DOMINGO TERCERO DE PASCUA

DOMINGO TERCERO DE PASCUA

Primera lectura:

Ko’ágä ñahendúta Tupä Ñandejára ñe’ẽ Apóstolkuéra rembiapokuépe oĩ háicha                                  

     2, 14. 22-33

Pedro oñembo’y umi 11 apóstol ndive ha oñe’ẽ hatã he’ívo: “Israelgua ha opa peikóva Jerusalénpe, peikuaáke kóva ha pehendu porã ko ha’étava peëme:

Pehendu aipo ramo Israelgua ko ha’éva peëme: Peikuaa porã háicha, Tupä Ñandejára ohechauka va’ekue pende apytépe Jesús Nazaretgua pokatu, ojapóvo ha’e rupi heta hechapyrãva, oporomondýiva ha techaukarãva. Ha’e omoĩ va’ekue ichupe, hese ija’e’ỹva pópe, Tupä Ñandejára oguereko haguéicha iñakãme ha ha’e oipota haguéicha, Peë katu pejuka va’ekue ichupe pemosãingóvo kurusu rehe tekove aña po rupi.

Tupä Ñandejára katu omoingove jevy ichupe, oipe’ávo ichupe mano poguýgui, mano ndaikatúigui ipu’akávo hese. Mburuvicha guasu David, oñe’ẽvo Jesús rehe he’i va’ekue :

Che ahecha mantéva  Ñandejárape che renondépe.

Ha’e oĩgui che akatúape mba’eve nda che reitýi chéne.

Upéva rehe che py’a henyhẽ vy’águi

ha apurahéi torypa itépe.

Aikóne kyhyje’ỹ rehe, nda che reja mo’ãigui

che tyvy kuápe, térã oñembyai ne rembiguái marangatu rete.

Rehechauka va’ekue chéve jeikove rape, ha che moenyhẽta vy’águi

ne renondépe”. Che pehẽngue kuéra: Ta’e porãntena peëme, ñande ru ypykue David omano ha oñeñotỹ hague ha ityvy oĩha gueteri ñande apytépe. David katu maranduhára va’ekue, ha oikuaa Tupä Ñandejára ome’ẽ hague ichupe iñe’ẽ, omoĩtaha mburuvicha guasu ramo peteï iñemoñarévape. Ha’e ohechama va’ekue oiko mboyve, oikove jevyha pe Mesías. David oñe’ẽ va’ekue upéva rehe ha he’i pe Mesías ndo pyta mo’ãiha ityvýpe ha hete noñembyai mo’ãiha. Ha péina Tupä Ñandejára omoingove jevy upe Jesúspe, ha ore, upéva rechahare.

Tupä Ñandejára omopu’ã rire ichupe ha omoĩ ijakatúape, ha ohupity rire Tupägui Espíritu Santo, ha’e he’i va’ekue ome’ẽtaha oréve, ohekuavo pe Espíritu ore ári. Upéva hína upe peë pehecha ha pehendu va’ekue.

Tupä Ñandejára Ñe’ẽ.

SALMO ÑEMBOHOVÁI       16, 1-2a. 5. 7-11

R.Nde rehechaukáne chéve jeikove rape.

Tupä, eñangareko kena che rehe, ne rendápe niko aguahẽ.

Ha’e ndéve: Tupä Ñandejára,

nde hína opa mba’e chéve guarã.

Nde pópe oĩ che rekove. R.

Amomba’e guasúta Tupä Ñandejárape che resape’áva,

pyharekue jepe che py’a rugua guive che moarandu.

Opa árape Tupä Ñandejára rehe che mandu’a,

ha’e oĩ ramo che ypýpe nda’ái chéne. R.

Upéva rehe, che py’a rory, ha py’a guapýpe aikóne.

Nda che rejái chéne amano.

Ndereheja mo’ãi ne irũme yvy kuápe ojeity. R.

Nde rehechaukáne chéve jeikove rape.

Ne rendápe aime ramo vy’águi che moenyhẽne.

Nde ypýpe vy’a ndopáiva. R.

Segunda lectura:

Ñahendúta Tupä Ñandejára Ñe’ẽ San Pedro aranduka peteï hápe oĩ háicha                                                            

  1, 17-21

Che pehenguekuéra pohayhu’etéva:

Peë pehenói ramo “Che Ru” Tupä Ñandejárape, ombojovakéva peteï teĩme hembiapokue ojerure háicha ha teko jojápe, pemomba’e guasu va’erã ichupe peikove aja pukukue ko yvy ári. Tupä Ñandejára niko pende pe’a va’ekue pe jeikove reígui pende ypy kuérakue oheja va’ekue peëme.

Ha peë peikuaa porã, upéva rehe ojehepyme’ẽ hague nda ha’éi  mba’e itujúvape, óro térã plátaicha, upéva ojehepyme’ẽ hepy etéva Cristo ruguýpe, oñekuave’ẽ va’ekue ojejuka haguã peteï ovecha ra’ýicha, oĩmba porãva ha iky’a’ỹva. Cristo niko upeva’erã  voi oñemoĩ va’ekue opa mba’e ojejapo ypy mboyve, ha ko’ã ára pahápe katu ojechauka peëme ou porã haguã.

