DOMINGO TERCERO DE PASCUA

DOMINGO TERCERO DE PASCUA

Primera lectura:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha       2, 14. 22-33

Pedro oñembo’y umi 11 apóstol ndive ha oñe’ẽ hatã he’ívo: “Israelgua ha opa peikóva Jerusalénpe, peikuaáke kóva ha pehendu porã ko ha’étava peẽme:

Pehendu aipo ramo Israelgua ko ha’éva peëme: Peikuaa porã háicha, Tupã Ñandejára ohechauka va’ekue pende apytépe Jesús Nazaretgua pokatu, ojapóvo ha’e rupi heta hechapyrãva, oporomondýiva ha techaukarãva. Ha’e omoĩ va’ekue ichupe, hese ija’e’ỹva pópe, Tupã Ñandejára oguereko haguéicha iñakãme ha ha’e oipota haguéicha, Peẽ katu pejuka va’ekue ichupe pemosãingóvo kurusu rehe tekove aña po rupi.

Tupã Ñandejára katu omoingove jevy ichupe, oipe’ávo ichupe mano poguýgui, mano ndaikatúigui ipu’akávo hese. Mburuvicha guasu David, oñe’ẽvo Jesús rehe he’i va’ekue :

Che ahecha mantéva  Ñandejárape che renondépe.

Ha’e oĩgui che akatúape mba’eve nda che reitýi chéne.

Upéva rehe che py’a henyhẽ vy’águi ha apurahéi torypaitépe.

Aikóne kyhyje’ỹ rehe, nda che reja mo’ãigui che tyvy kuápe, térã oñembyai ne rembiguái marangatu rete.

Rehechauka va’ekue chéve jeikove rape, ha che moenyhẽta vy’águi ne renondépe”. Che pehẽnguekuéra: Ta’e porãntena peẽme, ñande ru ypykue David omano ha oñeñotỹ hague ha ityvy oĩha gueteri ñande apytépe.

David katu maranduhára va’ekue, ha oikuaa Tupã Ñandejára ome’ẽ hague ichupe iñe’ẽ, omoĩtaha mburuvicha guasu ramo peteĩ iñemoñarévape. Ha’e ohechama va’ekue oiko mboyve, oikove jevyha pe Mesías. David oñe’ẽ va’ekue upéva rehe ha he’i pe Mesías ndo pyta mo’ãiha ityvýpe ha hete noñembyai mo’ãiha. Ha péina Tupã Ñandejára omoingove jevy upe Jesúspe, ha ore, upéva rechahare.

Tupã Ñandejára omopu’ã rire ichupe ha omoĩ ijakatúape, ha ohupity rire Tupã gui Espíritu Santo, ha’e he’i va’ekue ome’ẽtaha oréve, ohekuavo pe Espíritu ore ári. Upéva hína upe peë pehecha ha pehendu va’ekue.

Tupã Ñandejára Ñe’ẽ.

SALMO ÑEMBOHOVÁI       16, 1-2a. 5. 7-11

R.Nde rehechaukáne chéve jeikove rape.

Tupã, eñangareko kena che rehe, ne rendápe niko aguahẽ.

Ha’e ndéve: Tupã Ñandejára, nde hína opa mba’e chéve guarã.

Nde pópe oĩ che rekove. O.

Amomba’e guasúta Tupã Ñandejárape che resape’áva,

pyharekue jepe che py’a rugua guive che moarandu.

Opa árape Tupä Ñandejára rehe che mandu’a,

ha’e oĩ ramo che ypýpe nda’ái chéne. O.

Upéva rehe, che py’a rory, ha py’a guapýpe aikóne.

Nda che rejái chéne amano.

Ndereheja mo’ãi ne irũme yvy kuápe ojeity. O.

Nde rehechaukáne chéve jeikove rape.

Ne rendápe aime ramo vy’águi che moenyhẽne.

Nde ypýpe vy’a ndopáiva. O.

Segunda lectura:

Ñahendúta Tupã Ñandejára Ñe’ẽ San Pedro aranduka peteĩ hápe oĩ háicha                  1, 17-21                                           

Che pehenguekuéra pohayhu’etéva:

Peẽ pehenói ramo “Che Ru” Tupä Ñandejárape, ombojovakéva peteĩ teĩme hembiapokue ojerure háicha ha teko jojápe, pemomba’e guasu va’erã ichupe peikove aja pukukue ko yvy ári. Tupã Ñandejára niko pende pe’a va’ekue pe jeikove reígui pende ypy kuérakue oheja va’ekue peëme.

Ha peẽ peikuaa porã, upéva rehe ojehepyme’ẽ hague nda ha’éi  mba’e itujúvape, óro térã plátaicha, upéva ojehepyme’ẽ hepyetéva Cristo ruguýpe, oñekuave’ẽ va’ekue ojejuka haguã peteĩ ovecha ra’ýicha, oĩmba porãva ha iky’a’ỹva. Cristo niko upeva’erã  voi oñemoĩ va’ekue opa mba’e ojejapo ypy mboyve, ha ko’ã ára pahápe katu ojechauka peëme ou porã haguã.

