DOMINGO TERCERO DE PASCUA

LECTURA PETEÎHA:
Ko’ágã ñahendúta Tupã Ñandejára ñe’ẽ Apóstolkuéra arandukápe oĩ háicha 5, 27-32. 40b-41

Oguahẽvo umi apóstolkuéra ojegueraha ichupekuéra mbojovakehára rendápe ha pa’i guasu he’i ichupekuéra: Ro’e porã va’ekue peëme ani haguã peporo mbo’eve pe kuimba’e reheguáva rehe. Peẽ katu pemyenyhẽ Jerusalén tuichakue pene mbo’epýgui ha hi’arive peityse ore ári pekuimba’e jejukakue.

Pedro ha apóstolkuéra he’i ichupe: Ore, ore ñe’ẽ rendu va’erã Ñandejárape yvypórape rangue. Tupã ñande ru ypykue Jára omoingove jevy va’ekue Jesúspe upe peẽ pejuka va’ekue pemosãingóvo kurusu rehe.

Ñandejára ohupi ichupe ha omoĩ ijakatúa gotyo, omoingóvo ichupe sãmbyhyhára ha pysyrõha ramo, ikatu haguã Israel retã ojevy Ñandejára gotyo ha ojeheja rei ichupe iñangaipa. Ore ko’ã mba’e rechahare, ha avei Espíritu Santo, Ñandejára ome’ẽva umi iñe’ẽ
rendúvape ichupe.

Oinupãuka ha he’i ichupekuéra anive haguã oñe’ẽ Jesús rérape. Upéi opoi ichuguikuéra. Apóstolkuéra osẽvo mburuvichakuéra rendágui ovy’aeterei Ñandejára ombojerovia hague rehe ichupekuéra, ohejávo ohasa asy hikuái Jesús réra rehe.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 29, 2. 4-6. 11-12a. 13b
Opavave: Romomba’e guasu che pe’águi jejopy vaígui.

Ñandejára, che romo mba’e guasu che pe’águi jejopy vaígui,
ha nde rehejáigui umi che rayhu’ỹva oñembohory che rehe.
Ñandejára, amanomahágui che moingove jevy,
che renohẽ omanóva ohohágui. O.

Peẽ, Ñandejára rehe pejeroviáva, pepurahéi ichupe.
Peropurahéi héra marangatu.
Tupã niko ndaipochy aréi, imba’e porã katu opa árape.
Pyharekue ñane rasẽ ramo, vy’a ñaroko’ẽ. O.

Ñandejára, che rendúke ha che poriahuvereko.
Che pytyvõke Tupã.
Ñandejára, che rasẽ niko remoengovia vy’ápe,
Tupã che Jára, ndéve apurahéi opa araite. O.

LECTURA MOKÕIHA:
Ñahendúta Tupã Ñandejára Ñe’ẽ Apocalípsis arandukápe oĩ háicha 5, 11-14

Upéi ama’ẽ ha ahendu heta Ñandejára remimbou ñe’ẽ, oĩva pe guapyha jere rehe, umi oikovéva ha umi karai myakãhára jere rehe. Heta iterei ndaipapahái, ha he’i hatã hikuái: “Pe Ovecha ra’y ojejuka va’ekuépe ija ohupitývo pu’aka ha mba’eta, arandu ha mbarete,
terakuã porã, teko mimbipa ha jererohory”.

Ha ahendu avei, opa mba’e Ñandejára ojapo va’ekue yvágape, yvy ári, yvyguýpe ha yguasúpe, he’i joa: “Pe guapyhápe oguapývape ha pe Ovecha ra’ýpe, to jererohory, toñemoerakuã porã, toñemboheko mimbipa ha taipu’aka opa ára guarã!”.

Umi irundy oikovéva katu ombohovái: “Amén!” Ha umi 24 karai myakãhára oñesũ ha omomba’e guasu.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN
Aleluia.
Oikove jevy Ñandejára Jesucrísto, opa mba’e apopyre ha oiporiahuverekóva hese ojeroviávape.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha 21, 1-19

Opavave: Romomba’e guasu ndéve, Ñandejára.