Cristo rupi peë perovia Tupä Ñandejárape, ha’e niko omoingove jevy ha oguerohory va’ekue ichupe. Ha upéicha, peë pemoĩ Tupä Ñandejára rehe pende jerovia ha opa peha’arõva.

Tupä Ñandejára Ñe’ẽ.

ALELUIA         Cf. Lc 24-32

Aleluia

Ajépa niko ñande py’a hendy va’ekue hína ñande pyti’ápe jajúvo tape rehe, ku omoesakã ramo hína ñandéve Tupä Ñandejára Ñe’ẽ?

Aleluia

EVANGELIO

Ko’ágä ñahendúta Ñandejára Jesucrísto  rekove ha hemimbo’e San Lucas omombe’u háicha.

Pejapysaka porãtapa hese?                                                24, 13-35

Upe árape voi, mokõi Jesús remimbo’e oho peteï táva hérava Emaúspe, opytáva 11 kilómetro rupi Jerusaléngui. Oñe’ẽ ohóvo hikuái umi mba’e ojehu va’ekue rehe. Oñomongeta jave hikuái ohóvo, Jesús ete voi oñemboja ha oñepyrũ oguata hendive kuéra. Ha ohecha ramo jepe ichupe, ndohechakuaái mávapa ha’e. Jesús oporandu ichupe kuéra:

Mba’e piko peje pehóvo?

Opyta hikuái, hovasy ñembyasýgui. Ha peteïva, pe Cleofás hérava, he’i:

Nde año ite piko umi oĩ va’ekue Jerusalénpe apytégui, pe oikuaa’ỹva mba’épa ojehu ra’e upépe, ko’ãva ko’ãára ohasa va’ekuépe?

Ha’e oporandu ichupe kuéra:

Ha mba’e piko ojehu?

He’i ichupe hikuái:

Ha pe Jesús Nazaretguare gua, peteï maranduhára va’ekue, ipu’akapáva ojapóvape ha he’ívape Tupä Ñandejára renondépe ha opavave renondépe. Ha umi pa’i ruvicha ha ñande ruvicha kuéra ome’ẽ ojejuka haguã, ha oñemosãingo ichupe kurusu rehe. Ore roha’arõ ite va’ekue ha’e oipysyrõtaha tetã Israélpe. Ha ojapóma mbohapy ára umi mba’e ojehu hague. Umi kuña oĩva ore ndive jepe ore mondýi kuri, oho niko hikuái ko’ẽ mboyve pe ityvýpe, ha ndojuhúi rupi hetekue, oho jevy hikuái ha omombe’u, Tupä Ñandejára remimbou ojechauka hague ichupe kuéra, ha he’i Jesús oikove jevyha. Oime ore apytégui ore irũ oho va’ekue upe rire pe tyvýpe ha ojuhu umi kuña he’i hagueicha ite. Jesúspe katu ndohechái.

Aipo ramo Jesús he’i ichupekuéra:

Ndaikatúi ete voi ra’e peikuaa mba’eve ha hasy eterei peëme perovia haguã opa mba’e he’i va’ekue maranduhára kuéra! Ndo hasái va’erã nga’u piko ra’e pe Mesías ko’ã mba’e, Tupä Ñandejára ndive omimbipa haguã yvágape? Upéi oñemoĩ omoesakã ichupe kuéra opa umi oñe’ẽhápe hese Tupä Ñandejára Ñe’ẽ. Oñepyrũ Moisés kuatia kuéragui ha ohasa ohóvo opa maranduhára kuatia kuérape. Oguahẽvo pe táva ohohápe, Jesús ojapo ohóta ramo gua’u tenonderãvo. Ha’e kuéra katu ojoko ichupe opyta haguã, he’ívo: Epyta ore ndive, ka’aru etéma niko. Pyharétama hína.

Jesús aipo ramo opyta hendivekuéra.  oguapýma ramo hikuái mesápe, Jesús ohupi ipópe mbujape, ome’ẽ ijaguyje Tupäme, ha omboja’o ha ome’ẽ peteï teĩme. Upe javete ojehesa pe’a hikuái ha oikuaa Jesúspe. Ha’e katu okañy hesa renondégui kuéra. Ha he’i hikuái ojupe:

Ajépa niko ñande py’a hendy va’ekue hína ñande pyti’ápe jajúvo tape rehe, ku omoesakã ramo hína ñandéve Tupä Ñandejára Ñe’ẽ?

Oha’arõve’ỹrehe, ojeity hikuái tape rehe ha ojevy hikuái Jerusalénpe. Upépe ojuhu hikuái ijaty hína umi 11 apóstol ha iñirũ nguéra, he’íva ichupe kuéra:

Añetehápe oikove jevy Ñandejára, ha ojechauka Simónpe.

Aipo ramo ha’e kuéra mokõi omombe’u mba’épa ojehu ichupe kuéra tape rehe, ha mba’éichapa oikuaa hikuái Jesúspe omboja’óvo mbujape.

Ñandejára Jesucrísto  Ñe’ẽ.