Ñahendu Jesús. Domingo 15º Durante el Año

Escucha el evangelio y la reflexión en: https://youtu.be/CZsjXnj5BV8

Domingo 15º Durante el Año Ciclo C Lucas 10, 25 – 37

Peteĩ Moisés léi ombo’éva oho oñe’ẽ Jesús ndive. Ombopakova pirese chupe ha oporandu: — Mbo’ehára, mba’éiko ajapo vaerã ahupyty haguã jeikove opave’ỹva.

Upépe Jesús omombe’u chupe kóva ko káso: Peteĩ karia’y ndaje oguata ohóvo Jerusaléngui Jericópe. Tapére osẽ chupe mondaha atýra ha oipe’apa chugui opa oguerekóva. Ha heta ombyepoti rire chupe hikuái, oheja chupe omano vai-vai ha opívo.

Peichahágui rei, ohasa sapy’a upe rupi peteĩ pa’i. Ha ohechávo hapichápe yvýpe ojepysóva hína, oñemboykénte chugui ha ohasa meme ohóvo. Upéi, ohasa avei upe rupi peteĩ pa’ípe oipytyvõva tupaópe.

Ohechávo pe yvýpe oĩvape, oñemboykénte avei chugui ha ohasa oho. Tapykuetévo katu, ohasa avei upe rupi peteĩ Samariagua. Ohechávo pe yvýpe oĩvape hína, oiporiahuvereko chupe. Oguejy henda árigui ha oja hendápe. Ha oipohãnomba porã rire umi oñenupã hague hamba’e, ojokua porãmba.

Upéi, ohupi chupe henda ári, ha ogueraha mbohupa oguãhẽháme ha oñangareko hese upe pyhare. Ko’ẽmba rire, oheja plata’imi pe mbohupa róga járape. Ha he’i chupe, “Eñangareko porãmíkena chéve ko karia’ýre. Ha peichahágui ndohupytypáirõ ko ahejáva ndéve, ágã aju jeývo ame’ẽmbáne ndéve”.

Jesús ojere he’i pe Moisés léi ombo’évape: — Néi, ndéverõ guarã, máva ko’ãva mbohapy apytégui hína pe oñenupãmba vaekue rapicha.
Upe Moisés léi ombo’éva he’i: — Ha upe oiporiahuvereko vaekue chupe.

Jesús he’i chupe: — Néi, tereho ndave ejapo upéicha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande rapépe avei osẽ mondaha ojeitýva ñande ári. Tentación ñaha’arõ’ỹetére ñande reitýva. Ou Jesús ñande recha yvýpe, ñandeporiahuvereko, oñemboja ha ñanemopotĩ. Ñande karai ha ñañemombe’u ramo Jesús ñanemopotĩ. Omoĩ ñande rehe
vinomi, pe huguy oñeme’ẽva ñandéve comuniónpe, ha aceite ñande rasy ramo pa’i omona ñande rehe ha ñaneperdona.

Jesús ñande rupi ijapére, ohupi ñande pekádo, ha ñandereja oñangareko vaerãre ñande rehe ndive ñande Iglésia pe. Ha’énte opagapa ñane rembiapo vaikueta rehe. Ñanepohano, ñanemonguera ha ñanemboguata jey.

Mba’éichatamo ra’e ikatúne ñande ave che irũ ha che reindy, jaiko Jesúicha, ku samaritano imba’e porãvaicha. Jahechakuaa ha ñaypytyvõ avei ñande rapicha oñemombóva hína tape yképe, Aña oñembosaráigui hese ha sarambikuépe ohejáva pe hekovemi anga. Mba’éichapa ikatúne ñamopu’ã, ñaipohano ha ñamboguata jevy.

ÑAÑEMBO’E OÑONDIVE

Ñandejára Jesucristo, nde niko hína pe Samaritano nderejeguarúiva ore hegui, ejúva ore rupi ha ore pohano. Orembo’emína rojapo haguã ore rapicháre nde rejapo háicha ore rehe. Amén.

Pa’i Alberto Luna.