DOMINGO SEMANA XIII TO

LECTURA PETEÏHA:

Ko’ágä ñahendúta Tupä Ñandejára ñe’ẽ Reyes aranduka mokoĩhápe oĩ háicha      

  4, 8-11. 14-16a

Peteï jevy Eliseo ohasa Sunám rupi ha peteï kuña pepegua ojeapóva mba’e ramo he’i jevy-jevy ichupe oho haguã okaru hendive. Ha ohasa ramo pérupi Eliseo oho jepi hógape okaru. Upéma ramo  ha’e he’i iménape:

Aikuaa ko kuimba’e oúva ñande rógape okaru haguã, peteï Tupä maranduhára marangatuha. Jajapóna ñande róga ári peteï koty ichupe guarã. Ñamoĩta ichupe hupa, imesa, apyka ha hesapeharã. Upéicha oguahẽ ramo ñande rógape ikatúta opyta upépe.

Peteï ára, oguahẽ ramo ikotýpe opyta haguã oke, Eliseo he’i hembiguái Gehasípe:

Mba’éiko ikatu jajapo hese?

Ndaikuaái, –he’i Gehasi–. Naimembýi niko, ha iména itujáma.

Ehenói ichupe, –he’i Eliseo.

Pe tembiguái ohenói ichupe ha pe kuña opyta oñembo’y ikoty rokẽme. Upéma ramo Eliseo he’i ichupe:

Pe áño oúvape guarã, ko’ã ára rupi rerekóta ne memby nde jyva ári.

Tupä Ñandejára Ñe’ẽ.

Todos: Romomba’e guasu ndéve, Ñandejára.

SALMO ÑEMBOHOVÁI   89, 2-3. 16-19

R. Tupä, opa ára aropurahéita ne mborayhu tuichaiteha

Tupä, opa ára aropurahéita ne mborayhu tuichaiteha.

Opavavépe aikuaaukáta nde reko jeroviaha.

Aikuaaukáta ne mborayhu mba’e opa’ỹvaha,

Nde reko jeroviaha naiñambueivaha

naiñambueiháicha upe yvága. R.

Che Jára, ovy’aite va’erãpa pe tetã torypápe ne momba’e kuaáva,

ha oguatáva nde resa renondépe, nde rérape ovy’a opa ára,

ha nde reko joja omokyre’ỹ ichupekuéra. R.

Nde remombarete ha rembotuicha ichupe,

ha remombareteve katu nde py’a porãgui hendive.

Ore Jára, nde remoĩ oñangareko va’erã ore rehe,

remoĩ oréve ore ruvicharã nde ha’égui imarangatúva. R.

LECTURA MOKÖIHA:     

Ñahendúta Tupä Ñandejára Ñe’ẽ San Pablo ohai va’ekue Roma guápe

6-3-4. 8-11

Che pehenguekuéra:

Ndapeikuaái piko peë, jajoajúvo Jesucrísto rehe ñemongarai rupi, jajoajuha imano rehe? Ñemongaraípe niko Jesucrísto  ndive ñañeñotỹ, ha ñamano ñañemoingove jevy haguã, ha jarohasa peteï jeikove ipyahúva, Jesucrístope omoingove jevy haguéicha Tupä ñande Ru pu’aka mimbipa.

Ñande ñamano ramo Jesucrísto ndive, jajerovia hendive avei jaikovetaha. Jaikuaa, oikove jevývo Jesucrísto nomano mo’ã veimaha. Pe mano ndaipu’aka mo’ã véima hese. Jesucrísto omanóvo, omano angaipápe guarã, ha oikovévo, oikove Tupäme guarã. Upéicha avei peë, pejerereko omanóva ramo angaipápe guarã, ha oikovéva ramo Tupäme guarã, Jesucrísto  ndive pejoaju rupi.

Tupä Ñandejára Ñe’ẽ.

Todos: Romomba’e guasu ndéve, Ñandejára.

ALELUIA  1Ped 2, 9

Aleluia.

Peë niko ñemoñare ojeporavo pyre, mburuvicha guasúpe guarã pa’i rembiapo, peteï tetã imarangatúva, Tupä ojogua va’ekue imba’erã. Ha upéva péicha, pemombe’u haguã mba’e hechapyrãva Tupä rembiapokue, pene renói va’ekue pesẽ haguã pytũhagui ha peike imba’e rendy hechapyrãvape.

Aleluia.

EVANGELIO

Marandu porã Ñandejára Hesukrísto rehegua San Mateo omombe’u háicha

10, 37-42

El pueblo aclama: Romomba’e guasu ndéve, Ñandejára.

Upérõ Hesu he’i idisípulokuérape:

        Pe itúva térã isýpe ohayhuvéva che hegui, ndikatu mo’ãi oiko che disípulo ramo. Pe ohayhuvéva ta’ýra térã tajýra che hegui, upéichante avei.  Ha pe ohupi’ỹva ikurusu ijapére che moirũ haguã, péva ndaha’éi che rehegua.  Pe hekovére hakate’ỹva, omanóta. Pe omanóva che rehehápe katu, ojesalváta.

         Oĩ ramo pene moguãhẽ porãva, chéve che moguãhẽ ramo guáicha hína. Ha upe chéve che moguãhẽva, omoguãhẽ avei che mbouharépe.  Umi profétape omoguãhẽva katu, proféta haguérente pe oguãhẽva, umívape Ñandejára ome’ẽta pe ha’e ome’ẽva proféta kuérape.  Oĩ ramo ymínte jepe ome’ẽva che disípulope, michĩvévape jepe, che ha’e peẽme, Ñandejára ndahesarái mo’ãiha chugui.

Ñandejára Jesucrísto Ñe’ẽ.

Todos responden: Romomba’e guasu ndéve, Ñandejára Hesukrísto.