DOMINGO SEMANA XXXIV TO

LECTURA PETEÏHA:

Ko’ágä ñahendúta Tupä Ñandejára ñe’ẽ Ezequiel arandukápe oĩ háicha       34, 11-12. 15-17

Che, Ñandejára, ha’e: Péina ápe aime! Chete aháta aheka ha añangareko che ovecha kuéra rehe. Pe ovecha rerekua ojepy’apýva ijovecha kuéra rehe isarambipa ramo, péicha ajepy’apy che ovecha kuéra rehe; anohẽmbáta umi isarambipahágui ára vai ha yvytu ratãme. Chete añangarekóta che ovecha kuéra rehe. Chete araháta opytu’u haguãme”. Che, Tupä, ha’e upeichataha.

 “Ahekáta umi ovecha okañy va’ekue, arúta umi hape avy va’ekuépe, aipohanóta umi hetymapẽvape ha hasývape, aipytyvõta umi ikangyvévape ha ajukapáta umi ikyra ha imbaretétevape. Che añangarekóta hesekuéra teko jojápe”. Che, Tupä, ha’e: “Pehendu, che ovechakuéra: che ambojovakéta peteïcha ovecha, ovecha ndive. Kavara, kavara ndive.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI         22, 1-3. 5-6

Opavave: Ñandejára che rerekua, mba’eve naikotevẽi.

Tupä Ñandejára che rerekua, mba’eve naikotevẽi.

Ñu rovyũ asýpe che mombytu’u,

y satĩ ypýpe che moguahẽ che mombarete jevy,

ha tape hekópe guáre che reraha héra rehehápe. O.

Karu guasu chéve rejapo umi che rayhu’ỹva rovake.

Che akã rehe reñohẽ mba’e ryakuã asy,

ha upe hay’uha remyenyhẽ chovi. O.

Ne mborayhu ha ne mba’e recha kuaa,

rehechauka chéve aikove aja pukukue,

ha nde rógape Tupä Ñandejára, aikóne opa árape. O.

LECTURA MOKÖIHA:       

Ñahendúta Tupä Ñandejára Ñe’ẽ San Pablo ohai va’ekue ikuatia peteïhápe Corinto guápe

          15, 20-26. 28

Añetehápe katu, Cristo oikove jevy. Ha’e niko koga’a oñemono’õ tenondéva. Pe tenonde oikove jevy va’ekue. Peteï yvypóra rupi ou haguéicha ñemano, ambue rupi ou pe omanóva jeikove jevy. Adán rupi opavave omano ramo, Cristo rupi opavave oikove jevy va’erã.

Peteï teĩ hendaguãme, hembiapo kuéra kue ojerure háicha: Cristo tenonderã, upéi, Cristo ou jevy vove, umi heseguáva. Upévo oguahẽta pe ára paha, Cristo ohundipahápe opaichagua pu’aka ha mburuvicha, ha ombohasa ñesãmbyhy Tupä, ñande Ru, pópe.

Cristo oisãmbyhy va’erã opa ija’e’ỹva hese oñemoĩmba peve ipyguýpe. Ha pe ipaha ite oñehundítava, upéva hína pe ñemano.

Ha oĩmbámarõ opa mba’e Cristo pyguýpe, upépe Cristo voi, Ta’ýra, oñemoĩta Tupä Ñandejára poguýpe, pe omoĩmba va’ekue Cristo poguýpe opa mba’e. Upéicha ramo, Tupä Ñandejára ha’epáta opa mba’épe.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA      Mc 11, 9. 10

Aleluia.

Umi tenondete ohóva ha umi tapykue pegua, oñepyrũ osapukái:

Ñandejára to ñemomba’e  guasu! To ñemomba’e  guasu Ñandejára rérape oúva!

Aleluia.

EVANGELIO

Marandu porã Ñandejára Hesukrísto rehegua San Mateo omombe’u háicha 25, 31-46

Opavave: Romomba’e guasu ndéve, Ñandejára.                                  

Upérõ Jesús he’i:  Ágã che ajuha ára mburuvicha guasúicha, aju vaerã Ñandejára ángelkuéra ndive. Ha ajúne aguapy karai guasúicha.  Ha héntekuéra opa hendágui oúne oñembyaty che renondépe. Ha upépe che aipe’áta ojuehegui umi heko porãva heko vaívagui, ku ovecha rerekua oipe’aháicha ojuehegui ijovecha ha ikavara.

Umi heko porãva amoĩne che akatúa gotyo ha umi heko vaíva katu che asu gotyo.  Upépe che ha’éta umi heko porãvape, “Peju, peẽme niko che ru pende rovasa. Peju ha peñemomba’e Ñandejára Rréinore, ha’e voi niko ojapo va’ekue peẽme guarã iñepyrũmbýpe.  Che ñembyahýi ramo guare niko, peẽ che mongaru va’ekue.

Che yuhéi ramo, peẽ che mboy’u. Ha aiko ramo mombyrygua ramo, peẽ che moguãhẽ vaekue pende rógape.  Che opívo ramo, peẽ che monde vaekue. Che rasy ramo, peẽ che andu. Préso ajereraha ramo, peho vaekue che rendápe.”

   Upévo, umi heko porãva he’íne chéve, “Ñandejára, araka’e piko rohecha neñembyahýi ramo ha romongaru. Araka’e piko rohecha nde yuhéi ha romboy’u.  Araka’e piko romoguãhẽ mbohupa ramo ore rógape. Araka’e piko nde opívo ha romonde.  Araka’e piko ndéve rohecha nde rasy ramo, térã rejeapresa ramo ha roho ne andúvo.”  Ha che ha’éne, “Añete ha’e peẽme, opa mba’e pejapo vaekue che ryvy kuéra michĩvévare, che rehe pejapo ramo guáicha vaekue.”

   Upéi katu ha’éne umi heko vaívape, “Pejei chehegui. Ñandejára ojahéima pende rehe. Tapeho pe tata ogue’ỹvape oñembosako’i vaekue Aña ha iñirũ nguérape.  Che ñembyahýi ramo, na che mongarúi va’ekue peẽ.

Che yuhéi ramo, na che mboy’úi.  Che retãgui asẽ ramo, na che moguãhẽi vaekue pende rógape. Che opívo ramo, na che mondéi va;ekue. Che rasy ramo ha ajeapresa ramo, na che andúi va’ekue peẽ.”

Upépe ha’ekuéra he’íne chéve, “Ñandejára, araka’eve niko ndorohecháiva neñembyahýi ramo, térã nde yuhéi ramo. Araka’eve ndoroikuaái resẽ hague ne retãgui térã nde opívo hague, térã nde rasy, térã reho hague préso.”  Ha che ha’éne chupe kuéra, “Añete ha’e peẽme, opa umi mba’e ndapejapói vaekue peteĩva umi michĩvévare, che rehe ndapejapói ramo guaréicha.”  Opa umi heko añáva oñehundíta aña retãme. Umi heko potĩva katu oguerekóta tekove opa’ỹva.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.