Ñahendu Jesús Ñe’ẽ. San Lorenzo ára

Escucha el evangelio y la reflexión en: https://youtu.be/OVy-QP7I67M

10 agosto: San Lorenzo ára. Juan 12, 24 – 26

Upérõ Jesús he’i idisípulokuérape: Peikuaa niko peẽ peteĩ semílla ndo’ái ramo yvýpe ha nomanói ramo, ha’eño reínte opyta. Ágã ho’ávo yvýpe ha omano ramo katu, upéi heñóine ha heta hi’áne. Upe hekovére hakate’ỹva, omanóta. Upe hekovére nahakate’ỹiva katu, oikovéta opa ára guarã. Oime ramo oikoséva cherembijokuái, tou ta che moirũ.

Péicharõ, che aimeháme ha’e ave oĩta. Oĩ ramo oikóva che rembiguáirõ, upévape che ru ombotuicháta.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE…

“Ne rakate’ỹ ha nde delikádo itereíramo na eñalambra” he’i ningo lo mitã. Hesu ñanemomandu’a ku semíllare, trígo ra’ỹi ñañotỹva ha omanóva, itujúva ha oñehundi vaicha yvyguýpe. Upéicha mante ikatúta heñói ha okakuaa.

Amo ipahápe katu ningo ou hi’a hetaiteve. Peteĩ semilla noñeñotỹiva niko iporã ramo jepe, upéva opyta ha’eño ha ndahi’ái. Ha pe semíllare Hesu ombojoja ñande rekove. Ñane rakate’ỹ eterei ramo ñande jehe ha ñañeñongatu eterei ramo.

Nañañemonaséi ramo ñande rapicha rehe, ha nañaiméiramo jajasuru haguãicha hénte apytépe, ñahuguitĩvo ñande rapicha opaichaguáva, japytáta ñane ño. Ha upe ñande rekove ndahi’a mo’ãi Ñandejára oipota háicha. Naikuénta mo’ãi ñandéve ha avavetépe.

Ko árape niko ñaromandu’a ñaína San Lorenzo pe. Ojejuka vaekue ymaitéma, áño 258 rupi, amo Rrómape. Ko kuimba’e ha’e vaekue peteĩ diákono oĩva oñangareko haguã umi mboriahúre.

Ome’ẽva chupekuéra oikotevẽva ha orekóva ipópe umi cristianokuéra ome’ẽ va’ekueoikotevẽvape peguarã. Lorenzo ohendu raka’e ko Hesu ñe’ẽ he’íva ñame’ẽ va’erãha ñande rekove ñaipytyvõ haguã ñande rapichápe. Ha opyta rangue hógape ha’eño, oiko okorre hapicha kuéra oikotevẽva apytépe. Ha upérupi opilla ichupe umi ndaija’éiva cristiano kuéra rehe.

Ha ou ipiári umi soldado Rróma gua, oraha ichupe préso ojuka haguã. Ha oraha mboyve katu ojerure ichupe hikuái mbaretépe ome’ẽ haguã ichupekuéra pe tupao pláta ha óro orekóva. Ha oho ndaje mitã Lorenzo ohenói umi mboriahu atýra upépe oĩvape, oha’arõva hina ichupe.

Ogueru voi ichupe kuéra henondépe ha he’i umi soldádope: Ko’ãva ha’e hina upe pláta ha óro ore rorekóva, ko’ãva hína la ore rikésa.

Ñama’ẽrõ ko ñande rapicha py’a porãite rehe na ñapensami, che irũ ha che reindy, mba’épa la ñande rikésa. Jajerure ani haguã ñañealambra ha ñanerakate’ỹeterei ñande jehe.

Pa’i Jasy.