DOMINGO CUARTO DE ADVIENTO

LECTURA PETEÏHA:

Ko’ágä ñahendúta Tupä Ñandejára ñe’ẽ Samuel aranduka mokõiháme oĩ háicha                          

     7, 1-5. 8b-12. 14a. 16

Mburuvicha guasu David oikóma ramo hóga guasúpe ha Ñandejára ome’ẽ rire ichupe py’a guapy opa mburuvicha guasu kuéra ijere rehe oĩva ndive, he’i maranduhára Natánpe:

Mba’éicha piko che aiko óga porãme, ha Ñandejára karameguã katu oĩ óga vakapípe?

Natán he’i ichupe:

Ejapo pe rejaposéva. Ñandejára niko oĩ ne ndive.

Ñandejára katu upe pyharépe voi oñe’ẽ Natánpe, ha he’i ichupe: “Tereho  ere che rembiguái Davídpe ko ha’eukáva ichupe: ‘Na nde mo’ãi pe remopu’ãtava chéve óga aiko haguã.

Upéva rehe ere che rembiguái Davídpe che, Ñandejára ipu’akapáva, ha’eukaha ichupe: Che roguenohẽ va’ekue nde ovecha kuéra korágui, ovecha rapykuéri reikohágui, reiko haguã che retã Israel ruvicharõ. Romoirũ va’ekue mamo rehoha rupi, ahundi opa nde rehe ija’e’ỹvape, ha romoherakuã va’ekue umi karai guasukuéra herakuã guasu háicha ko yvy ári.

Upéi ave, ambosako’i va’ekue che retãgua Israel rendaguã ha upépe amohenda ichupekuéra oiko haguã henda teépe, ikatu’ỹ haguãme avave omoangekói ichupe kuéra, térã umi mba’e vai apoha oguereko asy ichupekuéra ymave guaréicha, amoï ramo guare  tendotakuéra oisãmbyhy haguã Israel guápe.

Che roipe’áta opa nde rehe ija’e’ỹvagui. Ha che ha’e ndéve, che ame’ẽtaha ndéve ne ñemoñarerã. Opa vove nde rekove ko yvy ári ha remano, amoĩta peteï ne ñemoñare ne rendaguépe ha amohendáta ichupe nde guapyhápe.

Che itúvata ha ha’e che ra’ýta. Hembiapo vaírõ ainupãta ichupe, túva oinupã háicha ta’ýrape, ha ndajei mo’ãi ichugui, ajei haguéicha Saúlgui. Ichupe che amosẽ va’ekue romoĩ haguã hendaguépe. Nde rogagua ha nde retãre añangarekóta ha nde guapyha avei oĩ hatãta opa ára guarã”.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI              89, 2-5. 25. 29

Opavave: Opa ára aropurahéita Ñandejára mborayhu tuicha iteha

Ñandejára, opa ára aropurahéita ne mborayhu tuicha iteha.

Opavavépe aikuaaukáta nde reko jeroviaha.

Aikuaaukáta ne mborayhu mba’e opa’ỹvaha,

nde reko jeroviaha naiñambueivaha, naiñambuei háicha yvága. O.

Nde ere va’ekue: “Che ame’ẽ va’ekue che ñe’ẽ che rembiporavópe.

Kóicha ha’e va’ekue che rembiguái Davídpe:

Ne ñemoñare ndopa mo’ãi araka’eve,

ha’e kuéra mburuvicha guasúta ojoapykuéri nde rire. O.

He’íne chéve ha’e: Nde hína che ru,

Ñandejára che renohẽva jejopy vaígui

ha reñangarekóva che rehe, ichupe ahayhúne opa ára,

che ñe’ẽ ichupe ame’ẽva rehe napyrũi chéne. 0.

LECTURA MOKÖIHA:                            

Ñahendúta Tupä Ñandejára Ñe’ẽ San Pablo ohai va’ekue Roma guápe                16, 25-27

Che pehënguekuéra

Ñamomba’e guasu Ñandejárape, ikatúva pene mombarete marandu pyahu che amyasãiva ha Jesucrísto  rehegua tekombo’e rupi. Kóva oĩ pe Ñandejára mba’e ñemi omombe’u va’ekue rehe, okañy va’ekue ko yvy oĩ mboyve guive, ha ko’ágã oñemyesakãva umi maranduhára kuatiañe’ẽ rupi, Tupä Ñandejára opa’ỹva omoĩka va’ekue.

Ko mba’e ñemi Ñandejára rembipota rehegua, ojekuaauka opa tetãme, oguerovia ha ojapo haguã.  Ñandejára peteïnteva ha iñarandúvape guarã, teko mimbipa opa ára guarã, Jesucrísto  rupi! Amén.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA            Lc 1, 38

Aleluia.

Che, Ñandejára rembiguái. Tupä tojapo che rehe pe ere haguéicha

Aleluia.

EVANGELIO

Marandu porã Ñandejára Jesucrísto  rekove ha hemimbo’e San Lucas omombe’u háicha

 1, 26-38

Opavave: Romomba’e guasu ndéve, Ñandejára.                                       

Upe ramo Ñandejára omondo ángel Graviélpe Nazarétpe, opytáva Galiléape. María, peteĩ kuñataĩ marã’ỹ, oikómiva upépe. Ha’e niko ome’ẽma vaekue iñe’ẽ omenda haguã Josére. José niko David ñemoñare akue.  Ñandejára ángel oike pe María oĩháme ha he’i chupe:

— Maitei María. Ñandejára nderovasa. Ñandejára oĩ ne ndive.

 María oñemondýi opytávo. Ha oñeporandu mba’épa he’iséne pe maitei upéva.  Ñandejára ángel he’i chupe:

— Ani rekyhyje María. Ñandejára niko tuicha nde rovasa.  Nde rye guasúta hína, ha ne membýta. Rembohérata pe mitã Jesús.  Pe mitã tuicha mba’éta hína, ha oje’éta hese: “Ñandejára Yvatetegua Ra’y”. Ha Ñandejára omoĩngóta chupe rréi ramo, ijypykue Davídcha.  Ha’e oisãmbyhýta hetã Israel opa árape guarã.

 María oporandu Ñandejára ángelpe:

— Mba’éichata piko péicha, ko che ne’ĩrava amenda.

 Ñandejára ángel katu he’i chupe:

— Espíritu Santo rupíta hína péva. Ñandejára Yvatetegua ne añuãta ipokatúpe. Upévare, pe mitã hérata Ñandejára Ra’y Marangatu.  Ha ne príma Isabel imembýta hína avei, iguãiguĩma ramo jepe. Ku oje’e vaekue ndaikatuiha imemby, ojapóma hína 6 mése hye guasuha.  Ñandejárape guarã niko ndaipóri ikatu’ỹva.

 Upépe María osẽ he’i:

— Che niko Ñandejára rembiguaimínte. Tojapo che rehe pe ere háicha.

Ha Ñandejára ángel oho.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.