DÍA VII DENTRO DE LA OCTAVA DE NAVIDAD

Día 31 de diciembre

DIA VII DENTRO DE LA OCTAVA DE NAVIDAD

Ñahendúta Tupã Ñandejára Ñe’ẽ San Juan ohai va’ekue           1 Jn 2, 18-21

Che ra’ykuéra pohayhu etéva, ára paha itéma niko. Peẽ pehendu va’ekue outaha pe Crístore opu’ãva ha oñemoĩva hendaguépe. Ha péina ko’ágã voi oĩma heta opu’ãva Crístore. Upévare jaikuaa ha’emaha pe ára paha. Ha’ekuéra osẽ va’ekue ñande apytégui, añetehápe katu ndaha’éiva ra’e ñande rehegua, ha’e rire ramo niko opyta va’erã mo’ã ñane ndive. Ha upéicha ojehu ojekuaa porã haguã nda opavaveiha ñande reheguáva.

Peẽme katu Cristo, pe Imarangatúva, pene mboyke va’ekue imba’erã, Espíritu rupi, ha opavave pereko upe mba’e kuaa. Ahai peẽme ndaha’éi peikuaa’ỹgui pe añetegua, peikuaágui uvei, ha peikuaa ndaikatuiha mba’eveichagua japu osẽ pe añetégui.

Tupã Ñandejára Ñe’ẽ.

SALMO ÑEMBOHOVÁI       95, 1-2. 11-13

R. Pepurahéi  Tupä Ñandejárape purahéi pyahu.

Pepurahéi Tupä Ñandejárape purahéi pyahu.

To purahéi Ñandejárape opa ko yvy.

Pepurahéi Ñandejárape, héra pemomba’e.

Opa árape pemoherakuã oporoguenohẽha jejopy vaígui. R.

To vy’a yvága ha yvy.

To sununu pe yguasu ha opa ipype oĩva.

To vy’a umi ñu ha opa mba’e ipype oĩva.

Vy’águi to sapukái umi yvyra ka’aguy pegua. R.

To jepurahéi Tupä Ñandejára renondépe,

ha’e ou ko yvy oisãmbyhy haguã.

Tekojojápe ko yvy oisãmbyhýta, ha añetépe tetãnguéra. R.

ALELUIA

Aleluia.

Pe Ñe’ëgui oiko kuimba’e ha oikove va’ekue ñande apytépe.

Maymave ichupe omoguahëvape ome’ë pokatu oiko haguä ichugui  kuéra Tupä Ñandejára ra’y.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Juan omombe’u háicha. Pejapysaka porãtapa hese?                                                     1, 1-18

Iñepyrũmbýpe oikóma va’ekue voi Ñe’ẽ, ha pe Ñe’ẽ oĩ va’ekue Tupã Ñandejára ndive, ha Tupã va’ekue voi ha’e. Iñepyrũmbýpe, ha’e oĩ va’ekue Tupã Ñandejára ndive. Ha’e rupi, Tupã ojapo opa ite mba’e, ha ndaipóri mba’eve Tupã Ñandejára rembiapokue apytépe ojejapo va’ekue hese’ỹ. Upe ñe’ẽme oĩ va’ekue tekovete, ha pe tekovete ohesape yvypóra kuéra rekove. Ko tesapeha omimbi pe pytũmbýpe, ha pe pytũ katu ndaikatúi ombogue ichupe.

Tupã Ñandejára omondo peteĩ hembiguáipe, hérava Juan Bautista, ha’e omombe’u haguã opavavépe ko tesapeha, mayma ohendúva ichupe oguerovia haguã upe he’íva. Juan ndaha’éi va’ekue upe tesapeha. Oñemboúnte va’ekue ha’e oñe’ẽ haguã pe tesapeháre. Ha pe tesapeha, tesapeha añetegua va’ekue oúva ko yvy ári ohesape haguã maymavépe.

Pe ñe’ẽ oĩ va’ekue yvy ári. Ha Tupã Ñandejára ojapo ramo jepe opa mba’e Ha’e rupi, umi yvy arigua ndoikuaaséi iichugui  mba’eve. Hetã teépe ou, umi hetãgua katu nomoguahẽi ichupe. Umi ichupe omoguahẽ va’ekue ha hese ojerovia va’ekuepe katu omoingo Tupã Ñandejára ñemoñare ramo. Umívagui oiko Tupã ñemoñare, ha ndaha’éi ku yvypóraicha yvy túva ha sy oiko haguére oñondive, nahániri. Ñandejára ite voi omoingo ichupe kuéra iñemoñare ramo.

Upe ñe’ẽ ou va’ekue yvypóra ite ramo ha oiko ore apytépe, mborayhu ha añetégui henyhẽ. Ore rohecha va’ekue heko marangatukue Túva ome’ẽ va’ekue ichupe, ta’ýra peteĩ ete haguére ha’e. Juan hese oñe’ẽ va’ekue he’i ramo guare: “Kóva hína upe che mandu’a hague ha’e ramo guare: ‘Upe oúva che rire mba’e guasuve che hegui, oikove haguére che aikove mboyve.’”

Ha’e, henyhẽ rupi mborayhúgui, ore rovasa jo’a jo’a. Tupã Ñandejára niko ome’ẽ va’ekue hembiapoukapy Moisés rupi, mborayhu ha añete katu ou Jesucristo rupi. Ndaipóri avave Tupã Ñandejárape  ohecha va’ekue. Ta’ýra peteĩ ete, peteĩchava Tupã ndive ha oĩva Túva ykére, ha’e oikuaauka ichupe maymavépe.

Ñandejára Jesucristo Ñe’ẽ.