LECTURAS DEL 20 DE DICIEMBRE: FERIA DE ADVIENTO

LECTURAS DEL 20 DE DICIEMBRE: FERIA DE ADVIENTO

Ko’ágã ñahendúta Tupã Ñandejára ñe’ẽ Isaías arandukápe oĩ háicha   7, 10-14

Tupã Ñandejára he’i avei Aházpe: “Ejerure Tupã nde Járape to japo techapyrã mba’e rechaukaha ramo, yvyguy hypyve hápe, térã yvate ijyvateve hápe.”

Ahaz he’i: “Nda py’a ra’ã mo’ãi Tupã Ñandejárape ajerurévo mba’e rechaukaha.”

Upérõ Isaías he’i: “Pehendu peẽ mburuvicha guasu David róga pegua: Hesa’i gueteripa peẽme pemokane’õ yvypóra kuérape, ajeve pemokane’õséma avei che Tupã Ñanejárape?

Ñandejára voi ome’ẽa peẽme mba’e rechaukarã;

Pe kuñataĩ hye guasu ha imemby mitã kuimba’éta, ombohératava Emanuel.

Tupã Ñandejára Ñe’ẽ.

SALMO ÑEMBOHOVÁI 23, 1-4ab. 5-6

Opavave: Ko yvy Tupä Ñandejára mba’e, opa mba’e ipype oĩva.

Ko yvy niko Tupã Ñandejára mba’e,

opa mba’e ipype oĩva, ha opa mba’e ipype oikóva.

Ha’e upe yvy omopyenda va’ekue,

yguasu ha ysyry ári omboguapy. O.

Mávapa ojupíne Tupã Ñandejára yvytýpe?

Mávapa opytáne itupao marangatúpe?

Umi ipo ha ipy’a ipotĩva

ha ojeíva opa mba’e vaígui. O.

Umívape ohovasa Tupã Ñandejára,

ha oguenohẽ ichupekuéra jejopy vaígui.

Upéichako umi Ñandejárare ojeroviáva,

umi Jacob Tupã rendápe oguahẽva. O.

ALELUIA

Aleluia.

David llave, reipe’áva Yvága opa aragua rokë, eju ha emosasö umi oikóva pytümbýpe.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Lucas omombe’u háicha     1, 26-38

Upe ramo Tupã Ñandejára omondo hemimbou Gabriélpe peteĩ táva Galilea pegua hérava Nazarétpe. Upépe oiko María, peteĩ kuñataĩ marã’ỹ, ome’ẽma va’ekue iñe’ẽ omenda haguã Josére, mburuvicha guasu David ñemoñare.

Tupã Ñandejára remimbou oike pe María oĩháme ha he’i ichupe: Roguerohory, nde Tupã rembiporavo! Ñandejára oĩ ne ndive. María ipy’andýi opytávo, ha oñeporandu mba’énepa he’ise pe maitei upéva. Tupã Ñandejára remimbou he’i ichupe: María, ani rekyhyje, Tupã Ñandejára nde rerohory. Nde rye guasúta ha ne membýta, ha pe mitã rembohérata Jesús. Ha’e mba’e guasúta ha oje’éta hese: “Tupã Yvatetegua Ra’y”. Ha Tupã Ñandejára ojapóta ichugui  mburuvicha guasu, ijypykue Davídcha. Ha’e oisãmbyhýta Jacob retã guápe opa árape guarã.

María oporandu pe Tupã Ñandejára remimboúpe: Mba’éicha piko ojehúta upéva, ko che ndaikóiva gueteri kuimba’e ndive?

Tupã remimbou katu he’i ichupe: Espíritu Santo oikéta nde pype, ha Tupã Ñandejára Yvatetegua pokatu oúta nde ári. Upévare, pe mitã oútava oñembohérata Imarangatúva ha Tupã Ra’y. Isabel, nde rogayguáva, imembýta avei, iguãiguĩma ramo jepe. Pe kuña oje’e va’ekue ndaikatuiha imemby, ojapóma mése hye guasuha. Tupã Ñandejárape guarã ndaipóri ikatu’ỹva.

Aipórõ María he’i: Che, Tupä Ñandejára rembiguái. Tupã to japo che rehe pe ere haguéicha. Ha upéi, pe Tupã Ñandejára remimbou oho.

Ñandejára Jesucristo Ñe’ẽ.