Ñahendu Jesús Ñe’ẽ. Viernes 18º Durante el Año

Escucha el evangelio y la reflexión en: https://youtu.be/USyFxsgiRTA

Viernes 18º Durante el Año Mateo 16, 24 – 28

Upérõ Jesús he’i idisípulokuérape: — Peẽ che moirũsérõ, peñembyesarái umi mba’e peẽ pejaposévagui. Pehupi pende kurusu pende apére, ha peju che moirũ. Pe hekovére hakate’ỹva, omanóta. Pe omanóva che rehehápe katu, oikovéta. Mba’eve niko nañanohẽi jarekopárõ opa mba’e, ha ipahápe ñañehundi.

Mba’evéma niko ndaikatúi ñame’ẽ jaikove jey haguã. Ágã aju jeývo, ajúta hína che ru pu’aka guasuete reheve ha hi’ángelkuéra ndive. Ágã upévo Ñandejára omyengoviáta peteĩ-teĩme hembiapokue ojerureháicha.

Añete ha’e peẽme. Pende apytépe oĩ hína nomano mo’ãiva che recha’ỹre ágã aju jeývo che Reino reheve.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Jaikovẽro jajuecha ha ñamanórõ jajuasa”. He’i ningo lo mitã. Ha pe tuichave mba’e ñande jarekóva niko pe ñande rekove. Ha ñane rakate’ỹ niko hese. Ha péicha va’erã niko, ajépa. Ndahekoviái niko péva. Ko peteĩmi jarekóva.

Pe ñande rekove niko ndaha’éi ñande jaiporavo vaekue, ñañeñandúntema heseve. Ha jaikuaa avei upéva ojepe’átaha ñande hegui oguahẽvove hi’ára. Ha upéva katu ndajaikuaái araka’etétapa hina. Iseguroha mante jaikuaa.

Upe oĩva ñande pópe niko ñañeha’ã jajapo ko ñande rekovemígui peteĩ mba’e iporãva ñandéve guarã voi ha ñande rapicha kuéra peguarã avei. Ha upéva jajapo haguã upe oikuaáva pe tape porã ha’e hína Ñandejára, ñande apo hare.

Jaguatáramo Jesús ndive ndajajavýi tape, ha ñapenáramo hese nañakañýi. Heta ñe’ẽ jepe niko ñahendu: Ko Jesús rape ha’eha peteĩ vyrorei, nañamboapu’áiha mba’eve upérupi ha mba’e. Ha ñande voi niko ñañandúta sapy’ánte opu’ã ñande py’ápe arai hũ omoypytũva ñande jerovia, ñanemokangy. Ha’etéku ñandénte la ñanefanátiko itereíva Ñandejára ha ñembo’ére hamba’e. Ha’etéku umi ndojeroviáiva oiko porãvéva ha ivevúiva ichupekuéra opa mba’e.

Jesús he’i ñandéve ani haguã ñapena umíva rehe. Vaicháramo jepe ñahundi reiha ñande rekove jaikóramo hapykuéri, upéva ha’e hína pe tape añete. Tapére jahávoma voi ha amo hu’ãme katu, tuichavéntema hekoviátava ñandéve ha hetápe upekuévo omoguahẽta jehovasa ha vy’a ijapyra’ỹva.

Oiméramo che reindy ha nde che irũ, eñandu ipohýi imi hína ndéve pe nde kurusu eñeha’ãva emboguata jerovia pópe, aníke eraha ne ño iterei. Nemandu’ánteke Jesús he’i hague: “Pe yugo amoĩ tava pende apére niko ivevúita peẽme, ha ndaipohýi mo’ãi upe aipotáva peraha”.

Pa’i Alberto Luna.