JUEVES SEMANA XX TO

Ko’ágä   ñahendúta Tupã Ñandejára ñe’ẽEzequiel arandukápe oĩ háicha                         36, 23-28

Tupã Ñandejára he’i:

Che ahechaukáta tetã nguéra apytépe che Réra guasu ete imarangatuha, peẽ peiko va’ekue  pemongy’a ipa’ũme nguéra. Ágä péicha ajapóvo, maymáva ohecha kuaáta cheha Tupã Ñandejára.” Che, Tupã, ha’e upéichaha.

“Che poguenohẽta opa umi tetã peimehágui. Pomboatýta ha pombojevýta pende yvýpe. Pojohéita y iky’a’ỹvape, pomopotĩta opaichagua mba’e ky’águi, poiky’a’óta umi peja haguégui tupã gua’u ta’ãnga rei rehe; amoĩta pende pype peteĩ py’a ipyahúva ha peteĩ ánga ipyahúva.

Aipe’áta pende hegui pe py’a hatãva itáicha ha amoĩta peẽme peteĩ heko ñarõ’ỹva. Amoĩta pende pype che ánga ha ahejáta pejapo opa che rembiapoukapy; peikóta tetã ame’ẽ va’ekuépe pende rúpe, ha peẽta che retãgua ha che pende Járata.

Tupã Ñandejára Ñe’ẽ.

SALMO ÑEMBOHOVÁI   50, 12-15. 18-19

R. Tupã Ñandejára, embopyahu che rekove

Tupã Ñandejára, embopyahu che rekove ha ta imarã’ỹ,

che py’a to ñembopyahu ha ta imbarete.

Anítei che mosẽ ne renondégui,

térã reipe’a che hegui nde pytu marangatu. R.

Embopyahu jevy chéve vy’a añandúva ajejopy vaihágui

che renohẽvo, nde rape rehechaukáne iñangaipávape,

ha heko vaíva ojevýne ne rendápe.

Nde rehecha ramói mba’e kuave’ë. R.

Ndéve aikuave’ẽ ramo, naiporãi ndéve.

Amymba hapy ramo, nde rehecha ramói.

Taikuave’ẽna ndéve py’a rasy oñemomichĩva,

upéva katu rehecha ramo Tupã Ñandejára. R.

ALELUIA Cf. Sal 94, 7d. 8a.

Aleluia.

Pe hendu ramo Tupä Ñandejára ñe’ë, ani pe mohatä pene korasö.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                        22, 1-14

Upe ramo Jesús oiporu jevy ñe’ẽ mbojoja oñe’ẽ haguã opavavépe.

He’i ichupe kuéra: Tupã Ñandejára sãmbyhy yvágape oĩva niko kóicha. Oĩva’ekue  peteĩ mburuvicha guasu ojapo va’ekue  karu guasu ta’ýra omendáta haguére.

Omondo hembiguái kuérape ohenói haguã umi ojejerure va’ekuépe ou haguã. Ha’e kuéra katu ndouséi. Omondove jevy upéi hembiguái kuérape, he’ívo ichupekuéra: “Peje umi ojejerure va’ekuépe ou haguã, oĩmbamaha tembi’u ojekaru haguã. Peje ichupe kuéra ajukaukáma hague che rymba kuéra ikyravéva, ha oĩmba itemaha ha’e kuéra ou haguãicha karu guasuhápe.”

Umi ojejerure va’ekuépe ou haguã katu mba’eve ndoikuaaséi. Peteĩva oho ohecha ijyvy, ambue katu oho iñemuháme, ha umi hembýva katu ojeity umi mburuvicha guasu rembiguái ári, ha oinupã ojuka peve. Upérõ pe mburuvicha guasu ipochy eterei.

Omondo iñorairõhára kuéra ojuka haguã umi hembiguái jukaharépe ha ohapypa hagua itáva kuéra. Upéi katu he’i hembiguái kuérape: “Oĩmba itéma karu guasu che ra’y mendarã. Umi ajerure va’ekuépe ou haguã niko ndaijái voi kuri che rógape ou haguã. Tapeho aipo ramo umi okáre ha peje pejuhúvape ou haguã ko karu guasuhápe. Umi hembiguái osẽ pe okáre ha omboaty opa ojuhúvape. Heko potĩ ha heko vaíva peteĩcha oho, ha péicha ou omoenyhẽ hikuái pe óga.

Upéi katu pe mburuvicha guasu oike ohecha haguã umi ou va’ekuépe, ha ohecha peteĩ kuimba’épe omonde’ỹva’ekue  mendahápe guarã ao. He’i ichupe: “Che irũ, mba’éicha piko reike ko’ápe remonde’ỹre mendahápe guarã ao?” Pe kuimba’e katu okirirĩnte. Upérõ pe mburuvicha guasu he’i hembiguái kuérape: “Peipykua ha peipokua, ha pemombo okápe iñypytũháme. Upépe ta hasẽ ha hãi to mopururũ.”

Ha Jesús oñe’ẽmbávo he’i: Hetápe niko ojejerure ou haguã, ha mbovýpe ojeporavo.

Ñandejára Jesucristo Ñe’ẽ.