DOMINGO TRIGÉSIMO PRIMERO DURANTE EL AÑO

DOMINGO TRIGÉSIMO PRIMERO DURANTE EL AÑO
ÑAHENDU ÑANDEJÁRAPE

LECTURA PETEÎHA:
Motivación: Profeta Malaquías rupive Ñandejára oja’o umi pa’i ombo’e vaíva ha oitýva hapichápe ha ndojapóiva Ñandejára oipotáva.

Ko’ágã ñahendúta Tupã Ñandejára ñe’ẽ Malaquías arandukápe oĩ háicha 1, 14b __ 2,2b. 8-10

“Che hína mburuvicha guasu pavẽ ha opa rupi ojekyhyje che hegui!” Péicha he’i Ñandejára ipu’akapáva. “Pejapóke che ha’éva ha peñeha’ã che apo mba’e ramo. Ndapejapói ramo, aitýta jeharu pende rehe. Ha ndacheaposéigui mba’e ramo ambojeharúta umi mba’e oñeme’ẽva peẽme pa’i ramo”.

Peẽ pa’ikuéra katu pejei che rapégui. Pembo’éva rupi peity hetápe. Ha upéicha pembyai ñe’ẽ me’ẽ ajapo va’ekue Leví ndive. Ndapejapói hague rehe che aipotáva ha upéva ári, peporo mbo’évo peporo mbojerovia juavýgui, pejererekóta ijaheipy ramo ha ndapeje apo mo’ãi mba’eve ramo che retãgua apytépe”. He’i Ñandejára ipu’akapáva.

Ndaha’éi pa hína peteĩnte ñande Ru ha ñande Apohare? Mba’e rehe aipo ramo ñaño mbotavy ha ñapyrũ ñande rukuéra ypykue ñe’ẽngue rehe?

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 130, 1-3
Opavave: Ñandejára eñongatu che anga topytu’u nendive.

Che Jára, ndaha’éi ku añemochenteséva,
térã amoĩva che resa mba’e tuicháva rehe.
Ndaha’éi yvateterei aguahẽséva,
térã aipotáva mba’e hendape’ỹ, ndahupitýiva. O.

Nahániri. Akirirĩ ha py’a guapýpe aiko,
ku mitã kambúicha isy jyva ári.
Péicha che che py’apýpe hína
Israel, ejerovia Ñandejárare ko’ágã ha opa ára. O.

LECTURA MOKÕIHA:
Motivación: Peteĩ sy ohayhu háicha imemby, upéicha avei San Pablo ohayhúgui hapichápe oñeha’ã ha omba’apo ombo’e haguã ichupekuéra Ñandejára rape.

Ñahendúta Tupã Ñandejára Ñe’ẽ San Pablo ohai va’ekue Tesalónica guápe 1,5b; 2, 7b-9. 13

Che pehenguekuéra: Peikuaa porã mba’éichapa ore mba’e porã pene ndive, rohekávo peẽme guarã iporãva. Peteĩ sy omongakuaa ha oñangarekóva imemby teére, upéicha avei, pende rayhuetereígui, rome’ẽse va’erã mo’ã peẽme, ndaha’éi Ñandejára Ñe’ẽ añónte, ore rekove guive katu. Mba’eichaite peve nipo roguahẽ pende rayhuete!

Ore pehẽngue, peẽ pene mandu’áne mba’éichapa romba’apo ha roñeha’ã rojeheka haguã. Romba’apo va’ekue ára ha pyhare, ani haguã ipohýi peẽme ore rekove, romyasãi aja peẽme Ñandejára Ñe’ẽ.

Upéva rehe, ore rome’ẽva ore aguyje Tupãme, peẽ niko pehendu ramo guare Ñandejára Ñe’ẽ romyasãiva pende apytépe, pemoguahẽ pende py’apýpe Ñandejára marandu ramo, ha ndaha’éi yvypóra marandu ramo. Ha añetehápe Ñandejára marandu hína, oguerahava peẽme mba’e porã, peẽ pejeroviávape.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 23, 9b. 10b
Aleluia.

Peteĩnte niko pende Túva, ha ha’e oĩ yvágape peteĩnte niko pene Mbo’ehára ha upéva pe Mesías.
Aleluia.

EVANGELIO
Motivación: Jesús ñanembo’e ñande Iglesia pe ñañombojoja va’erãha, pe ombo’eva ha omyakãva comunidad oñemoĩ va’erã peteĩcha opavave ykére.

Marandu porã Ñandejára Hesukrísto rehegua San Mateo omombe’u háicha 23,1-12
Opavave: Romomba’e guasu ndéve, Ñandejára.

Jesús oñe’ẽ jave idisípulo kuéra ndive, he’i chupekuéra: Umi fariséo ha umi Moisés léi ombo’éva niko hína umi oikuaavéva mba’épa oĩ hína Moisés léipe.

Upévare, pene ñe’ẽ rendu vaerã chupekuéra ha peñeha’ã va’erã pejapo opa he’íva peẽme. Umi mba’e ojapóvante ani pejapo. Ha’ekuéra niko he’i peteĩ mba’e, ha ndojapói pe he’íva.

Ñande apére oity heta mba’e pohýi, ha’e kuéra katu ikuã’ínte jepe nomongu’éi ojapo haguã. Opa ojapóva, ojechauka haguãnte ojapo.

Omboja isyváre térã ijao jyváre Ñandejára Ñe’ẽ pehẽngue mimi. Ha umi ijao katu ombofléko puku-puku ohechauka haguã gua’u ojapoha opa mba’e Ñandejára oipotáva.

Tupaópe térã karu guasuhápe ohórõ katu, ku poguasúrõ guáicha gua’úko oikose. Jajotopa ramo hendivekuéra oimehápe rei, oipota tuicha ñamomaitei chupekuéra ku ñane mbo’ehára guasu guaichárõ ha’ekuéra.

Peẽ katu, ani peheja avavépe he’i peẽme peẽ mbo’eharaha. Peẽ niko ojoryvy, ha peteĩnte pene mbo’ehára. Ha ani avavépe peje “che ru”. Peteĩnte niko pende ru, ha ha’e oĩ yvágape.

Ani avei peheja avave he’i peẽme “myakãhára”. Che añónte, pe Mesías, pene myakãhára hína. Pe tuichaséva pende apytépe, toiko ku tembiguáirõ guáicha ha’e. Umi ojejapo ha oñembotuicháva niko oñemomichĩ va’erã ágã, ha umi
heko mirĩva katu oñembotuicháne.

Tupã Ñandejára Ñe’ẽ.

Opavave: Romomba’e guasu ndéve, Ñandejára Jesucristo.