Ñahendu Jesús Ñe’ẽ. Domingo 17º Durante el Año

Escucha el evangelio y la reflexión en: https://youtu.be/B6EMMwJsgEg?feature=shared

Domingo 17 Durante el Año Ciclo C Lucas 11, 1 – 13

Upe ára Jesús oñembo’epa rire, peteĩ idisípulo oñemboja hendápe. He’i chupe:— Mbo’ehára, ore mbo’éna mba’éichapa roñembo’e vaerã, ku Juan ombo’e haguéicha idisípulokuérape.

Jesús he’i chupekuéra: — Peñembo’e jave, peje kóicha: Ore Ru toñemomba’e nde réra marangatu. Eju ha eru oréve ne Rréino. Ára ko’ẽrekena eme’ẽ oréve ore rembi’urã.

Eheja rei oréve ore pekádo, ore roheja reiháicha opavave ore rehe ojapo vai va’ekuépe. Aníkena rehejátei rojepy’a ra’ã.

Jesús he’i ave: Ja’éntena pehoha peteĩ peikuaáva rógape pyhare pyte ha peje chupe,“Nde, ma’érã. Nereme’ẽséi piko chéve mbohapy pan mba’e. Oiméko oguãhẽva ógape mombyrygua ha ndarekói mba’evete ha’uka va’erã chupe.” Ha ja’éntena pe kotypy guive he’iha peẽme, “Nambre. Che rejápe. Ambotypáma niko che rokẽ ha roñenombáma roke haguã. Ndaikatu mo’ãi apu’ã ha ame’ẽ ndéve mba’eve.”

Che ha’e peẽme, pembota jevy jevy ramo, nopu’ãi ramo ome’ẽ pejeruréva pende kuaa haguére, opu’áne ome’ẽ peẽme opa mba’e peikotevẽva anive haguã pemyangekói chupe. Upévare ha’e peẽme, “Pejerure, ha Ñandejára ome’ẽne peẽme. Peheka ha ha’e ojuhukáne peẽme. Pembota Ñandejára rokẽ ha ha’e oipe’áne peẽme.” Ojerurévape niko oñeme’ẽta, ohekáva katu ojuhúta, ha pe okẽ ombotávape ojepe’áta.

Máva peẽva piko, pende ra’y ojerure ramo peẽme pira, peme’ẽ chupe mbói. Térã ñandu kavaju, ojerure ramo peẽme ryguasu rupi’a. Peẽ, pene rembiapo vaíva voínte Ñandejára renondépe, peme’ẽ kuaa ramo iporãva pende ra’ykuérape, niko ko’yteve pende Ru yvágape oĩva ome’ẽne pe Espíritu Santo umi chupe ojerurévape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jajejopy ramo niko ñanemandu’áva voínte Ñandejárare. Ñañepomoĩ, jajapo promesa, ñamyangekói Tupãsy ha ñahenói sánto kuéra mimi oĩ háicha. Jesús katu ndaha’éi oñembo’éva ojejopy ajánte. Ha’e oheka Tupãme oime haguã hendive, oipota pe Espíritu Santo oisãmbyhy hekove.

Jesús ñanembo’e ñahenói haguã Ñandejárape, ñahenói háicha ñande ru térã ñande sýpe. Ñandejára niko, ku ñande ru ha ñande sýicha, ome’ẽséva ñandéve imba’e porã.

Upévare, he’i Jesús, jajerure va’erã upe jaipotáva, pe mitã ojerure háicha itúva térã isýpe, omyangekói ha oiko háicha hapykuéri. Upéicha avei ñande jajerure ha ñambota va’erã Ñandejára rokẽ. Jesús avei he’i Ñandejára ome’ẽta katuete ñandéve jajeruréramo Espíritu Santo pu’aka oguejy haguã ñande pype ha oisãmbyhy ñande rekove.

ÑAÑEMBO’E OÑONDIVE

Ñandejára Jesucristo, reiméva Túva Ñandejára renondépe ha rejeruréva ichupe ore rehe. Orembo’emína mba’éichapa roñembo’e va’erã ha mba’épa rojerure va’erã. Amén.

Pa’i Alberto Luna.