LECTURAS SÁBADO VIGÉSIMA SEXTA SEMANA

LECTURAS SÁBADO VIGÉSIMA SEXTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Job arandukápe oĩ háicha 42, 1-3. 5-6. 12-17

Kóicha oñe’ẽ Job Tupã Ñandejárape: Tupã Ñandejára, che aikuaa nde ikatuha opa mba’e rejapo.

Ndéve guarã ndaipóri ikatu’ỹva. “Máva piko che arovia’ỹ haguã nde pokatu, ha ahechauka che tavyha?

Che añe’ẽ rei aikóvo ra’e mba’e aikuaa’ỹvare, mba’e hechapyrãvare ikatu’ỹva che aikuaa. Ahendúgui reínte ra’e roikuaáva. Ko’ágã katu rohecha che resaite rupi.

Upévare, ajei che ñe’ẽ nguégui ñembyasýpe, ha aguapy yvytĩmbo ha tanimbúpe” Tupä Ñandejára ohovasa Jóbpe, ha heta hetave mba’e porã ome’ẽ ichupe omano meve. Hymbakuéra ohupity 1.000 ovecha, 6.000 kaméllo, 2.000 guéi ha 1.000 vúrro. Ta’ýra 14 ha tajýra mbohapy.

Tajýra ypykue ombohéra Jemíma, pe mokõiha Quesiá ha pe mbohapyha Queren-Hapuc. Yvy tuichakue ndaipóri kuña iporãva Job rajykuéraicha. Job oheja ichupe kuéra ha ikyvykuérape opa ite mba’e oguerekóva. Kóva rire, Job oikove 140 áño. Omano itujaite pyréma oikove aja gueteri ta’ýra ha tajýra kuéra, ha ohecha ave hemineno ha ta’ýra kuéra remineno.

Tupã Ñandejára Ñe’ẽ.

SALMO ÑEMBOHOVÁI 118, 66. 71. 75. 91. 125. 130

Opavave: Jechavai ou porã chéve, péicha rupi aikuaa ne rembipota.

Che mbo’e che akã guapy ha che arandu haguã,
ne rembiapoukapy rehe ajerovia.
Jechavai ou porã chéve,
péicha rupi aikuaa ne rembipota. O.

Che Jára, che aikuaa porã ne ñe’ẽ imarangatuha,
ha che mbojecha vai ramo, hendapete rejapoha.
Opa mba’e oĩ nde reipota
hagueicha ite, umíva nde po guýpe oĩmba. O.

Che hína ne rembiguái.
Che moarandu kena aikuaa haguã ne rembiapoukapy.
Umi ne ñe’ẽ jaikuaávo, ñande resape,
ha omoarandu umi mba’eve oikuaa’ỹvape. O.

ALELUIA Cf. Mt 11, 25

Aleluia.
Nde niko hovaspyre, ore Ru, Tupã yvy ha yvága Jára, hehechauka va’ekue mba’e guasu ete Sambyhy rehegua
umi imichïvévape.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 10, 17-24

Upe ramo umi 72 ou jevy hikuái vy’apópe, ha he’i: Ore Jára, umi mba’epochy jepe ojapo ro’éva nde rérape.

Jesús he’i ichupe kuéra: Upéicha. Che ahecha Satanápe ho’a ramo yvágagui aratirícha. Che ame’ẽ va’ekue peẽme pokatu peguata haguã mbói ha alakran apytépe, ha pende pu’aka haguã umi pende rehe ija’e’ỹvare, ojehu’ỹre peẽme mba’eve ivaíva. Anínte pevy’a umi mba’epochy ojapo haguére pejéva. Pevy’a uvei oimemaháre pende réra ojehai yvágape.

Upe javete Jesús henyhẽ Espíritu Santo guigua vy’ápe, ha he’i: “Romomba’e guasu che Ru, yvága ha yvy Jára, reñomi haguére ko’ã mba’e umi iñarandu ha imba’e kuaávagui, ha reikuaauka umi iñarandu’ỹvape. Upéicha che Ru, péichante voi reipota va’ekue ojehu.

Che Ru niko omoĩ che po guýpe opa mba’e. Avave ndoikuaái Tupã Ra’ýpe, Túva añónte. Ha avave ndoikuaái Túvape, Tupã Ra’y añónte, ha umi ojekuaaukávape Tupã Ra’y.” Ha ojerévo hemimbo’ekuéra gotyo, he’i ichupe kuéra año: “Ovy’a iténe umi ohecháva pe peẽ pehecháva hína.

Añetehápe ha’e peẽme, heta maranduhára ha heta mburuvicha guasu ohechase va’ekue ko peẽ pehecháva, ha ndohechái. Ha’e kuéra ohenduse va’ekue ko peẽ pehendúva, ha nohendúi.”

Tupã Ñandejára Ñe’ẽ.