DOMINGO TERCERO DE ADVIENTO

LECTURA PETEÏHA:
Ko’ágä ñahendúta Tupä Ñandejára ñe’ẽ Isaías arandukápe oĩ háicha 61, 1-2a. 10-11

Ñandejára espíritu oĩ che pype, che poravo hague rehe imba’erã. Ha’e che mondo araha haguã ñe’ẽ iporãva mboriahukuérape, ambopy’a guapy haguã ojepy’apývape, amomarandu haguã isãsotaha oikóva iñapytĩmby ha ojepoitaha iñakã sãvagui, amyerakuã haguã Tupä Ñandejára ára ou porãva opavavépe.

Che renyhẽ py’a rorýgui Tupã Ñandejára imba’e porãgui!
Opa apopo Tupã Ñandejára che rayhúgui!
Ha’e che mosãso hague rehe ha che moingo teko jojápe.

Ajogua ku menarã oñemonde katéva térã tembirekorã imba’e jeguágui henyhẽva.

Yvýpe hoky háicha umi mba’e reñói ha opu’ã háicha umi yvotyty, péicha Tupã Ñandejára omoheñóita teko joja, ha ha’e ojererohorýta opa tetã renondépe.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI Lc 1, 46-50. 53-54
Opavave: Che ánga oguerohory Ñandejára

María he’i: Che ánga oguerohory Ñandejára ipu’akapávape;
che espíritu hory Tupä, che pysyrõhára ndive. O.

Tupä omoĩ hesa che, hembiguaimi rehe, ha águi rire opa ára
añehenóine ovy’áva. O.

Pe Ipu’akapáva ojapógui mba’e guasuete che pype. Héra imarangatu!
Tupä oiporiahuvereko opa ára umi ichupe omomba’e guasúvape. O.

Omyenyhẽ mba’e porãgui umi iñembyahýivape, ha po nandi omondo
umi imba’e retávape. O.

Oipytyvõ hembiguái Israélpe, ha ndahesaráiri oiporiahuvereko haguã. O.

LECTURA MOKÖIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩhápe Tesalónica guápe5, 16-24

Pevy’a tapiáke. Peñembo’e mantéke. Peme’ẽ pende aguyje Ñandejárape opa mba’e rehe, upéva pe ha’e oipotáva pende hegui, peë Jesucrísto reroviaha.

Ani pembogue Espíritu rata. Ani pejahéi marandu kuaáre. Peha’ã opa mba’e ha pejoko pe iporãva. Pejei opaichagua mba’e vaígui.

Ñandejára voi, pe Tupã py’a guapy me’ẽhára, to japo pende hegui imarangatu etéva, ha toheja peẽme opa pende reko, pende espíritu, pene ánga ha pende rete, mba’evépe ivai’ỹ rehe, Ñandejára Jesucrísto ou ramo guarã. Pe pene renóivako ome’ëma va’ekue iñe’ẽ, ha ojapo va’erã opa ko’ã mba’e.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Is 61, 1

Aleluia.
Ñandejára espíritu oĩ che pype,
Ha’e che mondo araha haguã ñe’ẽ iporãva
mboriahukuérape
Aleluia.

EVANGELIO
Marandu porã Ñandejára Hesukrísto rehegua San Juan omombe’u háicha 1, 6-8. 19-28

Opavave: Romomba’e guasu ndéve, Ñandejára.

Upe ramo Ñandejára omondo hembiguái peteĩme, hérava Juan Bautista. Omondo chupe omombe’u haguã opavavépe mávapa pe ohesapéva, ha opa ohendúva chupe oguerovia haguã upe he’íva. Juan ndoúi vaekue ha’e ñande resape haguã. Oñembou vaekue katu, oñe’ẽ haguã mávapa upe ñande resapéva.

Umi poguasu judíokuéra apytepegua omondo pa’i ha Ñandejára mandamiénto hamba’e ombo’éva Juan rendápe. Oho porandu chupe mávapa ha’e.

Juan he’i porã chupekuéra: — Che ndaha’éi pe Mesías.

Oporandu jey chupe hikuái: —Mávaiko nde péicharõ. Ndéiko ndaha’éi proféta Elías mba’e.
Juan he’i: — Nahániri.

He’i chupe upémarõ hikuái: — Nde piko hína ku proféta ou va’erãva,

Juan he’i chupekuéra: — Nahániri.

He’i chupe hikuái: — Emombe’úpy oréve mávapa nde. Umi ore mbou vaekue niko oikuaase mávapa nde.

Juan he’i chupekuéra: — Che niko hína ku osapukáiva desiértore ha he’íva: “Pembosako’i Ñandejárape haperã”, he’i haguéicha yma proféta Isaías.

Umi ou va’ekue Juan rendápe oporandu chupe upémarõ: — Ndaha’éirõ nde pe Mesías, ha ndaha’éirõ proféta Elías térã ku ou va’erãva, piko mba’eichakue reporomongarai reikóvo.

Ha Juan he’i chupekuéra: — Che niko ýpente amongarai génte kuérape. Pende apytépe katu oĩ hína peteĩ peẽ peikuaa’ỹva, oútava che rire. Chéve nda’ijáiva ajora chupe isapatu sãnte jepe.

Opa ko’ã mba’e ojehu, Betánia puéblope, opytáva rrío Jordán ári, kuarahy resẽ gotyo.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.