Cristo rupi peẽ perovia Tupã Ñandejárape, ha’e niko omoingove jevy ha oguerohory va’ekue ichupe. Ha upéicha, peẽ pemoĩ Tupã Ñandejára rehe pende jerovia ha opa peha’arõva.

Tupã Ñandejára Ñe’ẽ.

ALELUIA         Cf. Lc 24-32

Aleluia

Ajépa niko ñande py’a hendy va’ekue hína ñande pyti’ápe jajúvo tape rehe, ku omoesakã ramo hína ñandéve Tupã Ñandejára Ñe’ẽ?

Aleluia

EVANGELIO

Ñahendúta Ñandejára Jesucrísto rekove ha hemimbo’e San Lucas omombe’u háicha    24, 13-35

Upe árape voi, mokõi Jesús remimbo’e oho peteĩ táva hérava Emaúspe, opytáva 11 kilómetro rupi Jerusaléngui. Oñe’ẽ ohóvo hikuái umi mba’e ojehu va’ekue rehe. Oñomongeta jave hikuái ohóvo, Jesús ete voi oñemboja ha oñepyrũ oguata hendive kuéra. Ha ohecha ramo jepe ichupe, ndohechakuaái mávapa ha’e. Jesús oporandu ichupe kuéra:

Mba’e piko peje pehóvo?

Opyta hikuái, hovasy ñembyasýgui. Ha peteïva, pe Cleofás hérava, he’i:

Nde añoite piko umi oĩ va’ekue Jerusalénpe apytégui, pe oikuaa’ỹva mba’épa ojehu ra’e upépe, ko’ãva ko’ãára ohasa va’ekuépe?

Ha’e oporandu ichupe kuéra:

Ha mba’e piko ojehu?

He’i ichupe hikuái:

Ha pe Jesús Nazaretguare gua, peteï maranduhára va’ekue, ipu’akapáva ojapóvape ha he’ívape Tupã Ñandejára renondépe ha opavave renondépe. Ha umi pa’i ruvicha ha ñande ruvicha kuéra ome’ẽ ojejuka haguã, ha oñemosãingo ichupe kurusu rehe. Ore roha’arõ ite va’ekue ha’e oipysyrõtaha tetã Israélpe. Ha ojapóma mbohapy ára umi mba’e ojehu hague.

Umi kuña oĩva ore ndive jepe ore mondýi kuri, oho niko hikuái ko’ẽ mboyve pe ityvýpe, ha ndojuhúi rupi hetekue, oho jevy hikuái ha omombe’u, Tupã Ñandejára remimbou ojechauka hague ichupekuéra, ha he’i Jesús oikove jevyha. Oime ore apytégui ore irũ oho va’ekue upe rire pe tyvýpe ha ojuhu umi kuña he’i hagueicha ite. Jesúspe katu ndohechái.

Aipo ramo Jesús he’i ichupekuéra:

Ndaikatúi ete voi ra’e peikuaa mba’eve ha hasy eterei peëme perovia haguã opa mba’e he’i va’ekue maranduhárakuéra! Ndo hasái va’erã nga’u piko ra’e pe Mesías ko’ã mba’e, Tupã Ñandejára ndive omimbipa haguã yvágape?

Upéi oñemoĩ omoesakã ichupe kuéra opa umi oñe’ẽhápe hese Tupã Ñandejára Ñe’ẽ. Oñepyrũ Moisés kuatiakuéragui ha ohasa ohóvo opa maranduhára kuatia kuérape. Oguahẽvo pe táva ohohápe, Jesús ojapo ohóta ramo gua’u tenonderãvo. Ha’ekuéra katu ojoko ichupe opyta haguã, he’ívo: Epyta ore ndive, ka’aru etéma niko. Pyharétama hína.

Jesús aipo ramo opyta hendivekuéra.  oguapýma ramo hikuái mesápe, Jesús ohupi ipópe mbujape, ome’ẽ ijaguyje Tupãme, ha omboja’o ha ome’ẽ peteĩ teĩme. Upe javete ojehesa pe’a hikuái ha oikuaa Jesúspe. Ha’e katu okañy hesa renondéguikuéra. Ha he’i hikuái ojupe:

Ajépa niko ñande py’a hendy va’ekue hína ñande pyti’ápe jajúvo tape rehe, ku omoesakã ramo hína ñandéve Tupã Ñandejára Ñe’ẽ?

Oha’arõve’ỹrehe, ojeity hikuái tape rehe ha ojevy hikuái Jerusalénpe. Upépe ojuhu hikuái ijaty hína umi 11 apóstol ha iñirũnguéra, he’íva ichupekuéra:

Añetehápe oikove jevy Ñandejára, ha ojechauka Simónpe.

Aipo ramo ha’ekuéra mokõi omombe’u mba’épa ojehu ichupekuéra tape rehe, ha mba’éichapa oikuaa hikuái Jesúspe omboja’óvo mbujape.

Ñandejára Jesucrísto  Ñe’ẽ.