Ñahendu Jesús Ñe’ẽ. Lunes 19º Durante el Año

Escucha el evangelio y la reflexión en: https://youtu.be/05zEjH1dBvQ

Lunes 19º Durante el Año Mateo 17, 22 – 27

Upérõ, oiko aja hikuái Galiléa rupi Jesús oñe’ẽ idisípulokuérape kóicha: — Umi che rehe ija’e’ỹva niko che reitýta hína ipópe, ha che jukáta hikuái. Mbohapy ára haguépe katu aikove jeýta. Péicha ohendúvo, tuicha oñembyasy hikuái.

Jesús ha idisípulo kuéra oguãhẽvo Cafarnaúmpe, umi impuésto okovráva tupaópe guarã oho Pedro rendápe ha oporandu chupe: — Pene mbo’ehára piko opaga oikóvo pe tupao impuésto.

Ha Pedro he’i chupekuéra: — Héẽ, ome’ẽ.

Upéi, Pedro oikévo Jesús rógape, Jesús raẽ osẽ oporandu Pédrope:— Simón, eremína chéve peteĩ mba’e. Ñande ruvicha kuéra omoĩ ramo impuésto hamba’e, mávarepa ha’e kuéra omopẽ. Hetãguáre térãpa tetã ambueguáre.

Pedro he’i chupe: — Tetã ambueguáre.

Jesús he’i chupe: — Péicharõ niko ñande natekotevẽi japaga, ajépa. Péicharõ jepe, ani ágã ipochy mba’e ñane ndive avave, terehónte ýpe ha epoi ne pinda. Pe pira reikutu raẽva jurúpe rejuhúta pláta ñande mokõivépe guarã. Eraha ha eme’ẽ chupekuéra upéva.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Mísa hápe jaháramo niko oñembohasa jepi pe vosa’i ñame’ẽ haguã ñane contribución ñaipytyvõ haguã tupaópe. Ha hetave ñame’ẽva jepi pe hembyrénte, pláta sa’i ha níkel mimi. Hesa guasúva ñañongatúnte ñanemba’erã. Ha oĩ jepi avei ñande barrio, térã ñande vállepe oúva ojerure ñandéve contribución ñande ekuéla, centro de salu, térã ambue tembiapo ñande comunidápe guarã.

Oĩ niko ome’ẽva ha oime avei okañýva hamba’e ani haguã oñepo’ẽ ivolsíllope. Ha oimeve hína umi impuesto japagáva Municipalidad, Gobernación, Impuesto interno, ha mba’e. Heta oime opagáva ha oime avei oñembotavýva ha ndopagái. Ojapo aipo “evasión de impuesto”.

Oime niko oipotáva ñande tupaópe oñeme’ẽmba ñandéve, ha Municipalidad, gobernación, escuela umía, toñemoĩmbánte avei ñandéve. Ha oipysónte ipo, yvatégui to’a ha toñeme’ẽmba ichupekuéra ojapo’ỹre mba’eve.

Jesús he’i Pedro pe ñanemba’epahánte pe ñande tupao, ñande válle ha ñane retãme oiméva. Opáichavo ñañombojoja haguã opavave ndive, ñamoĩ vaerã avei ñande jehegui ha ñañeha’ã ñame’ẽ ñande tupao, ñande comunidad, ñane retãme guarã. Ani ñaha’arõnte yvatégui ho’a ñandéve opa mba’e.

Amo ipahápe niko upe ñame’ẽva ñandéve guarã jeýtante hína. Nde pojerápa hína che reindy ha nde che irũ. Térãpa nde po mokéte imi ojejerure vove ndéve.

Pa’i Jasy.