DOMINGO SEMANA XXIII TO

LECTURA PETEÏHA:

Ko’ágä ñahendúta Tupä Ñandejárañe’ẽ Ezequielarandukápe oĩ háicha               33, 7-9

Péicha oñe’ë Tupä Ñandejára:

Ndéve niko, nde kuimba’e, romoĩ kuri reñangareko haguã Israel rehe. Ne ñe’ẽ rendu va’erã mo’ã chéve, ha reporomomarandu cháke ha’éramo. Ikatu niko oime che ha’e ra’e peteï heko añáva ojejuka va’erãha; ha néi, nde nereñe’ẽi ramo hendive omyengovia haguã heko vai ha ha’e nomyengoviái, upe heko añáva omanóne hembiapo vaikue rehe, ndéve katu ajeruréne rehepyme’ẽ haguã chéve upe omanóva rehe.

Nde ere ramo katu peteï heko añávape oheja haguã heko vaikue, ha ha’e ndo hejái, ha’e omanóta hembiapo vaikue ojerure háicha, nde katu reikovéta”.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 94, 1-2. 6-9

Opavave:Pehendu nga’u ra’e Ñandejára Ñe’ẽ.

Peju japurahéi Ñandejárape vy’a pópe

Japurahéi upe jejopy vaígui ñane renohẽvape.

Ñaguahẽ hendápe ha ichupe ñamomba’e, ichupe japurahéi.O.

Peju ñañesũ ha ñamomba’e guasu ichupe.

Ñañesũ ñande apohare,Ñandejára renondépe.

Ha’e hína Tupä Ñandejára, ñande katu hetãgua

ha ovecha iñu megua. O.

Pehendu nga’u ra’e he’i ramo:

“Ani pende py’a ratã Meribápe guaréicha,

Masápe pejapo haguéicha, yvy ojeiko’ỹháme.

Upérö  pende ru kuéra ypykue opu’ã va’ekue che rehe

ohecha ramo jepe umi mba’e ajapo va’ekue. O.

LECTURA MOKÖIHA:     

Ñahendúta Tupä Ñandejára Ñe’ẽ San Pablo ohai va’ekue Roma guápe            13, 8-10

Che pehenguekuéra:

Ani oime peiporu va’ekue pemyengovia’ỹva. Pejoayhu va’erãhágui ani pende resarái. Pe ohayhúva hapichápe ojapóma tembiapoukapy he’íva. Tembiapoukapy kuéra he’i: “Ani remoakãratĩ ne rembirekópe, ani reporojuka, ani reporomonda, ani reipota opa mba’e”.

Ãva ha umi ambue tembiapoukapy, opyta ko’ãva ko’ã ñe’ẽ ryepýpe: “Ehayhu nde rapichápe rejehayhu háicha ndete”. Mborayhu oguerekóva ndojapo vaíri hapicha rehe. Aipo ramo, mborayhúpe oikóva ojapopa porã hína umi tembiapoukapy.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 2 Cor 5, 19

Aleluia

Cristo rupi Tupä Ñandejára ñane moingo porã

jevy hague hendive, oheja reívo yvypóra angaipa,

ha ome’ẽvo ñandéve iñe’ẽ ojeiko porã jevy haguã hendive.

Aleluia.

EVANGELIO

Marandu porã Ñandejára Hesukrísto rehegua San Mateo omombe’u háicha 18, 15-20

Opavave: Romomba’e guasu ndéve, Ñandejára

Uperõ Jesús he’i idiśipulokuérape: Nde rapicha ojapórõ nde rehe ivaíva, eñe’ẽ chupe ha’eñoháme. Ehechauka chupe moõpa ojavy. Ne rendu ramo, pepyta porã jeýne. Na ne renduséirõ katu, ehenói peteĩ térã mokõime, tohendu opa pejéva. Ñandejára ñe’ẽme niko he’i opa mba’e oje’éva, oje’e vaerã mokõi térã mbohapy rovake. Ha chupekuéra nohenduséirõ katu, eikuaauka opavave rovake tupaópe. Ha upépe nohenduséirõ katu, pereko chupe pende rehegua’ỹva ramo térã impuésto ocobráva Rómape g̃uarãicha ramo.

Añete ha’e peẽme, opa mba’e peẽ peñapytĩva ko yvy ári, Tupã oñapytĩta yvága guive. Ha opa mba’e peẽ pejoráva ko yvy ári, Tupã ojoráta avei yvága guive.

Ha’e porãta peẽme, mokõi peñemoĩrõ peteĩ ñe’ẽme pejerurévo oimeraẽ mba’e che Ru yvágape oĩvape, ha’e ome’ẽ vaerã peẽme. Ha mokõi térã mbohapy oñembyatýrõ che rérape, upépe aiméta che, hendivekuéra.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.