha pecador ho’áva ha okañývare ñañembojáramo ñamoirũ, jaiporiahuvereko ha ñamopu’ã, ñambovy’ave hína Ñandejárape heta ñembo’e puku ranguégui.

Oiméneko che irũ ha che reindy, mitã Mateo noha’arõi ete voi Ñandejára ohenóine haguã chupe iñirũrã. Ha tuichaiterei ovy’a Jesús oñemboja haguére hese. Oheja opa ohejáva ñande rapicha ha ojepoi voi oakãvo tembiapo pyahúpe Jesús ykére.

Pa’i Alberto Luna.