DÍA V DENTRO DE LA OCTAVA DE NAVIDAD

DÍA V DENTRO DE LA OCTAVA DE NAVIDAD

Ko’ágä Ñahendúta Tupã Ñandejára Ñe’ẽ San Juan ohai va’ekue                             1 Jn 2, 3-11

Che pehẽnguekuéra:

Jajapórõ Tupã Ñandejára rembiapoukapy, jaikuaa porã jaikuaaha ichupe. Oĩrõ he’íva: “Che aikuaa ichupe”, ha ndojapói hembiapoukapy, upéva ijapu ha nde’íri pe añetegua. Ojapórõ iñe’ẽ katu, Tupã Ñandejára mborayhu oĩ hekopete ipype ha ikatu jaikuaa ñane peteĩha hendive. Pe he’íva ipeteĩha Tupã Ñandejára ndive, oiko va’erã Jesucristo oiko haguéicha.

Che pehẽnguekuéra pohayhúva, ko tembiapoukapy ahaíva peẽme ndaha’éi ipyahúva, upe perekóma va’ekue iñepyrũha guivénte uvei. Opáichavo ipyahu avei ha iñañete Crístope ha pende pype avei, pe pytũ ohasámagui ohóvo ha ohesapéma pe tesapeha añeteguáva.

Oimérõ he’íva oĩha tesape rendýpe, ha ndaija’éi ipehẽnguére, oĩ gueteri pytũmbýpe. Pe ohayhúva ipehẽnguépe katu oiko tesape rendýpe ha noñepysãngái. Pe ohayhu’ỹva hapichápe katu, oikove aja oiko pytũmbýpe, ha ndoikuaái mamópa oho, pe pytũ oheja haguére ichupe ohecha’ỹre.

Tupã Ñandejára Ñe’ẽ.

SALMO ÑEMBOHOVÁI 95, 1-3. 5b-6

R. Pepurahéi Tupã Ñandejárape purahéi pyahu.

Pepurahéi Tupã Ñandejárape purahéi pyahu.

To purahéi Ñandejárape opa ko yvy.

Pepurahéi Tupä Ñandejárape, héra pemomba’e. R.

Opa árape pemoherakuã ha’e oporoguenohẽha jejopy vaígui.

Pemombe’u opa tetã rupi ha maymávape, ha’e tuichaha,

ha umi mba’e hechapyrãva ha’e ojapóva. R.

Ñandejára Tupã katu yvága apohare hína, teko jajái ha teko mimbipa ijerére oĩ,

hekoha iporã itéva pokatúgui henyhẽ. R.

ALELUIA

Aleluia.

Mba’e rendy ohespéva umi ndaha’éiva judiópe

ha terakuä porä maymáva hese ojeroviávare.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                    2, 22-35

Oguahẽvo ára oñemopotĩ haguã, he’i háicha Moisés rembiapoukapy, ogueraha hikuái pe mitã Jerusalénpe omoĩvo Tupã Ñandejára renondépe. Ojapo hikuái upéva, upéicha oĩgui Tupã Ñandejára rembiapoukapýpe, he’íva: “Opa mitã kuimba’e ijypykuéva oñemboyke va’erã Ñandejára peguarã”. Upérõ oho hikuái omba’e kuave’ẽvo, he’i háicha Tupã Ñandejára rembiapoukapy: mokõi jeruti, ýrõ katu mokõi pykasu ra’y.

Umíva umi árape oiko va’ekue Jerusalénpe peteĩ kuimba’e hérava Simeón, heko joja ha iporiahuvereko katúva, ha oha’arõva osẽ Israel ñepysyrõva. Espíritu Santo oĩ Simeón ndive, ha oikuaauka ra’e ichupe nomano mo’ãiha ohecha mboyve pe Mesíaspe, Ñandejára omboútava.

Espíritu Santo ogueraha Simeónpe Tupaópe ipógui, ha oguerahávo mitã Jesúspe itúva ha isy ojapo haguã Tupã rembiapoukapy he’íva, Simeón ohupi pe mitã ijyva ári ha omomba’e guasu Tupãme kóicha: “Ko’ágã, che Jára, rejapóma ne Ñe’ẽ: ikatúma reheja omano ko ne rembiguái py’a guapýpe.

Ahecháma reñepyrũha reporopysyrõ opa tetã renondépe, pe mba’e rendy ohesapepátava opa tetãme,ha omomimbipátava ne retã Israélpe”

Jesús ru, ha isy, opyta ijurujái ohendúvo Simeón he’íva pe mitãre. Upérö Simeón ohovasa ichupe kuéra, ha he’i María, Jesús sýpe: Ema’ẽ, ko mitã heta Israel guápe oity térã omopu’ãta. Ha’éta peteĩ mba’e rechaukaha, ha hetáta ojahéiva hese ikatu haguã heta py’apy pegua ojekuaa. Ha opa ko’ã mba’e, peteĩ kyse pukúichata ndéve guarã, nde py’ápe voi nde kutútava.

Ñandejára Jesucristo Ñe’ẽ.