SÁBADO SEMANA XII TO

Ko’ágä   ñahendúta Tupã Ñandejára ñe’ẽLamentaciones arandukápe oĩ háicha         

         2, 2. 10-14. 18-19

Tupä Ñandejára ohundipa ite oiporiahuvereko’ỹ rehe

ógakuéra Israel pegua.

Ipochýpe oitypa ite umi óga yvate Judá pegua.

Yvýre oity ha ojejapo’ỹva ojapo Israel ha huvicha kuérare.

Moakãhára  kuéra Sión pegua yvýpe oguapy ha okirirĩ.

Yvyku’i omosarambi iñakã ári kuéra, ha ao vosakuépe oñemonde.

Kuñataĩ pyahu kuéra Jerusalén pegua yvýre iñakã omboja.

Umi che resa tasëgui ikane’õ, che py’a ryepy hakuvopa, ha che py’a yvýre ho’a ahechávo mba’éichapa oñehundi táva che retã megua, ha umi mitã ha umi okambúva ikangypa ramo upe okáre táva pýre.

Umíva oporandu isy kuérape: “Moõ piko oĩ ja’u va’erã?”

Ha ikangypágui, yvýre ho’a umi okáre upe táva pýre, ha upéi isy jyva ári ipytupa.

Mávare piko rombojojáta?

Máva piko ndéicha, táva Jerusalén?

Mávare piko rombojojáta, táva Sión, romyangapyhy haguã?

Ku yguasu tuicha háicha, upéicha rejecha vai.

Máva piko ne mongueráta?

Umi pene maranduhára he’íva peẽme ohechaha, umíva ijapu ha ne mbotavy.

Ndohechaukái ndéve ne rembiapo vaikue ani haguã reñemyakãsã.

Umi ha’e kuéra he’íva peẽme ohechaha, umíva japu memete ha ne mbotavy.

Pende py’a ite guive pesapukái Tupä Ñandejárape, peẽ korapy yvate kuéra táva Sión pegua.

Eheja nde resay tosyry, tosyry pyhare ha arakue, ku ysyrýicha.

Ani rejokose ne rasẽ, térã remombytu’u nde resa ra’ỹi.

Epu’ã ha esapukái upe pyhare pyte.

Guárdia oñepyrũ vove esapukái.

Tupä Ñandejára renondépe ýicha eñohẽ upe nde py’a jopýva.

Umi nde po emopu’ã ichupe rejerurévo

Mitã nguéra rehe ikangypáva ñembyahýigui umi tape ojuasaha rupi.

Tupã Ñandejára Ñe’ẽ.

SALMO ÑEMBOHOVÁI                73, 1-7. 20-21

R. Tupã Ñandejára aníke nde resarái umi imboriahúvagui

Háa Tupã! Mba’ére piko ore mboyke opa árape guarã,

ha nde pochy nde ovecha kuéra ndive?

Ne mandu’a kena ne retãre, ne mba’erã rejogua va’ekue yma,

ha Sión rehe, reiporavo va’ekue reiko haguã. R.

Eju, ehecha, nde róga ojeitypa va’ekue,

opa mba’e tupaópe oĩva umi nde rayhu’ỹva ohundipa.

Nde rehe oñemoĩva okororõ umi ne momba’éva ijatyhápe,

ha upépe ohupi ipoyvi veve mba’e rechaukaha ramo. R.

Oity ramo guáicha ka’aguy, umi ne momba’éva ijatyhápe,

ha upépe ohupi ipoyvi veve mba’e rechaukaha ramo.

Oity ka’aguy, hácha ha machétepe umi yvyra ohundi.

Ohapy nde tupao yvýre oitypa, upéicha nde rérare ojahéi. R.

Ne mandu’a pe ñe’ẽre ñame’ẽ va’ekue ojupe,

ko yvy niko henyhẽ oporojukávagui.

Ikangýva ani oikótei tĩndy hápe,

imboriahu ha oiko asýva tomomorã nde réra. R.

ALELUIA Mt 8, 17

Aleluia.

Cristo ojapyhy ñande reko kangykue

ha ohupi ijapére ñane mba’asy eta.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                               

        8, 5-17

Upe ramo Jesús oikévo táva Cafarnaúmpe, peteĩ mburuvicha Romagua oñemboja hendápe. Ojerure Jesúspe oipytyvõ haguã ichupe he’ívo: Karai, che rembiguái niko oime ógape. Ijapapa ite ha oñeno hasy ete.

Jesús he’i ichupe: Aháta amonguera ichupe.

Pe ñorairõhára ruvicha katu he’i: Karai, máva piko che, nde reike haguã che rógape? Eréntena okuerataha, ha che rembiguái okueráta. Che niko aĩ mburuvicha poguýpe, ha areko avei che po guypegua. Ha peteĩme ha’érõ oho haguã, upéva oho. Ambuépe ha’érõ ou haguã, upéva ou. Ha ha’érõ che rembiguáipe ojapo haguã ha’éva, ojapo.

Jesús ohendúvo upéva tuicha oguerohory, ha he’i umi hendive oĩvape: Añetehápe ha’e peẽme, Israelgua kuéra apytépe jepe ndajuhúiva péicha ite peve ojeroviáva Tupã Ñandejárare. Ha ha’eve peẽme: Heta oĩ oútava kuarahy resẽguio ha kuarahy reikéguio ha oguapýtava mesápe Abraham, Isaac ha Jacob ndive pe karu guasúpe oikótava Tupã Ñandejára oporosãmbyhy vove yvágape. Umi oĩ va’erã mo’ã va’ekue upépe katu, oñemosẽta okápe pytũmbýpe. Ha upépe ojahe’o soróta ha hãi mante omopururũta.

Upéi Jesús he’i pe ñorairõhára ruvichápe: Tereho nde rógape, ha upe rerovia haguéicha toiko ndéve.

Ha upepete okuera pe hembiguái.

Jesús oho Pedro rógape ha upépe ojuhu Pedro rembireko sýpe oñenóva tupápe, iñakãnundúgui. Ha opokóvo ipóre, pe akãnundu opi ichugui . Upépe ha’e opu’ã ha oñemoĩ ohecha mba’épa Jesús oikotevẽ.

Ha oguahẽvo pyhare, ojereraha Jesús rendápe heta oĩva mba’e pochy poguýpe. Iñe’ẽ mente Jesús omosẽ umi mba’epochy ha omonguera avei opa hasývape. Kóicha ojehu, oiko haguã heko itépe maranduhára Isaías kuatiañe’ẽ he’íva: “Ha’e oipe’apa ñande hegui ñane mba’asy ha ogueraha opa mba’e hasýva ñandéve.”

Ñandejára Jesucristo Ñe’ẽ