DOMINGO SEMANA XIX TO

LECTURA PETEÏHA:

Ko’ágä ñahendúta Tupä Ñandejára ñe’ẽ Reyesaranduka peteïhápe oĩ háicha  19, 9. 11-13a

Elías oguahẽvo Tupä yvyty Horébpe oike peteï ita kuápe ha upépe ohasa pe pyhare. Tupäñe’ë oguahë ichupe.

Ñandejára he’i ichupe: “Esẽ okápe ha epyta eñembo’y che renondépe yvyty ári”.

Upérö  ohasa Ñandejára. Ha peteï yvytu ne ratã ha ne mbaretéva omboja’o pe yvyty ha ojoka umi ita Ñandejára renondépe; Ñandejára katu noĩri pe yvytúpe. Pe yvytu rire oiko yvy ryrýi ha Ñandejára noĩri avei pe yvy ryrýipe. Pe yvy ryrýi rire oiko tata rendy ha pe tata rendýpe noĩri Ñandejára. Tata rendy rire katu oñehendu yvytu oipeju vevúi asýva. Ohendúvo upéva Elías oñomi hova ijahojápe ha osẽ opyta pe itakua renondépe.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 85, 9-14

Opavave: Ñandejáraore poriahuvereko kena ha oresalva.

Agueroayvúta Ñandejára he’íva:

Ha’e he’i ome’ẽtaha py’a guapy hetãme

ha umi hese ojeroviávape

Hi’aguĩ ára ha’e oguenohẽ haguã jejopy vaígui

Ñandejára, nde reko mimbipa ojekuaáne ore yvýpe. O.

Mborayhu ha añete oñuguãitĩne,

py’a guapy ha teko joja oñoañuáne.

Añete heñóine upe yvýgui,

ha teko joja yvágagui oma’ẽne. O.

Ñandejára, ha’ete voi ome’ẽta ñandéve iporãva,

ko ñande yvy ome’ẽta hi’a.

Teko joja ohóne henonderã,

ombosako’ívo ichupe háperã. O.

LECTURA MOKÖIHA:     

Ñahendúta Tupä Ñandejára Ñe’ẽ San Pabloohai va’ekue Roma guápe                             9, 1-5

Che pehenguekuéra:

Jesucrísto  reroviaha che rekópe, ha’e añetegua, nda che japúi. Upéi ave, che akã, oisãmbyhýva Espíritu Santo, he’i chéve añeteha: ajepy’apy manterei ha che py’ápe areko peteï ñembyasy opa’ỹva, hi’ãnte chéve che voi ajeharu, ajei Jesucrístogui, upéicha aipytyvõta ramo che pehẽnguekuéra umi che retãguávape.

Ha’ekuéra niko Israel ñemoñare, ha Ñandejára oguereko ichupe kuéra ita’ýrarõ. Tupä Ñandejára oĩ va’ekue ijapytépe kuéra heko mimbipa reheve, ha oñoñe’ẽ me’ẽ hendive kuéra, ome’ẽ ichupe kuéra Moisés rembiapoukapy, Ñandejára rayhu kuaa ha iñe’ẽ. Ha’e kuéra niko ñande ru kuéra ypykue ñemoñare, ha ichugui kuéra, yvypóra rekópe, ou pe Mesías, Ñandejárava opa mba’e ári, oñemomba’e guasúva opa ára. Amén.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA         130, 5

Aleluia.

Che py’a ite guive aha’arõ Tupä Ñandejára che pytyvõ haguã,

ha arovia upe iñe’ẽ ha’e ome’ẽva chéve.

Aleluia.

EVANGELIO

Marandu porã Ñandejára Hesukrísto rehegua San Mateo omombe’u háicha14, 22-33

Opavave: Romomba’e guasu ndéve, Ñandejára

UpérõJesús he’i idisípulo kuérape pya’ete ojupi haguã kanóape ha ohasa haguã hikuái henonderã lágo mboypýri. Upe aja ha’e opytáta omondopa haguã opavavépe hógape.Ohopa rire hikuái, Jesús ojupi peteĩ sérro ru’ãme oñembo’e haguã ha’eño. Pyhare oguãhẽvo, Jesús oĩ gueteri hína upépe ha’eño. Upe aja katu, pe kanóa oguãhẽma pe y mbyte rupi. Ohuvãitĩ ohóvo hikuái yvytu, ha pe y pochy oñenupã pe kanóa tĩre. Ko’ẽmbotávoma, oñemboja sapy’a Jesús hendápe kuéra, oguata oúvo y apére ra’e hína. Idisípulo kuéra katu ohechávo oguatáva oúvo hína y apére, tuicha oñemondýi. Ha okyhyjégui osapukái: — Cháke póra.

Jesús katu oñe’ẽ chupe kuéra, ha he’i: — Chénteko hína. Ani pekyhyje.

Upérõ Pedro osẽ he’i: — Mbo’ehára, nde ramo añete, eheja chéve taha ne rendápe y apére.

Jesús he’i chupe: — Eju.

Upépe, Pedro oguejy pe kanóagui ha oñepyrũ oguata pe y apére ohóvo Jesús rendápe.  Oñandúvo pe yvytu hatã oipeju katu okyhyje sapy’a, ha oñepyrũ oñapymi. Upépe osapukái: — Mbo’ehára, cháke ajahogátako.

Upévo Jesús ombohasa ichupe ipo, ha he’i chupe: — Rejerovia’iete piko ra’e che rehe. Mba’éreiko reduda ha rekyhyje.

Ha ojupívo mokõivéva pe kanóape, opi sapy’a pe yvytu. Umi kanóape opyta vaekue katu oñesũmba Jesús renondépe, ha he’i chupe: — Nde niko añete Ñandejára Ra’y ra’e.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.