Upérõ Jesús ojechauka idisípulo kuérape lágo Tiberias rembe’ýpe. Kóicha ojehu, oĩ jave hína oñondive Simón Pedro, Tomás ku Gemelo ojeheróva, Natanael pe Caná Galiléaguáva, Santiago ha Juan, Zebedeo ra’y, ha mokõi Jesús disípulo avei. Pedro he’i chupe kuéra: — Aháta pirahápe.

Ha’ekuéra osẽ he’i chupe: — Rohóta ne ndive.

Ojupi hikuái peteĩ kanóape ha osẽ oho. Upe pyharépe ndoitýi hikuái mba’evete. Ko’ẽmbávo, Jesús oñembo’y hína pe y rembe’ýpe. Idisípulo kuéra katu ndoikuaái chupe.

Jesús oporandu chupekuéra: — Lo mitã, ndapeitýi piko mba’eve.
Ha’ekuéra he’i chupe: — Nahániri.

Jesús he’i chupe kuéra: — Peity pende rred pe kanóa akatúa gotyo, upépe heta pira.

Péicha ojapo hikuái, ha upéi nda’ipu’akái pe rred rehe henyhẽgui pirágui.

Upépe, ku Jesús disípulo ha’e ohayhúva, he’i Pédrope: — Ñandejára niko amóva.

Simón Pedro ohendúvo péva, pya’e oñemonde oĩgui opívo, ha ojepoi ýpe. Umi ambue Jesús disípulo katu oguãhẽ pe y rembe’ýpe kanóape. Ombotyry ohóvo hikuái pe rred henyhẽva pirágui. 100 metroha rupínte niko oĩ hikuái pe y rembe’ýgui. Oguejývo yvýpe, ojuhu hikuái tata ha hi’ári peteĩ pira, ha pan.

Jesús he’i chupekuéra:— Peru avei umi peity va’ekuégui.

Simón Pedro ojupi jey pe kanóape ha ombotyryry pe rred henyhẽva pira guasúgui y rembe’y peve. Oĩ ipype 153 pira ha ndosorói pe rred henyhẽ ramo jepe.

Upéi Jesús he’i chupe kuéra: — Peju perambosa.

Avave noñanimái oporandu chupe mávapa ha’e. Oikuaa niko hikuái Ñandejára Jesucristoha. Upéi katu Jesús ojagarra pe pan ha ombohasa chupekuéra, ha péicha avei ojapo pe pira reheve. Kóva niko mbohapy vése háma Jesús ojechauka hague idisípulo kuérape, oikove jey rire.

Orambosapa rire hikuái, Jesús oporandu Pédrope: — Nde, Simón, Juan Ra’y, ndéiko che rayhuve opa ko’ãvagui.

Pedro he’i chupe: — Hẽe, che Jára. Nde niko reikuaa rohayhuha.

Jesús he’i chupe: — Eñangareko che ovecháre.

Jesús oporandu jey chupe: — Nde, Simón, Juan ra’y, ndéiko che rayhu.

Pedro he’i chupe: — Hẽe, che Jára. Nde niko reikuaa rohayhuha.

Jesús he’i chupe: — Eñangareko che ovecháre.

Jesús oporandu jey voi chupe: — Nde, Simón, Juan ra’y, ndéiko che rayhu.

Pedro rehe oguapy Jesús oporandu jey haguére chupe, ha he’i:— Che Jára, nde niko reikuaa opaite mba’e. Reikuaa porã niko rohayhuha.

Jesús he’i chupe:— Eñangareko che ovecháre. Añete ha’e ndéve, yma ne mitãvérõ reñembosako’ími va’ekue ha reho mamo rehosehápe. Ágã nde tujávo katu, reipysóta umi nde jyva ha oĩta nde jokuáva ha nde reraháta hikuái rehose’ỹháme.

Péicha, Jesús he’ise hína chupe mba’éichapa omanóta ha mba’éichapa omomba’e guasúta Ñandejárape. Upéi Jesús he’i chupe: — Eju che moirũ.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.